ކުރީގެ ރައީސް އަބްދުﷲ ޔާމީންގެ ވެރިކަމުގައި ސަރުކާރުގެ މުއައްސަސާތަކާއި އޮފީސްތަކުގެ އިސް ބޭފުޅުން ކޮރަޕްޝަންގެ އަމަލުތައް ހިންގަވާފަ، ގައުމުން ބޭރުގައި ދިރިއުޅުއްވި ނަމަވެސް އެމައްސަލަތައް ބަލާނެ ކަމަށް ރައްޔިތުންގެ މަޖިލީހުގެ މާލިއްޔަތު ކޮމިޓީގެ މުގައްރިރު މުހައްމަދު ނާޝިޒު ވިދާޅުވެއްޖެއެވެ.
ރާއްޖެޓީވީގެ ފަލަސުރުހީ ޕްރޮގްރާމުގައި ކިނބިދޫ ދާއިރާގެ އެމްޑީޕީގެ މެމްބަރު ނާޝިޒް ވިދާޅުވީ، ރައީސް އިބްރާހިމް މުހައްމަދު ސޯލިހުގެ ސަރުކާރު ގެނައީ އިންސާފު ހޯދައިދިނުމަށް ކަމަށެވެ. އެގޮތުން އިންސާފު ހޯދައި، ކުށްވެރިން އިންސާފުގެ ކުރިމައްޗަށް ގެނައުމަށް މިސަރުކާރުން ފަސް ނުޖެހޭނެ ކަމަށް މެމްބަރު ނާޝިޒް ވިދާޅުވިއެވެ.
މެމްބަރު ނާޝިޒް ވިދާޅުވީ އެމްއެމްޕީއާރްސީ ބޮޑު ހިޔާނާތުގެ އިތުރުން ކުރީ ސަރުކާރުގެ މުއައްސަސާތައް ހިންގުމާ ހަވާލުވެ ތިއްބެވި ބޭފުޅުންނަށް ކޮރަޕްޝަންގެ ތުހުމަތުތައް ކުރެވޭއިރު، ބައެއް ބޭފުޅުން މިހާރު ދިރިއުޅުއްވަމުން ގެންދަވަނީ ރާއްޖޭއިން ބޭރުގައި ކަމަށެވެ. އެ ބޭފުޅުން ރާއްޖެއިން ބޭރުގައި ދިރިއުޅުއްވި ނަމަވެސް މިސަރުކާރުން އެމައްސަލަތައް ބަލާ ތަހުގީގު ކުރާނެ ކަމަށް މެމްބަރު ނާޝިޒް ވިދާޅުވިއެވެ. އަދި ވިދާޅުވީ އެބޭފުޅުން ރާއްޖެއަށް ގެންނަން ޖެހިއްޖެ ހާލަތެއްގައި އެކަން ވެސް ކުރުމަށް ކުރަން ޖެހޭ މަސައްކަތްތައް މިސަރުކާރުން ކުރާނެ ކަމަށެވެ.
މީގެ އިތުރުން މެމްބަރު ނާޝިޒް ވިދާޅުވީ މިސަރުކާރުގައި ކޮރަޕްޝަންގެ އަމަލެއް ހިންގާ ކަމަށްވާނަމަ ނުވަތަ ހިޔާނާތުގެ މައްސަލައެއް އުޅޭ ކަމަށްވާނަމަ އެމައްސަލައެއް ސަރުކާރުގެ ސަމާލު ކަމަށް ގެނައުމުގެ ފުރުސަތު އެބަ އޮތް ކަމަށެވެ. މެމްބަރު ނާޝިޒް ވިދާޅުވީ މިހާރު އޮޑިޓަރ ޖެނަރަލް މަސައްކަތްތައް ކުރަމުން ގެންދަވަނީ ވަރަށް މިނިވަންކަމާއެކު ކަމަށާއި، ސަރުކާރުން ނުފޫޒު ފޯރުވުމަށް މަސައްކަތް ނުކުރާނެ ކަމަށެވެ. އަދި އެކަހަލަ ކަމަަކަށް ފުރުސަތު ވެސް ނުދޭނެ ކަމަށް މެމްބަރު ނާޝިޒް ވިދާޅުވިއެވެ.
