ކޮވިޑް-19ގެ ވައިރަސްގެ އަސަރު ކުޑަކުދިންނަށް ނުކުރާކަމަށް ވިދާޅުވުމުން ފޭސްބުކް އިން އެމެރިކާގެ ރައީސް ޑޮނާލްޑް ޓްރަމްޕްގެ ޕޯސްޓެއް ފުރަތަމަ ފަހަރަށް ޑިލީޓްކޮށްލައިފިއެވެ.

ފޭސްބުކް އިން މި ޕޯސްޓް ޑިލީޓްކޮށްފައިވަނީ ކޮވިޑާއި ގުޅިގެން ސައްހަ ނޫން މައުލޫމާތުތައް ފަތުރާ، ފޭސްބުކްގެ ޕޮލިސީއާ ހިލާފުވި ކަަމަށް ބުނެއެވެ.

ޓްރަމްޕް ކުރެއްވި ޕޯސްޓުގައި ވަނީ ފޮކްސް ނިއުސްގެ ވީޑިއޯއެެއް ޝެއަރ ކުރައްވާ، ކޮވިޑް-19 ގެ ވައިރަސްގެ އަސަރު ކުޑަކުދިންނަށް ނުކުރާ ކަމަށް ވިދާޅުވެފައެވެ.

ފޭސްބުކް އިން އެމެރިކާގެ ރައީސް ޑޮނާލްޑް ޓްރަމްޕްގެ ޕޯސްޓެއް ފުރަތަމަ ފަހަރަށް ޑިލީޓް ކޮށްފައިވާއިރު ޓްރަމްޕް ވަނީ މިގޮތަށް ވިދާޅުވެ، ޓުވިޓަރގައި ވެސް މި ވީޑިއޯ ޝެއަރ ކުރައްވާފައެވެ.

ޓުވިޓަރ އިން ވެސް ވަނީ ޓްރަމްޕްގެ ކެމްޕެއިން ޓީމްގެ އެކައުންޓް ވަގުތީ ގޮތުން ވީޑިއޯ ނަގަންދެން ބްލޮކް ކޮށްފައެވެ. ބުދަ ދުވަހު ޓުވިޓަރ އިން ނެރުނު ބަޔާނެއްގައި ބުނެފައިވަނީ ކޮވިޑް-19 އާ ގުޅިގެން ސައްހަ ނޫން މައުލޫމާތު ފަތުރާ، ޓުވިޓަރގެ އުސޫލުތަކާއި ހިލާފުވެފައިވާ ކަަމަށެވެ.

ކޮވިޑް-19 އާ ގުޅިގެން އެމެރިކާ އިން އަޅަމުންދާ ފިޔަވަޅުތަކަށް ގިނަ ބަޔެއްގެ ފާޑުކިޔުން ވަނީ އަމާޒުވެފައެވެ. ތަފާސް ހިސާބުތައް ދައްކާ ގޮތުގައި އަދިވެސް ވައިރަސް ޖެހިގެން އެންމެ ގިނައިން ރިޕޯޓްކޮށްފައިވަނީ އެމެރިކާ އިންނެވެ. އަދި ވައިރަސްގައި މިހާތަނަށް އެންމެ ގިނަ މީހުން މަރުވެފައި ވެސް ވަނީ އެ ޤައުމުންނެވެ. އެހެންނަމަވެސް އެމެރިކާގެ ރައީސް ވިދާޅުވަނީ އެ ޤައުމުގެ ހާލަތު "ކޮންޓްރޯލް" ކުރެވިފައިވާ ކަމަށެވެ. އަދި ވައިރަސްއަށް މީހުން ޓެސްޓު ކުރާކަމަށްވާނަމަ ޕޮޒިޓިވްވާ މީހުންގެ އަދަދު އިތުރުވާނެ ކަމަށް ވެސް އެމަނިކުފާނު ވިދާޅުވިއެވެ.

އެމެރިކާގައި ކޮވިޑް-19 އަށް ޓެސްޓް ކުރެވޭ ނިސްބަތް ވަނީ ފާއިތުވި ހަފްތާގައި 6 އިންސައްތަ ދަށަށް ޖެހިލާފައެވެ. މިއީ މެއި މަހުގެ ފަހުން ޓެސްޓް ކުރެވޭ ނިސްބަތް ދަށަށްދިޔަ ފުރަތަމަ ފަހަރެވެ. ޓެސްޓް ކުރެވޭ ނިސްބަތުގެ 8.2 އިންސައްތަ ޓެސްޓް ޕޮޒިޓިވްކަމަށް ދައްކައެވެ. ދުނިޔޭގެ ސިއްހަތު ޖަމިއްޔާ (ޑަބްލިޔުއެޗްއޯ) އިން ކަނޑައަޅާފައިވާ ނިސްބަތަކީ ޓެސްޓް ކުރެވޭ ނިސްބަތުގެ 5 އިންސައްތަ އެންމެ މަދުވެގެން ޕޮޒިޓިވްވުމެވެ.

އެއަށްވުރެ ގިނައިން ޕޮޒިޓިވްވާނަމަ އޭގެ މާނައަކީ އެ ތަނެއްގެ ތެރޭގައި ގިނަ ބަޔެއްގެ ތެރޭގައި ވައިރަސް ފެތުރި އެކަން އަދި ދެނެގަނެވިފައިނުވާ ކަމަށް ކަމަށް ޑަބްލިޔުއެޗްއޯއިން ވަނީ ކަނޑައަޅާފައެވެ. އެމެރިކާގެ 33 ސްޓޭޓެއްގައި ޓެސްޓް ކުރެވޭ ނިސްބަތުގެ 5 އިންސައްތައަށްވުރެ ގިނައިން ޕޮޒިޓިވް ކަމަށް ދައްކައެވެ.