މާފުށި ކައިރިން ކަނޑުމަތީ އެކްސިޑެންޓެއް ހިނގައި އެކަކަށް އަނިޔާވެއްޖެއެވެ.
މިކަމާއި ގުޅޭ މައުލޫމާތު ހިއްސާކޮށް އެމްއެންޑީއެފުން ބުނީ، މަސްވެރިކަމަށް ނިކުމެ އުޅުނު ލޯންޗަކާއި ސަޕްލައި ދޯންޏެއް އެކްސިޑެންޓެއް ހިނގައި މާލެ އޭރިއާ ކޯސްޓްގާޑުން ހަރަކާތްތެރިވަމުން އަންނަކަމަށެވެ. ހާދިސާގައި ލޯންޗްގައި ހުރި އެކެއްގެ ބޮލަށާއި ކޮނޑަށް އެކި ވަރުގެ އަނިޔާވެ އޭނާ ވަނީ މާފުށި ލޯންޗެއްގައި މާލެ ގެނެސްފައެވެ. އަދި ހާދިސާގައި ލޯންޗް ބަންޑުން ޖަހާލައިފައިވާކަމަށް އެމްއެންޑީއެފުން ވަނީ ބުނެފައެވެ.
މި ހާދިސާގެ މައުލޫމާތު އެމްއެންޑީއެފްއަށް ލިބިފައިވަނީ ބުދަ ދުވަހުގެ ހެނދުނު 6:50 ހާއިރުއެވެ. އެކްސިޑެންޓްވީ "އަލީ ޝާހް" ކިޔާ 22 ފޫޓްގެ ލޯންޗަކާއި "އިރު" ނަަމަކަށް ކިޔާ ސަޕްލައި ދޯންޏެއްކަމަށް އެމްއެންޑީއެފްއިން ވަނީ މައުލޫމާތު ދީފައެވެ.
މި ހާދިސާ ހިނގިއިރު، ސަޕްލައި ދޯނީގައި 7 މީހުން އަދި ލޯންޗްގައި 5 މީހުން ތިބިކަމަށް އެމްއެންޑީއެފުން ވަނީ ބުނެފައެވެ.
