އޮސްޓްރޭލިއާ ސަރުކާރުގެ ހިލޭއެހީގެ ދަށުން ޕަރސަނަލް ޕްރޮޓެކްޓިވް އިކުއިޕްމަންޓް (ޕީ.ޕީ.އީ) ރާއްޖެއަށް ހަދިޔާ ކޮށްފިއެވެ.

އަންގާރަ ދުވަހު މިތަކެތި ހަވާލުކޮށްދެއްވީ އޮސްޓްރޭލިއާ ސަރުކާރުގެ ފަރާތުން ރާއްޖެއަށް ކަނޑައަޅުއްވާފައި ހުންނަވާ ހައިކޮމިޝަނަރު، ހިޒް އެކްސެލެންސީ ޑޭވިޑް ހޮލީ އާއި ޑިފެންސް އެޑްވައިޒަރު ގްރޫޕް ކެޕްޓަން ޝޯން އަންވިން އެވެ.

ރާއްޖޭގެ ފަރާތުން މި ތަކެއްޗާއި ޙަވާލުވެލެއްވީ ސްރީލަންކާގައި އަށް ދިވެހިރާއްޖެއިން ކަނޑައަޅުއްވާފައި ހުންނަވާ ހައިކޮމިޝަނަރު، އުމަރު އަބްދުއްރައްޒާގު އާއި ސްރީލަންކާއަށް ކަނޑައަޅުއްވާފައި ހުންނަވާ ޑިފެންސް އެޑްވައިޒަރު، ލެފްޓިނެންޓް ކާނަލް އިސްމާއީލް ނަސީރެވެ.

މި ރަސްމިއްޔާތުގައި ރާއްޖެއަކީ އޮސްޓްރޭލިއާގެ ޒަމާންވީ ރަޙުމަތްތެރިއެއްކަމާއި، ކޮވިޑް-19 އާއިގުޅިގެން ރާއްޖެއަށް ދިމާވާ ދަތިތަކަށް ޙައްލު ހޯދައިދިނުމުގައި ރާއްޖެއާއެކު ދެމިތިބޭނެކަމާއި، އަދި ކޮވިޑް-19 އާއި ގުޅިގެން ރާއްޖޭގެ ފޮރޮންޓްލައިންގައި މަސައްކަތްކުރާ ފަރާތްތައް ބޭނުންކުރުމަށް މިފަދަ އެހީއެއް ދެވުނުކަމަށްޓަކައި އުފާ ކުރާ ކަމަށް ހައިކޮމިޝަނަރު ޑޭވިޑް ހޮލީ ވިދާޅުވިއެވެ.

އޮސްޓްރޭލިއާގެ ފަރާތުން ރާއްޖެއާއި ދެމެދުގައިވާ ބަހައްޓާ ގާތްގުޅުމަށާއި އަދި ކޮވިޑް 19 އާއި ދެކޮޅަށް ރާއްޖެއިން ކުރަމުންދާ މަސައްކަތުގައި އޮސްޓްރޭލިއާގެ އަސްކަރިއްޔާގެ ފަރާތުން މޯލްޑިވްސް ނޭޝަނަލް ޑިފެންސް ފޯސް އަށް ދެއްވި ދީލަތި އެހީތެރިކަމަށްޓަކައި، ރާއްޖެއިން ސްރީލަންކާއަށް ކަނޑައަޅުއްވާފައިވާ ހައިކޮމިޝަނަރު އުމަރު އަބްދުއްރައްޒާގު ދިވެހި ސަރުކާރުގެ ނަމުގައި އޮސްޓްރޭލިއާގެ އަސްކަރިއްޔާ އަށާއި އަދި އޮސްޓްރޭލިއާ ސަރުކާރަށް ޝުކުރު އަދާ ކުރެއްވިއެވެ.

އޮސްޓްރޭލިއާ ސަރުކާރުގެ ފަރާތުން ހަދިޔާކުރެވުނު ޖުމްލަ 120,000 އެމެރިކާ ޑޮލަރުގެ އަގުހުރި ޕީޕީއީގެ ތެރޭގައި، ސްރީލަންކާގައި ހުންނަ އޮސްޓްރޭލިއާގެ ކުންފުންޏެއް ކަމުގައިވާ އަންސެލް އިން އުފައްދާފައިވާ ފެންވަރު ރަނގަޅު 12000 އޯވަރއޯލް އާއި 200,000 އަންގި ހިމެނެއެވެ. މިތަކެތީގެ ސަބަބުން ކޮވިޑް-19 ގެ ނުރައްކާ ކުޑަކުރުމަށް ކުރެވޭ މަސައްކަތަށް ލިބޭނެ އިތުރު ލުއިފަސޭހައެކެވެ.

އިންޑިއާ ކަނޑުގެ އެކުވެރިއެއްގެ ހައިސިއްޔަތުން، އޮސްޓްރޭލިއާ އާއި ރާއްޖެއަކީ ޒަމާނުއްސުރެ ގާތް ގުޅުމެއް ހިއްސާކުރަމުންދާ ދެ ގައުމެވެ.