ހައިކޯޓަށް ހުށަހަޅާ އިސްތިއުނާފްގެ މައްސަލަތައް ހައިކޯޓުން ބަލައިނުގެންފިނަމަ، ސުޕްރީމްކޯޓުގައި އެކަން އިސްތިއުނާފު ކުރުމުން ސުޕްރީމް ކޯޓުން އެ މައްސަލަ ބަލައި ހިންގުމުގައި އަމަލު ކުރަމުން އައި އިޖުރާއަތަށް ބަދަލު ގެނެސްފިއެވެ.

ސުޕްރީމް ކޯޓުން އަންގާރަ ދުވަހު ނެރުނު ސްޓޭޓްމަންޓެއްގައި ބުނެފައި ވަނީ، ޝަރުޢީ މަރުޙަލާތަކުގެ ތެރޭގައި މައްސަލަތައް ނުހިންގި ލަސްވުމުގެ ސަބަބުން ޢަދުލު އިންޞާފު ލިބުން ލަސްވަމުންދާތީ އާއި، ކޯޓުތަކުގެ ޙުކުމްތައް ތަންފީޒު ކުރުން އަވަސް ކުރުމުގެ ގޮތުންނާއި، އެކިއެކި ފަރާތްތަކަށް ދައްކަން ޖެހޭ ފައިސާ ދެއްކުން ގަސްތުގައި ލަސް ކުރުމުގެ ބޭނުމުގައި ޝަރުޢީ މަރުޙަލާތަކުގެ ބޭނުން ނަހަމަގޮތުގައި ހިފުން ހުއްޓުވުމަށްޓަކައި، ހައިކޯޓަށް ހުށަހަޅާ އިސްތިއުނާފުގެ މައްސަލައެއް އެ ކޯޓުން ބަލައިނުގެންފިނަމަ، ސުޕްރީމް ކޯޓުގައި އެކަން އިސްތިއުނާފު ކުރުމުން ސުޕްރީމް ކޯޓުން އެ މައްސަލަ ބަލައި ހިންގުމުގައި ޢަމަލު ކުރަމުން އައި އިޖުރާއަތަށް ބަދަލު ގެނެވިފައިވާ ކަމަށެވެ.

އެގޮތުން ގެނެސްފައިވާ ދެ ބަދަލުގެ ތެރެއިން ފުރަތަމަ ބަދަލަކީ، ދަށު ކޯޓުން ނިންމި މައްސަލައިގެ އިސްތިއުނާފު ބަލައިނުގަތުމަށް ދިވެހިރާއްޖޭގެ ކޯޓުތަކުގެ ޤާނޫނުގެ 43 ވަނަ މާއްދާގެ ދަށުން ހައިކޯޓުން ނިންމަނީ އެ ކޯޓުގައި ހިންގޭ ޤަޟިއްޔާއަކުން ކަމަށް ނުވާތީވެ، ހައިކޯޓުން ނިންމާ އެފަދަ އިޖުރާއީ ނިންމުމެއް ސުޕްރީމް ކޯޓުގައި އިސްތިއުނާފު ކުރެވިއްޖެނަމަ، އެ މައްސަލަ އަކީ ކޮންމެހެން އަޑުއެހުމެއް ނުބާއްވައި ސުޕްރީމް ކޯޓުގެ ފަނޑިޔާރުންނަށް ނިންމިދާނެ މައްސަލައެއްނަމަ، އެފަދަ މައްސަލައެއްގައި އަޑުއެހުމެއް ނުބާއްވައި، އިޖުރާއީ ގޮތުން އެ މައްސަލައެއް ސުޕްރީމް ކޯޓުން ބަލައި ނިންމުމަށެވެ.

ދެވަނަ ބަދަލަކީ، ދަށުކޯޓުން ނިންމި މައްސަލަ އަކީ ހައިކޯޓުން ބަލައިގަނެ އެ ކޯޓުގައި ހިންގަންޖެހޭ އިސްތިއުނާފުގެ މައްސަލައެ އްކަމަށް ސުޕްރީމް ކޯޓުގެ ފަނޑިޔާރުން ކަނޑައަޅައިފިނަމަ، ސުޕްރީމް ކޯޓުން އެގޮތަށް ކަނޑައަޅައި އިސްތިއުނާފު ކުރި ފަރާތަށް އެކަން އަންގާ ތާރީޚުން ފެށިގެން ރަސްމީ 10 (ދިހައެއް) ދުވަހުގެ ތެރޭގައި އެ ފަރާތަކުން އެ މައްސަލަ ހައިކޯޓަށް ހުށަހަޅަން ވާނެއެވެ. އަދި އެ މުއްދަތުގައި އެ މައްސަލައެއް ހުށަނާޅައިފިނަމަ، އެ މައްސަލައެއް ހައިކޯޓަށް ބަލައިނުގަތުމުގެ ބާރު ހައިކޯޓަށް ލިބިގެންވާ ކަމަށެވެ.

ސުޕްރީމް ކޯޓަށް ހުށަހެޅޭ މިފަދަ މައްސަލަތަކުގައި ކުރިން އަމަލު ކުރަމުން ގެންދިޔައީ އެ މައްސަލައިގެ އަޑުއެހުމެއް ބޭއްވުމަށްފަހު ގައެވެ.