ބޯޑަރުގައި ހަރަކާތްތެރިވާ މުހިއްމު 7 މުއައްސަސާއެއް އެއް ވިއުގައަކުން ގުޅާލުމަށް މި ސަރުކާރުން ފަށާފައިވާ "ނެޝަނަލް ސިންގަލް ވިންޑޯ" މަޝްރޫއުގެ ބިޑިންގ މަރުޙަލާގައި ހެދި ޓެކްނިކަލް އިވެލުއޭޝަނުން ފާސްވީ ހަމައެކަނި ވެބް ފޮންޓެއިން ކުންފުނި ކަމަށް ފިނޭންސް މިނިސްޓްރީން ހާމަ ކޮށްފިއެވެ.
ވެބްފޮންޓެއިންއާ މަޝްރޫއު ހަވާލުކުރީ އަގު ހެޔޮކޮށް ކުރިއަށް ގެންދަން ހުށަހެޅި ގިނަ ކުންފުނިތައް ބާކީ ކުރުމަށް ފަހު ކަން ލިޔުންތަކުން ފެންނަން އޮތް ކަމަށް މީޑިއާތަކުން ރިޕޯޓް ކޮށްފައިވާއިރު، އެކަމުގެ ޙަޤީޤަތް ހޯމަ ދުވަހު ފިނޭންސް މިނިސްޓްރީގައި ބޭއްވި ނޫސްވެރިންގެ ބައްދަލުވުމުގައި ވަނީ އާންމު ކޮށްފައެވެ.
އެގޮތުން މިނިސްޓްރީގެ ސީނިއަރ ޕޮލިސީ ޑިރެކްޓަރ ހުސައިން ހަމީމް ވިދާޅުވީ، މި މަޝްރޫއު އެވާރޑް ކުރުމުގައި އެންމެ މުހިއްމު ކަމެއްގެ ގޮތުން މިނިސްޓްރީން ބަލާފައިވާނީ ބިޑިންގ މަރުޙަލާގައި ހެދި ޓެކްނިކަލް އިވެލުއޭޝަނަށް ކަމަށެވެ. އަދި މިފަދަ މަސައްކަތެއް ކުރެވޭނެ ކަމުގެ ޤާބިލުކަން ހުރިކަން ވެސް އެނގިގެން ދަނީ އެސެސްމަންޓު ހެދުމުންކަން ފާހަގަ ކުރައްވައި އޭނާ ވިދާޅުވީ، އެއީ މިނިސްޓްރީން ބަލާ އެންމެ އަސާސީ އެއް މިންގަނޑު ކަމަށެވެ.
އަދި އެހެން ކުންފުނިތަކުން ހުށައަޅާފައިވާ އަގު ހެޔޮ ނަމަވެސް، މަސައްކަތަށް "ކޮލިފައި" ނޫންކަން މިނިސްޓްރީން ފާހަގަ ކޮށްފައިވެއެވެ.
ކުޑަ އަގެއް ލާ ކޮންމެ ބަޔަކީ ހުރިހާ ޓެކްނިކަލް ރިކުއަރމަންޓުތައް ފުރިހަމަވާ ބައެކޭ ނެތް ބުނެވޭކަށް، ޕްރޮޖެކްޓަށް ހަދާ ޓެކްނިކަލް އިވެލުއޭޝަނާ އެއްކޮށް އަގު މި ކިޔަނީ، އެހެންވީމާ ޓެކްނިކަލް އިވެލުއޭޝަނުން ފާސް ނުވާ ބައެއް ކިތަންމެ ކުޑަ އަގެއް ހުށައެޅިޔަސް ޕްރޮޖެކްޓެއް އެވާރޑެއް ނުކުރާނެ، މީގަ ހަދާފައި އިން ޓެކްނިކަލް އިވެލުއޭޝަނުން ހަމައެކަނި ފާސްވެފައިވަނީ ވެބް ފޮންޓެއިން، ޓެކްނިކަލް އިވެލުއޭޝަނޭ މި ކިޔަނީ އެމީހުން ހުށައަޅާ ސިސްޓަމް، އެ ސިސްޓަމް އެއީ އެން.އެސް.ޑަބްލިއުގައި މި ކުރަން ބޭނުންވާ މަސައްކަތަށް އެންމެ އެކަށީގެންވާ ސިސްޓަމްތޯ މި ބަލަނީ، ބަލާއިރު، އެމީހުން ހުށައަޅާފައިވާ ހާރޑުވެއަރ އަދި ސޮފްޓްވެއަރތައް ހުރިހާ މިންގަނޑަކަށް ފުލްފިލްވޭ، އެހެންވީމާ އަގުހެޔޮވިޔަސް ކޮލިފައި ނުވަންޏާ ބިޑް ކާމިޔާބެއް ނުވާނެ،މިނިސްޓްރީގެ ސީނިއަރ ޕޮލިސީ ޑިރެކްޓަރ ހުސައިން ހަމީމް
މިނިސްޓްރީން ބުނީ، އެ މިންގަނޑުން ބެލިއިރު، އެސެސްމަންޓުން ފާސްވެފައި ވަނީ ވެސް ހަމައެކަނި ވެބްފޮންޓެއިން ކުންފުނި ކަމަށެވެ. އަދި އެ ކުންފުންޏާ ގުޅިގެން ފާހަގަވި މައްސަލަ އަކީ ވެބް ފޮންޓެއިން އޭޝިއާ އިންކް (ފިލިޕީންސް)ގެ ތަޖުރިބާގެ ލިޔުންތަކުގެ ގޮތުގައި ހުރީ ވެބް ފޮންޓެއިން އެފް.ޒެޑް.އެލް.އެލް.ސީ (ޔޫ.އޭ.އީ) ގެ ލިޔުންތަކަށް ވުން ކަމަށެވެ. އެހެން ނަމަވެސް، އެއީ އިންޓެގްރިޓީ ވައިލޭޝަނެއް (ކުންފުނިން އޮޅުވާލުމުގެ މަޤްސަދުގައި ކޮށްފައިވާ ކަމެއް) ކަމަށް ނުބެލެވޭ ކަމަށް އޭޑީބީއާއި މިނިސްޓްރީއަށް ވެސް ފާހަގަވެފައިވާ ކަމަށް އޭނާ ވިދާޅުވިއެވެ.
އެއާއެކު، އަލުން މި މަޝްރޫއުގެ ބިޑިންގއަށް ދާއިރު ވެސް، އެހެން ކުންފުނިތަކެކޭ އެއްގޮތަށް ވެބް ފޮންޓެއިން އޭޝިއާ އިންކް (ފިލިޕީންސް)އަށް ބައިވެރިވުމުގެ ފުރުސަތު އޮތް ކަމަށް އޭޑީބީން ވަނީ ނިންމާފައެވެ.
