ޓޫރިޒަމް މިނިސްޓްރީގެ އޯޑިޓް ރިޕޯޓް އިތުރަށް ތަހުޤީޤު ކުރަން އޭސީސީއަށް ރައީސް ހުށަހަޅުއްވައިފިއެވެ.

ހޫދު ވިދާޅުވީ އެ މައްސަލަ ބަލަން އޭސީސީއަށް ރައީސް ހުށަހެޅުއްވީ މިއަދު ކަމަށެވެ. އަދި އެ މައްސަލައާއި ގުޅޭގޮތުން އެ ބޭފުޅުން ވިދާޅުވާ ގޮތެއްގެ މަތިން އަޅަންޖެހޭ ހުރިހާ ފިޔަވަޅެއް އަޅަމުން ގެންދާނެ ކަމަށެވެ.

މިކަން ރައީސްގެ ތަރުޖަމާނު ވަނީ ރާއްޖެއެމްވީއަށް ކަށަވަރު ކޮށްދެއްވާފައެވެ. ޓޫރިޒަމް މިނިސްޓްރީން ކުރި ހަރަދުތަކާ ގުޅިގެން މިދިޔަ ހަފުތާގައި ނެރުނު ކޮމްޕްލަޔަންސް އޮޑިޓްގައި ބުނެފައިވަނީ މި އަހަރުގެ ޖެނުއަރީން ފެށިގެން ޖޫން މަހުގެ ނިޔަލަށް ޓޫރިޒަމް މިނިސްޓްރީގެ ޓްރަސްޓް ފަންޑުން އެ މިނިސްޓްރީގެ މެންޑޭޓުގައި ނުހިމެނޭ ގިނަ ކަންތައްތަކަށް 26 މިލިއަން ރުފިޔާ ހޭދަކޮށްފައިވާ ކަމަށެވެ. މީގެ އިތުރުން ސަރުކާރުގައި ވަކިވަކި މުއައްސަސާތަކަކަށް މަތިކޮށްފައިވާ ބައެއް ކަންކަމަށް ޓޫރިޒަމް މިނިސްޓްރީން ހަރަދު ކުރުމަކީ މައްސަލައެއްގެ ގޮތުގައި އޮޑިޓަރ ޖެނެރަލް ފާހަގަކޮށްފައިވާ އިރު މިނިސްޓްރީން ކުރި ހަރަދުގެ 99 ޕަސެންޓަކީ އެ މިނިސްޓްރީގެ މެންޑޭޓުން ބޭރުން ކޮށްފައިވާ ހަރަދުތައް ކަމަށް ރިޕޯޓުގައިވެއެވެ. ކޮވިޑް-19 ގެ ތެރެއިން އެންމެ މައްސަލަ ބޮޑުވި ވިލިވަރުގައި ކަރަންޓީން ފެސިލިޓީއެއް ހަދަން ބިޑް ކޮމިޓީން މަސައްކަތް ހަވާލު ކުރާނެ ބައެއް ނުނިންމަނީސް، އެ މަސައްކަތް ހަވާލުކޮށް އެއްބަސްވުމުގައި ސޮއިކުރުމާއި މަހަކަށް ގެނައި މެޑިކަލް ޓީމަށް 7.9 މިލިއަން ރުފިޔާ ހަރަދުކުރުން ފަދަ ބޮޑެތި މައްސަލަތައް އެ ރިޕޯޓުގައި ފާހަގަކޮށްފައިވެއެވެ.

ކޮވިޑް-19 އާއި ގުޅިގެން ޓުއަރިޒަމް ޓްރަސްޓް ފަންޑުން ހަރަދުކުރާނެ ޖުމްލަ އަދަދެއް ކަނޑައެޅުމުގެ ކުރިން 14 މިލިއަން ރުފިޔާ ހަރަދުކޮށްފައިވާކަން މި އޮޑިޓް ރިޕޯޓުން ހާމަވެއެވެ. ޓޫރިޒަމް މިނިސްޓްރީ އިން ކޮށްފައިވާ ޚަރަދުތަކުގެ ކޮމްޕްލަޔަންސް އޮޑިޓް ރިޕޯޓު އާންމުކޮށްފައިވާ އިރު، އެ މިނިސްޓްރީ އިން އެ މުއްދަތުގައި ކުރި ހަރަދުތަކުގައި ގިނަ މައްސަލަތަކެއް ހުރިކަން އޮޑިޓަރު ޖެނެރަލް ހަސަން ޒިޔަތު ވަނީ ފާހަގަކުރައްވާފައެވެ. އޮޑިޓްގައި ބުނެފައިވަނީ ޓްރަސްޓް ފަންޑުން ކޮވިޑް-19 ގެ ޚަރަދާ ގުޅޭ ބަޖެޓެއް ފާސްކުރުމަށް ފަންޑު ކޮމިޓީގެ ވަކި ބައްދަލުވުމެއް ބާއްވާފައިނުވި ނަމަވެސް، ކޮވިޑް-19 އާ ގުޅިގެން 2 މިލިއަން ޑޮލަރު ނުވަތަ 30،840،000 ( ތިރީސް މިލިއަން އަށް ސަތޭކަ ސާޅީސް ހާސް ރުފިޔާ)އެ ފަންޑުން ޚަރަދުކުރުމަށް ފާސްކުރުމާމެދު މިނިސްޓްރީގެ ފަރާތުން ކޮމިޓީގެ މެމްބަރުންގެ ލަފައަކަށް އެދި، 2 މެއި 2020 ގައި އެ ފަރާތްތަކަށް އީމެއިލް އެއް ފޮނުވާފައިވާ ކަމަށެވެ.

ޓުއަރިޒަމް މިނިސްޓްރީން ކޮވިޑް-19އާއި ގުޅިގެން ބޮޑެތި ކޮރަޕްޝަންތަކެއް ހިންގާފައިވާ ކަމަށް އޮޑިޓް ރިޕޯޓުން ފާހަގަވެފައިވާތީ އެ ދެ ވުޒާރާއި އާއި ފިނޭންސް އަދި އޮޑިޓަރ ޖެނެރަލް ރައްޔިތުންގެ މަޖިލީހުގެ މާލިއްޔަތު ކޮމިޓީއަށް ހާޒިރުކުރުމަށް ވަނީ ނިންމާފައެވެ.