ގެސްޓްހައުސް އެސޯސިއޭޝަން އޮފް މޯލްޑިވްސް (ގޭމް) އިން ގެސްޓްހައުސްތައް ބްރޭންޑްކޮށް ޕަބްލިކް ރިލޭޝަންސް މަސައްކަތް ކޮށްދޭނެ ފަރާތެއް ހޯދަން އިއުލާން ކޮށްފިއެވެ.
ގެސްޓްހައުސްތައް ބްރޭންޑްކޮށް ޕަބްލިކް ރިލޭޝަންސް މަސައްކަތް ކޮށްދޭނެ ފަރާތެއް ހޯދުމަށް ކުރެވުނު މަޝްވަރާތަކަށްފަހު މިހާރު ޕްރޮޕޯސަލް ހުށަހަޅުމުގެ ފުރުސަތު ހުޅުވާލާފައިވާ ކަމަށް ގޭމްއިން ބުނެއެވެ.
ގޭމްއިން ބުނީ ފަތުރުވެރިކަމުގެ ސިނާއަތުގެ ތެރެއިން ގެސްޓްހައުސްތަކުގެ ވިޔަފާރި ކުރިއެރުވުމަށް ޚާއްސަ މަސައްކަތްތަކެއް ކުރާ ކަމަށެވެ. އެގޮތުން މި ސިނާއަތަށް ޚާއްސަކޮށްގެން ނެރޭ މަޖައްލާގެ އިތުރުން ބާއްވަން ހަމަޖެހިފައިވާ އެނުވަލް ކޮންފަރެންސްގެ މަސައްކަތްތައް ކުރަމުންދާ ކަމަށެވެ.
ގޭމްއަކީ ގެސްޓްހައުސްތަކުގެ ވިޔަފާރި ކުރިއަރުވައި ދިމާވާ ގޮންޖެހުންތަކަށް ހައްލު ހޯދައި ވިޔަފާރިއަށް ނުކުންނަން ބޭނުންވާ ފަރާތްތަކާއި، ދަތިތައް ދިމާވާ ފަރާތްތަކަށް މަގުދައްކައި ދިނުމަށް ހިލޭ ސާބަހަށް މަސައްކަތް ކުރާ ޖަމިއްޔާއެކެވެ. 2014 ވަނަ އަހަރު އުފެއްދި މި ޖަމިއްޔާއިން ގެސްޓްހައުސްގެ ވިޔަފާރިތައް ކުރިއެރުވުމަށް ސަރުކާރުގެ ސަމާލުކަމަށް ވެސް ގިނަ ކަންކަން ގެނެސްދެއެވެ.
