ރައްޔިތުންގެ މަޖިލީހުގެ ވިލާމާލޭ ދާއިރާގެ މެންބަރު އަދި އެ މަޖިލީހުގެ މެޖޯރިޓީ ލީޑަރު، އަޙުމަދު ނިޙާން ޙުސައިން މަނިކަށް އެބޭފުޅާ ތަމްޞީލުކުރައްވާ ދާއިރާގައި އެއްވެސް ތާޢީދެއް ނެތްކަމަށް، ލޯކަލް ކައުންސިލް އިންތިޚާބުގައި އެމްޑީޕީގެ ޓިކެޓުގައި އިދިކޮޅު ކޯލިޝަންގެ ފަރާތުން އެ ދާއިރާއަށް ކުރިމަތިލައްވާފައިވާ ކެނޑިޑޭޓް ޙަމްނާ ވަޙީދު ވިދާޅުވެއްޖެއެވެ.

ޙަމްނާގެ ކެމްޕެއިން ރަސްމީކޮށް ފަށައި އިދިކޮޅު ފަރާތްތަކުގެ ވިލިމާލޭ ކެމްޕެއިން ހަރުގެ ހުޅުވުމުގެ އިތުރުން ހަރުގޭގައި އެމްޑީޕީގެ ބޮޑު ދިދަ ނެގުމަށް ހޮނިހިރު ދުވަހު ބޭއްވި ރަސްމިއްޔާތަށްފަހު ރާއްޖެއެމްވީ އާއި ވާހަކަ ދައްކަވަމުން، ޙަމްނާ ވިދާޅުވީ، ވިލިމާލޭ ދާއިރާގެ މަޖިލިސް މެންބަރަކީ މިހާރު ވެރިކަން ކުރާ ޕާޓީގެ ޕާލިމެންޓްރީ ގްރޫޕުގައި ހުރި އެންމެ ބާރުގަދަ އެއް މެންބަރު ކަމަށް ވެދާނެ ކަމަށާ، ނަމަވެސް ވިލިމާލޭގައި ނިޙާންއަށް އެއްވެސް މިންވަރެއްގެ ތާޢީދެއް މިހާރު ނެތް ކަމަށެވެ.

ހަމްނާ ވިދާޅުވީ، ރައްޔިތުންގެ މަޖިލީހަށް ނިޙާން އިންތިޚާބުކޮށްދިނުމަށް އެންމެ ބޮޑަށް މަސައްކަތްކުރި ފަރާތްތައްވެސް މިއަދު ތިބީ ނިޙާން އާއި ދެކޮޅަށް ކަމަށާއި، އޭގެ މައިގަނޑު ސަބަބަކީ ދާއިރާގެ މެންބަރުގެ ގޮތުގައި ދެ ދައުރު ފުރިހަމަ ކުރައްވާއިރު، ދާއިރާއަށް އެކަށޭނަ މަސައްކަތްތަކެއް ކޮށްދެއްވިފައި ނުވުން ކަމަށެވެ.

މި ދާއިރާއަށް އެބޭފުޅާއަށް ކޮށްދެވުނު ހަމައެކަނި ޚިދުމަތަކީ ރަށުގެ ހެލްތު ސެންޓަރުގެ ނަންބޯޑު ވިލިމާލެ ހޮސްޕިޓަލަށް ބަދަލުކޮށްލެވުން ފިޔަވާ އިތުރު އެއްވެސް ކަމެއް މިދާއިރާއަށް އެބޭފުޅާ ކޮށްދެއްވާފައެއް ނެތް. ޒުވާނުންނަށްވެސް، މިރަށުގެ ސިއްޙީ ކަންތައްތައް ކުރިއެރުވުމަށްވެސް، އަދި އިޖުތިމާޢީ ކަންތައްތައް ކުރިއެރުވުމަށްވެސް، އޭގެ އިތުރުން މިރަށުގަ ކުޑަކުދިންގެ ޕާކެއް ނެތުމާ، މިރަށުގަ އެބޮތް ވަރަށް ބޮޑު ބޯޅަދަނޑެއް އެބޮތް، އެކަމު އެ ބޯޅަދަނދަކީވެސް ބޭނުންކުރެވޭ ތަނެއް ނޫން. އެހެންވީމަ އެ ހުރިހާ އިހުމާލަކީ މިއަދުގެ ސަރުކާރުގަ ހުރެ ސަރުކާރުގެ މެންބަރުގެ އިހުމާލުން މިރަށަށް ވެފަހުރި ކަންތައްތައް

ދާދިފަހުން ދެއްކެވި ވާހަކަފުޅެއްގައި، ސަރުކާރު ތަމްޞީލުކުރާ ކެނޑިޑޭޓުން ކައުންސިލްތަކަށް ހޮވިއްޖެނަމަ ކައުންސިލްތަކުގެ ބާރުތައް އިއާދަކޮށްދެއްވާނެ ކަމަށް ނިހާން ވިދާޅުވެފައިވާ ވިދާޅުވުމަށް އިޝާރާތް ކުރައްވާ ޙަމްނާ ވިދާޅުވީ، އެ ވާހަކަފުޅަކީ ވަރަށް ނާތަޙުޒީބު ވާހަކަތަކެއް ކަމަށެވެ.

ކެމްޕެއިންގެ މަސައްކަތްތައް ކުރިއަށްދާގޮތް ޙިއްސާ ކުރައްވަމުން ޙަމްނާ ވިދާޅުވީ، ވިލިމާލޭގެ ބޮޑު ބައެއްގައި މިހާރު ދޮރުން ދޮރަށް ހިނގައި ރައްޔިތުންނާއި ބައްދަލުކޮށްފައިވާނެ ކަމަށާއި، ރައްޔިތުންގެ ފަރާތުން މުޅިންވެސް އިވެނީ މިއަދުގެ ސަރުކާރާއި މެދު ހިތްހަމަނުޖެހުންކަމަށެވެ.

ހޮނިހިރުދުވަހުގެ ހަރަކާތްތަކުގައި އެމްޑިޕީގެ އިސްވެރިންނާއި އެމްޑީޕީގެ ފަރާތުން އެކި ދާއިރާތަކަށް ކުރިމަތިލައްވާފައިވާ ކެނޑިޑޭތުން ވަނީ ބައިވެރިވެވަޑައިގެންފައެވެ. މި ރަސްމިއްޔާތުގައި ވާހަކަދައްކަވަމުން، އެމްޑީޕީގެ ޗެއާޕަރސަން އަލްއުސްތާޛް ޙަސަން ލަޠީފް ވަނީ ޚާއްސަކޮށް ރައީސް މައުމޫންގެ ސަޕޯޓަރުން މިފަހަރު އެމްޑީޕީއަށް ވޯޓު ދެއްވުމަށް އެދިވަޑައިގެންފައެވެ.

އެމްޑީޕީއިން ދަނީ ރާއްޖޭގެ އެކި ކަންކޮޅުތަކުގައި ވަރަށް ފުޅާދާއިރާއެއްގައި ލޯކަލް ކައުންސިލް އިންތިޚާބަށް ތައްޔާރުވަމުންނެވެ. އެކި ފަހަރުމަތިން ލަސްކޮށްފައިވާ މި އިންތިޚާބު މިހާރު ބޭއްވުމަށް ނިންމާފައިވަނީ އަންނަ މެއި މަހުގެ 6 ވަނަ ދުވަހުއެވެ.