ކޮވިޑުގެ ބަލި މީހުންނަށް ފަރުވާދޭން ރާއްޖެއަށް ބޭނުންވާ 75 ވެންޓިލޭޓަރު ގަންނަން ދުބާއީގެ ކުންފުންޏާ ހަވާލުކުރި މުއާމަލާތުގައި އެއްވެސް މިންވަރަކަށް ބައިވެރިފައި ނުވާނެ ކަމަށް ހެލްތް މިނިސްޓްރީގެ ސްޓޭޓް މިނިސްޓަރު ޑރ. ޝާހް އަބްދުﷲ މާހިރު ވިދާޅުވެއްޖެއެވެ.
ހެލްތް މިނިސްޓްރީގެ އޮޑިޓް ރިޕޯޓުގައި ހުރި މައްސަލަ ތަހުގީގުކޮށް ނިމެންދެން އެ މިނިސްޓްރީގެ ބިޑް ކޮމިޓީގެ އިތުުރުން ބައެއް އިސްވެރިން ގޭގައި މަޑުކުރަން ރައީސް އިބްރާހިމް މުހައްމަދު ސޯލިހު ވަނީ އަންގަވާފައެވެ. އޭގެ ތެރޭގައި ޝާހް ވެސް ހިމެނެއެވެ. ހޯމަ ދުވަހުގެރޭ ޓްވިޓާގައި ޝާހް އާއްމުކުރައްވާފައިވާ ބަޔާނެއްގައި ޝާހް ވިދާޅުވީ، ދުބާއި ކުންފުންޏަކަށް ވެންޓިލޭޓަރުތައް ގެންނަން ހަވާލުކުރުމުގައި، އެއްވެސް މަރުހަލާއެއްގައި، އެއްވެސް މިންވަރަކަށް ބިޑު ކޮމިޓީގެ މެންބަރެއްގެ ހައިސިއްޔަތުން އަދި އެނޫންވެސް ގޮތަކުން އޭނާ ހިމެނިފައި ނުވާނެ ކަމަށެވެ.
އަދި އެ މައުލޫމާތު ލިބުނު ހިސާބުން ކަންބޮޑުވުން ފާޅުކުރައްވާފައިވާނެ ކަމަށް ސްޓޭޓް މިނިސްޓަރު ޝާހް ވިދާޅުވިއެވެ.
ދުބާއި ކުންފުނިން 10 ވެންޓިލޭޓަރު ހެލްތް މިނިސްޓްރީ އަށް ލިބުމުން، މިނިސްޓްރީގެ ބަޔޯ މެޑިކަލް ޓީމުން އެ ވެންޓިލޭޓަރުތައް ކަމުނުދާކަމަށާއި، އެއްބަސްވުމުގައި ބުނެފައިވާގޮތާއި ހިލާފަށް ފޮނުވާފައިވާ ވެންޓިލޭޓަރުތަކެއް ކަމަށް ބުނެ، އަޅުގަނޑަށް އެތަކެތި ދައްކާ މަޢުލޫމާތު ދިނުމުން، އެ ވެންޓިލޭޓަރުތައް ބެލުމަށް ފަހު، ވެންޓިލޭޓަރުތައް އެއްވެސް ގޮތަކަށް ބަލައިގަނެވިގެން ނުވާނެކަމާއި، ޝަރުތު ހަމަނުވާކަމާއި، މިކަމުގެ ކަންބޮޑުވުންހެލްތު މިނިސްޓަރާއި ވެސް އަޅުގަނޑު ހިއްސާކޮށްފައިވާނެ ކަމުގައި ދަންނަވަމެވެ.ހެލްތް މިނިސްޓްރީގެ ސްޓޭޓް މިނިސްޓަރު ޑރ. ޝާހް އަބްދުﷲ މާހިރު
ކޮވިޑުގެ މި ދަނޑިވަޅުގައި ވެންޓިލޭޓަރުތަކާއި ގުޅިގެން ހިނގަމުންދާ ތަހުގީގު ނިމެންދެން ގޭގައިމަޑުކުރަން ރައީސް ނިންމެވި ނިންމުމާއި މެދު ހިތާމަކުރާ ކަމަށް ޝާހް ވިދާޅުވިއެވެ. ތަހުގީގަށް ފުރިިހަމަ އެއްބާރުލުން ދެއްވާނެކަމުގެ ޔަގީންކަން އޭނާ ވަނީ ދެއްވާފައެވެ.
