އިތުރު 7 ރާޑަރ ސިސްޓަމް ބެހެއްޓުމުގެ މަސައްކަތް ކުރަމުން ދާކަމަށާއި މިއަހަރުގެ ފަހުކޮޅު ޖުމްލަ 10 ރާޑަރު ސިސްޓަމް ރާއްޖޭގައި ހުންނާނެކަމަށް ވައިސް ޗީފް އޮފް ޑިފެންސް ފޯސް ބްރިގޭޑިއަރ ޖެނެރަލް އަބްދުއްރަހީމް އަބްދުއްލަތީފް ވިދާޅުވެއްޖެއެވެ.
އެމްއެންޑީއެފްއިން ބޭއްވި ނޫސްވެރިންގެ ބައްދަލުވުމުގައި ރާޑަރ ސިސްޓަމުތަކުގެ މުހިންމުކަމަށް އަލިއަޅުވައި ވާހަކަ ދައްކަވަމުން ވައިސް ޗީފް އޮފް ޑިފެންސް ފޯރސް ވިދާޅުވީ، ނޮވެމްބަރު 3ގެ އުދުވާނީ ހަމަލާއިން އެތައް އިބްރަތްތަކެއް ހާސިލްވިކަމަށެވެ. ގޮނޑުދޮށަށް ބޯޓުފަހަރު ވަނީ އެނގުމަކާއި ނުލައި ކަން ފާހަގަކޮށް އޭނާ ވިދާޅުވީ އެފަދަ ކަމެއް ތަކުރާރު ވިޔަ ނުދިނުމަށް ރާއްޖޭގެ ސަރަހައްދަށް ވަންނަ އުޅަނދު ފަހު ދެނެގަނެވޭނެ އިންތިޒާމް ހަމަޖެއްސުމުގެ މުހިންމަން އިހްސާސްކުރެވި، އެ މަސައްކަތް ފެށިގެން ދިޔަކަމަށެވެ.
އެގޮތުން، އިންޑިއާ ސަރުކާރުން އެހީތެރިކަން ފޯރުކޮށްދީ ރާޑަރ ސިސްޓަމެއް އައްޑު އަތޮޅުގައި ގާއިމުކުރެވުނުއިރު އެމަސައްކަތް ފުޅާކުރުމަށް ތިން ސިސްޓަމެއް ލިބުނުކަމަށް ބްރިގޭޑިއަރ ޖެނެރަލް ވިދާޅުވިއެވެ. އަދި އޭގެ ފަހުން އިތުރު 7 ސިސްޓަމާއެކު ކުރީގައި ބެހެއްޓިފައިވާ 3 ސިސްޓަމް އަޕްގްރޭޑްކުރެވި މުޅި ރާއްޖެ ސަރަހައްދު ބަލަހައްޓައި ނިންމުމުގެ މަސައްކަތް ކުރަމުން އަންނަކަމަށް އޭނާ ވިދާޅުވިއެވެ. އަދި، އުންމީދަކީ ހުރިހާ މަސައްކަތެއް މިއަހަރުގެ ފަހުކޮޅު ނިންމާލުންކަމަށް އޭނާ ފާހަގަކުރެއްވިއެވެ.
އެންމެ ފުރަތަމައިނުން، އެއް ސިސްޓަމް އަޅުގަނޑުމެންނަށް ގާއިމްކުރެވުނީ އައްޑު އަތޮޅުގައި. އޭގެ ފަހުން 3 ސިސްޓަމެއް ލިބި އެ ތިން ސިސްޓަމް ރާއްޖޭގެ ދެކޮޅުގަޔާއި މެދުތެރޭގައި ބެހެއްޓީމު. ނަމަވެސް އޭގެ ފަހުން އިތުރު 7 ސިސްޓަމާއެކު ކުރީގައި ބެހެއްޓުނު 3 ސިިސްޓަމްވެސް އަޕްގްރޭޑް ކުރެވި ޖުމްލަ މުޅި ރާއްޖެ ކަވަރ ކުރާ ގޮތަށް 10 ރާޑަރ ސިސްޓަމް ބަހައްޓާ ނިންމުމުގެ މަސައްކަތް ކުރެވެމުން އެބަދޭ. އިރާދަކުރެއްވިއްޔާ އަޅުގަނޑުމެން އުންމީދުކުރަނީ މިއަހަރުގެ ފަހުކޮޅު މި ތިން ސިސްޓަމްގެ މަސައްކަތްވެސް އެކީގައި ނިންމާލެވޭނެ ކަމަށްޗީފް އޮފް ޑިފެންސް ފޯސް ބްރިގޭޑިއަރ ޖެނެރަލް އަބްދުއްރަހީމް އަބްދުއްލަތީފް
ބްރިގޭޑިއަރ ޖެނެރަލް ވިދާޅުވީ ރާޑަރ ސިސްޓަމާއި އެކު އޮޓޮމެޓިކް އައިޑެންޓިފިކޭޝަން ސިސްޓަމެއްވެސް ލިންކު ކުރެވިފައިވާނެކަމަށާއި އެމެރިކާ ސަރުކާރުންވެސް އެ ސިސްޓަމްތައް ގާއިމުކުރުމަށް އެހީތެރިވިކަމަށެވެ. އަދި ގާއިމްކުރެވޭ ސިސްޓަމްތައް ފުރިހަމަވެފައި ކޮމިއުނިކޭޓް ކުރެވޭނެ އިންތިޒާމްތަކާއި ސަރަހައްދު ފެންނަ ގޮތަށް 7 ކިލޯމީޓަރާއި 5 ކިލޯ މީޓަރ ފެންނަވަރުގެ ނައިޓް ވިޝަން ކެމެރާއެއް ހުންނާނެކަމަށް އޭނާ ވިދާޅުވިއެވެ. އަދި ވަގުތުން ވަގުތަށް އެ ފޮޓޯތަކާއި ވީޑިއޯތައް ހެޑްކުއާރޓަރސްއަށް ލިބޭނެކަމަށް އެމްއެންޑީއެފުން ބުނެއެވެ.
މި ވަސީލަތުގެ ސަބަބުން ގަވާއިދާއި ހިލާފަށް ރާއްޖެއަށް ވަންނަ އުޅަނދުތައް ހުއްޓުވައި ރާއްޖޭގެ ރައްޔިތުންނަށް ރައްކާތެރިކަން ފޯރުކޮށްދެވޭނެކަމަށް އެމްއެންޑީއެފުން ބުނެއެވެ.
