ދިވެހިރާއްޖޭގެ ތަރައްގީއަށް ހިންގޭ މަޝްރޫއުތަކުން ބޭރުގެ ގައުމުތަކަށް ބަރޯސާވެފައިވާ މިންވަރު ކުޑަކުރެވިގެންދާ ކަމަށް ހޯރަފުށި ދާއިރާގެ މެމްބަރު އަހުމަދު ސަލީމް ވިދާޅުވެއްޖެއެވެ.
މި މޭރުމުން މެމްބަރު ސަލީމް ވާހަކަ ދެއްކެވީ އިންޑިއާ ސަރުކާރުގެ އެހީއާއެކު ކުރިއަށް ގެންދާ ''ހައި އިމްޕެކްޓް ކޮމިއުނިޓީ ޑިވެލޮޕްމެންޓް ސްކީމް'' ގެ ދަށުން ހިންގާ މަޝްރޫއުތަކުގެ ފައިސާ ހަވާލުކުރި ރަސްމިއްޔާތުގައެވެ.
މެމްބަރު ސަލީމް ވިދާޅުވީ ކޮވިޑް-19 ގެ ހާލަތުގައި މިގައުމު ބޭރު ދުނިޔެއަށް ބަރޯސާވެފަވާ މިންވަރު ހާމަވެގެންދިޔަ ކަމަށެވެ. ނަމަވެސް އަމިއްލަ ފައިމައްޗަށް ތެދުވުމަށް މިކުރެވޭ މަސައްކަތްތައް ކާމިޔާބުވާނެކަން ފާހަގަކުރައްވައި މެމްބަރު ސަލީމް ވިދާޅުވީ އެންމެ އަސާސީ ކަންތައްތަކުން ފެށިގެން އެންމެ މުހިންމު އަދި ބޮޑެތި ކަންތައްތަކާ ހަމައަށް ވެސް ރާއްޖެ އޮތީ ބޭރުގެ ގައުމުތަކަށް ބަރޯސާވެފައި ކަމަށެވެ. އެގޮތުން ބޯފެން އުފެއްދުމަށް ވެސް ބޭރުގެ ގައުމަށް ބަރޯސާވެފައިވާކަން މެމްބަރު ސަލީމް ފާހަގަކުރެއްވިއެވެ.
މެމްބަރު ސަލީމް ވިދާޅުވީ އިންޑިއާގެ އެހީއާއެކު މިފެށިގެންދާ މަޝްރޫއުތަކަކީ ވަރަށް އުންމީދީ ވަރަށް ބޭނުންތެރި މަޝްރޫއުތަކެއް ކަމަށެވެ. އައްޑޫ ސިޓީގައި އަދި ހއ. ހޯރަފުށީގައި މިފެށޭ ހައި އިމްޕެކްޓް ކޮމިއުނިޓީ ޕްރޮޖެކްޓްތަކުގެ ސަބަބުން މިއަދު ގެއްލިފައި މިވާ އުންމީދު މާދަމާ އެތައް ތަނަކުން އާލާވެ އާރޯ ވެގެންދާ ކަމަށް މެމްބަރު ސަލީމް ވިދާޅުވިއެވެ. އަދި ވިދާޅުވީ ވަޒީފާގެ ފުރުސަތުތަކާއި އިގްތިސާދީ ފުރުސަތާއި، އާމްދަނީ ލިބުން އިތުރުވެގެންދާނެ ކަމަށާއި، ބޭރުގެ ގައުމުތަކަށް ބަރޯސާވުން ކުޑަވެގެންދާ ކަމަށެވެ.
މީގެ އިތުރުން މެމްބަރު ސަލީމް ވިދާޅުވީ ކޮވިޑް-19އާ ގުޅިގެން އިގްތިސާދު އަޑިއަޅާލާފައިވާ މިދަނޑުވަޅުގައި އެންމެ މުހިންމު އެއްކަމަކީ ރައްޔިތުންނަށް އުންމިދު ގެނެސްދިނުން ކަމަށާއި، ރައްޔިތުންނަށް މާދަމާގެ އުފާވެރިކަމުގެ އިޝާރާތްތައް މިއަދު ގެނެސްދިނުން ކަމަށެވެ.
ހަގީގަތަކީ ދިވެހިރާއްޖެ ބައްޓަން ވެފައި އޮތީ 24 ގަޑިއިރުގެ ތެރޭގައި ފެއިލްވާ ގޮތަށް. މިވޭތުވެދިޔަ ހުރިހާ ސަރުކާރުތަކުން ރާއްޖޭގެ އިގްތިސާދު ރާއްޖޭގެ ސިޔާސަތު ބައްޓަން ވެފައި އޮތީ ބޭރުގެ އެހީއާ ނުލާ 24 ގަޑިއިރުގެ ތެރޭގައި ގައުމު ފެއިލްވާ ގޮތަށް. އެހެން އޮއްވާ އަޅުގަނޑުމެންނަށް ވިސްނާނުލާ ތިއްބާ މިހާ ބޮޑު ކަމެއް ކުރިމަތިވެގެން އައި ވަގުތު ހުށިޔާރު ޓީމެއް ދިވެހިރާއްޖޭގެ ހުންގާނުގައި އޮތްކަން އެއީ އަޅުގަނޑުމެންގެ ނަސީބަކީ. އަޅުގަނޑުމެންގެ ޚާރިޖީ ވަޒީރު، އަޅުގަނޑުމެންގެ އިއްޒަތްތެރި ރައީސުލްޖުމްހޫރިއްޔާ އަޅުގަނޑުމެންގެ ކެބިނެޓްގެ އެހެންވަޒީރުން ވަރަށް ހުށިޔާރު ކަމާއި ސަމާލުކަމާއެކު ތެދުވެރިކަމާއި އަމާނަތްތެރިކަމާއެކު ރައްޔިތުންނަށް ޚިދުމަތް ކުރައްވަން ފެއްޓެވި. އޭގެ ނަތީޖާ އެހާ ބޮޑަށް ބޭރު ދުނިޔެއަށް ބަރޯސާވެފައިވާ ގައުމެއް މިހާ އަމާންކޮށް އޮމާކޮށް ނިސްބަތުން ރަނގަޅަށް މިގެންދަވަނީ.ހޯރަފުށި ދާއިރާގެ މެމްބަރު އަހުމަދު ސަލީމް
ޚާރިޖީ ވަޒީރު އަބްދުﷲ ޝާހިދުގެ މަސައްކަތްތަކަށް ވަރަށް ބޮޑަށް ތައުރީފް ކުރައްވާ މެމްބަރު ސަލީމް ވިދާޅުވީ ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ދެއްވާ އިރުޝާދުގެ ދަށުން ޚާރިޖީ ވަޒީރު ދުނިޔޭއަށް ނަމޫނާ ދައްކާފައިވާ ކަމަށެވެ. ފާއިތުވާ ކޮންމެ 24 ގަޑިއިރަކުން ކުރައްވަމުން ގެންދަވާ މަސައްކަތްތައް މީޑިއާއަށް ބަލާލިކަމުގައި ވިޔަސް ފެނިގެންދާކަން މެމްބަރު ސަލީމް ފާހަގަކުރެއްވިއެވެ.