މީގެ ކުރިން 2014 ވަނަ އަހަރުގެ 29 އޮކްޓޫބަރުގައި އެއީ އެންމެ ފުރަތަމަ އެމްއެެމްޕީއާރްސީއާ ގުޅޭ ރިޕޯޓެއް އޮޑިޓަރ ޖެނަރަލް ނެރުއްވި ދުވަސް. އެއީ އެމްޕީއެލްއާ އެމްޓީޑީސީގެ ޑޮލަރ ޓްރާންސްސެކްޝަނާ ގުޅޭ ގޮތުން. އެރިޕޯޓު ނެރުނުތާ 24 ގަޑިއިރު ނުވަނީސް 30 އޮކްޓޫބަރު 2014 ވީ ދުވަހު ގާނޫނަށް ގެނައި ބަދަލަކުން އޮޑިޓަރ ޖެނަރަލް މަގާމު ގެއްލިފައިވަނީ. އެއީ އޭރުގަ މިއެންޓިމިޑޭޓް ކުރުމަށްޓަކައި އެކަމުގެ ކަންތައްތައް ގޮސްފައި ހުރިވަރު. މިގޮތަށް އަޅުގަނޑުމެން އައިސްތިބޭއިރު ސަރުކާރާ ގުޅޭ ގޮތުން މިކަހަލަ ވާހަކަތެއް ނުދެއްކޭނެ.މަޖިލީހުގެ މާލިއްޔަތު ކޮމިޓީގެ މުގައްރިރު މުހައްމަދު ނާޝިޒު
އެމްއެމްޕީއާރްސީގެ ހިޔާނާތަށް އަލިއަޅުވާލައްވާ މެމްބަރު ނާޝިޒް ވިދާޅުވީ ތަހުގީގުތައް ކުރިއަށްދާ ކަމަށާއި، ހިޔާނާތުގައި ބައިވެރިވެފައިވާ މީހުންގެ ނަންތައް ކުރިއަށް އޮތްތަނުގައި ހާމަ ކުރާނެ ކަމަށެވެ. ނަމަވެސް ނަންތައް ހާމަކުރާނީ ވަރަށް ބޮޑަށް ހުރިހާ ކަމެއް ތަހުގީގު ކުރުމަށްފަހު ކަމަށް މެމްބަރު ނާޝިޒު ވިދާޅުވިއެވެ.
މިސާލަކަށް ސަސްޕެކްޓެއް ކަމަށްވަންޏާ ނޭމް ކުރާއިރުގަ އެމީހެއްގެ އަބުރާ އިއްޒަތަށް ވެސް ލިބޭނެ ނޭދެވޭ ކަންތައްތައް ހުންނާނެ. އެގޮތުން ބަލާފަ ނަންނަން އެހާ ބޮޑަށް އަދި އާންމު ނުކުރަނީ. އެހެން ނަމަވެސް އަދި މިހާރު އެންމެ ފަހުން ކޮމެޓީން ޕީޖީއަށް ފޮނުވައިގެން އަޅުގަނޑުމެން ހޯދި މައުލޫމާތު މިހާރު ރިޕޯޓު ޕީޖީއާ ހަމައަށް ގޮސްފައި އޮތީ. މިލޮކްޑައުންގެ ތެރޭގައި ވެސް ވަކިވަކިން ބަޔާންތައް ނެގުމާއި އަދި ފުރިހަމަ ކުރަންޖެހޭ އިޖްރާއަތްތައް ހުރެ ދައުވާ ކުރުމުގެ ކުރިއަށް. އެކަންކަން ކުރުމުގެ މަސައްކަތް އޭރު ވެސް ކުރިއަށްދާ ކަމަށް އަޅުގަނޑުމެންގެ ކޮމެޓީއަށް މައުލޫމާތު ދީފައިވަނީ. ދެން އޭގެ އިތުރުން ފަހަރަކު 20 ބޭފުޅުން އޭގެ އިތުރުން ނޫނީ ދިހަ ބޭފުޅުން ދައުވާ ކުރުމަށް ޕީޖީ ވިދާޅުވެފައިވަނީ މަސައްކަތް ކުރިއަށްދާ ކަމަށް. އަޅުގަނޑު ގަބޫލުކުރާ ގޮތުގައި އެކަން ހާސިލްވާނެ.މަޖިލީހުގެ މާލިއްޔަތު ކޮމިޓީގެ މުގައްރިރު މުހައްމަދު ނާޝިޒު
މެމްބަރު ނާޝިޒް ވިދާޅުވީ ބޮޑު މައްސަލައެއް ތަހުގީގު ކުރަމުންދާއިރު، ވަގުތު ނަގާނެ ކަމަށެވެ. އަދި މިމަަސައްކަތް ކުރުމަށް އިތުރަށް ވަގުތު ބޭނުންވާކަން ވެސް މެމްބަރު ފާހަގަކުރެއްވިއެވެ.
