ހެލްތު މިނިސްޓްރީގެ ޕާމަނަންޓް ސެކްރެޓަރީގެ މަގާމަށް އާއިޝަތު ސާމިޔާ ހަމަޖައްސައިފި އެވެ.

ހެލްތު މިނިސްޓްރީގެ ޕީއެސްގެ މަގާމަށް ބޭފުޅަކު މިހަމަޖެއްސީ އެމަގާމުގައި ކުރިން ހުންނެވި ޚަދީޖާ އަބްދުއްސަމަދު މަގާމުން ވަކިކުރެއްވުމުންނެވެ. ޚަދީޖާ ވަކިކުރައްވާފައިވަނީ މިއަހަރުގެ ފެބްރުއަރީ މަހު އެވެ. ޚަދީޖާ ވަކި ކޮށްފައިވަނީ އޭނާއާ ބެހޭ ގޮތުން އަމިއްލަ ފަރާތަކުން އެ ކޮމިޝަނަށް ހުށައެޅި މައްސަލަ އެއް ބެލުމަށް ފަހުއެވެ.

އެ މިނިސްޓްރީގެ ސިވިލް ސާވަންޓުންގެ ކަންކަން ބަލަހައްޓާ އެންމެ އިސްވެރިއަކަށް ސާމިޔާ އައްޔަންކުރިކަން ހެލްތު މިނިސްޓްރީން ވަނީ ހާމަކޮށްފަ އެވެ. އެ މަގާމަށް އައްޔަނުކުރުމާ ހަމައަށް، ސާމިޔާ ހުންނެވީ ހެލްތު މިނިސްޓްރީގެ ޕޮލިސީ އަދި އިންޓަނޭޝަނަލް ހެލްތު ސެކްޝަންގެ ޑެޕިއުޓީ ޑިރެކްޓަރ ޖެނެރަލްގެ މަގާމުގަ އެވެ.

ސިއްހަތާ ބެހޭ ދާއިރާގައި ސާމިޔާ 21 އަހަރު މަސައްކަތް ކުރައްވާފައިވާއިރު ސާމިޔާ ވަނީ އޮސްޓްރޭލިއާގެ ކާޓިން ޔުނިވާސިޓީން ހެލްތު އިންފޮމޭޝަން މެނޭޖްމަންޓުގެ ދާއިރާއިން ބެޗެލާސް ޑިގްރީ، އަދި ކެނެޑާގެ ޑެލްހުޒީ ޔުނިވާސިޓީން ހެލްތު ސާވިސް އެޑްމިނިސްޓްރޭޝަނުން މާސްޓާސް ޑިގްރީ ހާސިލުކުރައްވާފައެވެ.

މީގެކުރިން އިންދިރާ ގާންދީ މެމޯރިއަލް ހޮސްޕިޓަލުގެ އެކިއެކި މަގާމުތަކުގައި މަސައްކަތް ކުރެއްވި ސާމިޔާ ހެލްތު މިނިސްޓްރީއާ ގުޅިވަޑައިގަތީ 2017 ވަނަ އަހަރުއެވެ. ސާމިޔާއަކީ 2010 ވަނަ އަހަރުން ފެށިގެން ނޭޝަނަލް ހެލްތު ރިސާޗް ކައުންސިލުގެ މެމްބަރެއްވެސް މެއެވެ.

މީގެ އިތުރުން ސާމިޔާއަކީ ވިލާ ކޮލެޖުގައި ޕަބްލިކް ހެލްތު ދާއިރާއިން ހިންގާ މާސްޓާސް ޑިގްރީ ކޯހުގެ ލެކްޗަރަރެއްގެ އިތުރުން ޔޯގާ އިންސްޓްރަކްޓަރެކެވެ.