އޯގަސްޓް 04ން އޯގަސްޓް 6 ވަނަ ދުވަހުގެ ނިޔަލަށް ސަރުކާރު ބަންދުވިޔަސް އެކްސްޕެޓް އޮންލައިން ސިސްޓަމް މެދުވެރިކޮށް އެކޮނޮމިކް މިނިސްޓްރީން ދެމުން ގެންދާ ޚިދުމަތްތައް ކޮންމެ ދުވަހަކުވެސް ދެމުން ގެންދާނެ ކަމަށް އެމިނިސްޓްރީން ބުނެފި އެވެ.

މިކަމާއި ގުޅިގެން އިކޮނޮމިކް މިނިސްޓްރީން ކޮށްފައިވާ ޓްވީޓެއްގައި ބުނެފައިވަނީ އެސިސްޓަމް މެދުވެރިކޮށް މިނިސްޓްރީން ދެމުންދާ ޙިދުމަތްތަކަށް ކޮންމެ ދުވަހަކު 10:00 އިން 14:00 އަށް އެޕްލިކޭޝަން ހުށަހެޅުމުގެ އިންތިޒާމް ހަމަޖެހިފައިވާ ކަމަށެވެ.

އެކްސްޕެޓް އޮންލައިން ސިސްޓަމްގެ ޚިދުމަތަކީ ބިދޭސިން ގެނައުމަށް ކުރަންޖެހޭ ރެޖިސްޓްރޭޝަން މަސައްކަތް ކުރާ ސިސްޓަމެކެވެ. އެގޮތުން މިސިސްޓަމްގެ ތެރެއިން ބިދޭސީ މީހުން ގެނައުމުގެ ގޮތުން އެކްސްޕެޓް ސިސްޓަމް ގައި ރަޖިސްޓްރީ ކޮށް އޮންލައިން އެޕްލިކޭޝަން ހުށައަޅައި އަދި ކޯޓާ އާއި އެންޕްލޮއިމަންޓް އެޕްރޫވަލް އަށް އެޕްލައި ކުރެވޭނެ އެވެ.

މީގެއިތުރުން ރާއްޖޭގައި ގަވާއިދާ ހިލާފަށް އުޅޭ ބިދޭސީން ގަވާއިދުގެ ތެރެއަށް ވެއްދުމަށް "އެކްސްޕެޓް އޮންލައިން ސިސްޓަމް" މެދުވެރިކޮށް ހުށަހެޅުމުން ރަޖިސްޓްރީކުރުމުގެ ކަންކަން އޮންލައިންކޮށް ކުރިޔަށް ގެންދެވޭނެ އެވެ.