ރަޝިޔާއިން ކޮވިޑް-19 އަށް އުފައްދާ މިހާރު ބޭނުންކުރަން ފަށާފައިވާ ވެކްސިން ގަތުމަށް ވިއެޓްނާމުން ރަޖިސްޓްރީކޮށްފައިވާ ކަމަށް އެ ގައުމުގެ ހެލްތު މިނިސްޓްރީން ބުނެފިއެވެ.
ވިއެޓްނާމުގެ ސްޓޭޓް މީޑީޔާއިން ހުކުރު ދުވަހު ރިޕޯޓްކޮށްފައިވާ ގޮތުގައި ރަޝިޔާގެ ވެކްސިން ގަތުމަށް ރަޖިސްޓްރީ ކުރިނަމަވެސް ވިއެޓްނާމުގެ އަމިއްލަ ވެކްސިނެއް އުފެއްދުމަށް ކުރާ މަސައްކަތްތައް ކުރިޔަށް ގެންދާނެއެވެ. ވިއެޓްނާމުގައި ކޮވިޑް ކޭސްއެއް ރިޕޯޓްނުކުރާތާ ދުވަސްތަކެއް ވަނީ ވެފައެވެ.
މިހާތަނަށް އައިއިރު ވިއެޓްނާމުން 911 މީހަކަށް ކޮވިޑް-19 ޖެހިފައިވާއިރު ވައިރަސް ޖެހިގެން މަރުވެފައިވާ މީހުންގެ އަދަދު އުޅެނީ 21 ގައެވެ. މިއީ އިރުމަތީ އޭޝިއާ އާއި މުޅި ދުނިޔެއަށް ބަލާލި ނަމަވެސް ވަރަށް ދަށް އަދަދެކެވެ.
ރަޝިޔާއިން ބުނެފައިވަނީ ކުރިޔަށް އޮތް ދެ ހަފްތާތެރޭގައި ފުރަތަމަ ބެޗްގެ މީހުންނަށް ވެކްސިން ދޭން ފަށާނެކަމަށެވެ. ވެކްސިން އުފެއްދުމުގެ ފަހު ޓްރެއަލް ކުރުކޮށްލުމަށްފަހު ރަޝިޔާއިން ވެކްސިން ރަޖިސްޓްރީކޮށް އިންސާނުންނަށް ދޭން ފެށުމާއެކު، ބައެއް މާހިރުން ވަނީ ކަންބޮޑުވުން ފާޅުކޮށްފައެވެ. ރަޝިޔާއިން ބުނެފައިވަނީ އޮކްޓޯބަރު މަހު ތެރޭގައި ރަޝިޔާގެ މުޅި އާބާދީއަށް ވެކްސިން ދިނުމުގެ ޕްރޮގްރާމެއް ފަށާނެކަމަށެވެ.
