ގައުމަށް އަނބުރާ ދާން ބޭނުންވެގެން ހުށައެޅި ބިދޭސީންގެ ތެރެއިން، ވަޒީފާގެ މައުލޫމާތު ކަށަވަރުނުވާ ބައެއް ބިދޭސީންގެ މައުލޫމާތު ހިއްސާކޮށްދޭން އިކޮނޮމިކް މިނިސްޓްރިން އެދިއްޖެއެވެ.
އަންގާރަ ދުވަހު އެ މިނިސްޓްރީން އާއްމުކޮށްފައިވާ ބަޔާނެއްގައި ބުނީ، ގަވާއިދާ ހިލާފަށް، ރާއްޖޭގައި މަސައްކަތް ކުރަމުންދާ ބަންގްލަދޭޝަށް ނިސްބަތްވާ ބިދޭސީންގެ ތެރެއިން ގައުމަށް އެނބުރި ދާން ބޭނުންވާ ފަރާތްތައް ގައުމަށް ފޮނުވައި ދިނުމަށްޓަކައި ބަންގްލަދޭޝް ސަރުކާރާއި ދިވެހި ސަރުކާރު ގުޅިގެން ހިންގަމުންދާ "ވޮލަންޓްރީ ރެޕަޓްރިއޭޝަން" ޕްރޮގްރާމްގެ ދަށުން ގައުމަށް އެނބުރި ދިޔުމަށް އެދި ސައްހަ އެމްޕްލޯއިމަންޓް އެޕްރޫވަލް އެއްގައި ތިބި ގިނަ ބިދޭސީން ހުށައަޅަމުން އަންނަ ކަމަށެވެ.
އިކޮނޮމިކް މިނިސްޓްރީން ވަނީ ދާން ބޭނުންވެގެން ހުށައަޅާފައިވާ 251 ބިދޭސީންގެ ލިސްޓު އާއްމުކޮށްފައެވެ. މިނިސްޓްރީން ބުނީ، ގައުމަށް އެނބުރި ދިޔުމަށް އެދި ހުށަހަޅަމުން ދަނީ، ސައްޙހަ އެމްޕްލޯއިމެންޓް އެޕްރޫވަލްއެއްގައި ތިބި ނަމަވެސް އެ ފަރާތްތަކަކީ އެމްޕްލޯއިމެންޓް އެޕްރޫވަލް ދޫކުރެވިފައިވާ ވަޒީފާ ދޭ ފަރާތްތަކުގެ ވަޒީފާތަކުގައި މަސައްކަތްކުރަމުންދާ ފަރާތްތަކެއް ނޫން ކަމުގައި ބަޔާންކޮށް ކަމަށެވެ.
އެހެންކަމުން ލިސްޓްގައި ހިމެނޭ ފަރާތްތަކަކީ އެމްޕްލޯއިމެންޓް އެޕްރޫވަލް ދޫކުރެވިފައިވާ ވަޒީފާ ދޭ ފަރާތުގެ ވަޒީފާގައި މަސައްކަތްކުރަމުންދާ ފަރާތްތަކެއް ކަމުގައިވާނަމަ، އޮގަސްޓު މަހުގެ ފަހެއްގެ ކުރިން އީމެއިލް މެދުވެރިކޮށް[email protected]ހުށަހެޅުމަށް މިނިސްޓްރީން އެދިފައެވެ.
އީމެއިލްގައި ބިދޭސީ ފަރާތުގެ ފުރިހަމަ ނަމާއި، ޕާސްޕޯޓު ނަންބަރާއި އަދި ވަޒީފާދޭ ފަރާތުގެ މައުލޫމާތު ހިމެނުމަށް އިކޮނޮމިކް މިނިސްޓްރީން އެދެއެވެ.
