1993 ވަނަ އަހަރު އިންޑިއާގެ ވިޔަފާރީގެ މަރުކަޒީ ރަށް މުމްބާއީއަށް ދިން ސިލްސިލާ ހަމަލާތަކާ ގުޅިގެން އެގައުމުން ހޯދަމުންދާ ދާވޫދު އިބްރާހިމް ޕާކިސްތާނުގައި ހުރިކަން ހާމަވެއްޖެއެވެ.

ދާވޫދު އިބްރާހިމް ޕާކިސްތާނުގައި އެބަހުރި ކަމަށާއި، އޭނާ އިންޑިއާއާ ހަވާލުކުރުމަށް އިންޑިއާ އިން ބުނަމުންދާތާ އެތައް އަހަރެއްވީނަމަވެސް، ޕާކިސްތާނުން ކުރިން ބުނަމުން ދިޔައީ އޭނާ ނެތް ކަމަށެވެ. އެހެންނަމަވެސް ކަރާޗީގައި އޭނާ ހުރިކަން ފަޅާ އެރީ ޕާކިސްތާނުން މާލީ ދަތިކުރުމުގެ ފިޔަވަޅު އަޅާފައިވާ 88 ޓެރަރިސްޓުންގެ ނަން ހިމެނޭ ލިސްޓެއް ޕާކިސްތާނުން އާއްމު ކުރިއިރު، އޭގައި ދާވޫދު އިބްރާހިމްގެ ނަން އޮތުމުންނެވެ. މި 88 މީހުންނަކީ އދގެ ސަލާމަތީ މަޖިލީހުން ޓެރަރިސްޓުންގެ ގޮތުގައި ދާދިފަހުން ފާސްކޮށްފައިވާ ޖަމާއަތްތަކުގެ މީހުންނެވެ.

މީޑިއާ ރިޕޯޓްތައް ބުނާ ގޮތުން މިމީހުންގެ ބޭންކް އެކައުންޓްތައް ފްރީޒްކޮށް، އެމީހުންގެ މުދާތައް ދައުލަތަށް ނަގައި، ޕާކިސްތާނުން ބޭރަށް އެމީހުންނަށް ނުދެވޭ ގޮތަށް ވަނީ ހަދާފައެވެ.

އދގެ އެންގުންތަކާ އެއްގޮތަށް، ޓެރަރިޒަމަށް ހަރަދު ކުރުން ހުއްޓުވުމަށް ޕާކިސްތާނުން އެކަށީގެންވާ ފިޔަވަޅުތައް އަޅާފައިނުވާތީ ބައިނަލްއަގްވާމީ ފައިނޭންޝަލް އެކްޝަން ޓާސްކް ފޯސްއިން ޕާކިސްތާން އޮތީ އެތަނުގެ "ގްރޭ ލިސްޓް"ގައި ގިންތިކޮށްފައެވެ. އަދި މިއަހަރުގެ ސެޕްޓެމްބަރު މަހުގެ ނިޔަލަށް އދގެ އެންގުންތައް ތަންފީޒުނުކޮށްފިނަމަ، އީރާނާއި އުތުރު ކޮރެއާއާއެކު، ބައިނަލްއަގްވާމީ ޓެރަރިޒަމަށް ވާގިވެރިވާ ގައުމެއްގެ ގޮތުގައި ޕާކިސްތާން "ބްލެކް ލިސްޓް" ކުރާނެއެވެ. 88 މީހުންގެ ލިސްޓް ޕާކިސްތާނުން އާއްމުކުރީ އދގެ އެންގުންތަކުގެ ތެރެއިންނެވެ.