ކްރިމިނަލް ކޯޓު ހިންގެވުމާ ހަވާލުވެ ހުންނެވި ފަނޑިޔާރު އަލީ ރަޝީދު ހުސައިން، ސްޕްރިމް ކޯޓުގެ ފަނޑިޔާރު ކަމަށް އައްޔަން ކުރެއްވުމާ ގުޅިގެން ކްރިމިނަލް ކޯޓުގެ ހުސްވެފައިވާ މަގާމަށް ޤާޟީ އާދަމް މުހައްމަދު އައްޔަން ކުރުމަށް ޖުޑީޝަލް ސަރވިސް ކޮމިޝަނުން ނިންމައިފިއެވެ.
އެކަމާ ގުޅިގެން އަންގާރަ ދުވަހު ޖޭއެސްސީން ބުނީ ކްރިމިނަލް ކޯޓު ހިންގުމާ ޙަވާލުވެ ހުންނެވި ފަނޑިޔާރު އަލީ ރަޝީދު ޙުސައިން، ދިވެހި ރާއްޖޭގެ ސުޕްރީމް ކޯޓުގެ ފަނޑިޔާރު ކަމަށް އައްޔަނު ކުރެވުމާ ގުޅިގެން، ދިވެހިރާއްޖޭގެ ކޯޓުތަކުގެ ގާނޫނުގެ 54 ވަނަ މާއްދާގެ (ޅ) ގެ ދަށުން ކްރިމިނަލް ކޯޓު ހިންގުން އެ ކޯޓުގެ ޤާޟީ އާދަމް މުޙައްމަދާ އަންގާރަ ދުވަހު ބޭއްވި ކޮމިޝަނުގެ 64 ވަނަ ބައްދަލުވުމުގައި ނިންމާފައިވާ ކަމަށެވެ.
މިދިޔަ ޖެނުއަރީ މަހު ކްރިމިނަލް ކޯޓަށް އައްޔަން ކުރި ޤާޟީ އާދަމް މުހައްމަދު މީގެ ކުރިން ޕްރޮސެކިއުޓާ ޖެނެރަލްގެ އޮފީސް އަދި ދިފާއީ ވަކީލެއްގެ ގޮތުގައި މަސައްކަތް ކުރެއްވި އެވެ.
ކްރިމިނަލް ކޯޓު ހިންގުން ފަނޑިޔާރު އާދަމް މުހައްމަދާއި ހަވާލު ކުރުމަށް ޖޭއެސްސީން ނިންމާފައިވާއިރު، އޭރު ކްރިމިނަލް ކޯޓުގެ ހިންގުން ޤާޟީ އަލީ ރަޝީދާއި ހަވާލު ކުރީ އިސް ޤާޟީ ހައިލަމް ސަސްޕެންޑް ކުރުމާއި ގުޅިގެންނެވެ. ހައިލަމް ސަސްޕެންޑް ކުރީ ނަސްރުގެ ދުވަހުގެ ތަހުނިޔާ ވިދާޅުވެ ވައިބަރ ގްރޫޕަކަށް ފޮނުއްވި މެސެޖެއްގައިވާ ކުރެހުމެއްގެ މައްސަލައިގައެވެ.
