ފީފާގެ ގަވާއިދުގެ ތެރެއިން ހުއްދަ ލިބިއްޖެނަމަ ޗައިނާގެ ގައުމީ ފުޓްބޯޅަ ޓީމަށް ކުޅެން ތައްޔާރަށްހުރި ކަމަށް ބްރެޒިލްގެ ގައުމީ ޓީމަށް ކުޅެދީފައިވާ އޮސްކާ ބުނެފިއެވެ.
ފީފާގެ ގަވާއިދު މިހާރު އޮތްގޮތުންނަމަ އޮސްކާއަށް ޗައިނާގެ ގައުމީ ޓީމަށް ކުޅެވޭނެ ޖާގައެއް ނެތެވެ. ފީފާ ގަވާއިދު ބުނާ ގޮތުންނަމަ ފީފާގެ ބޮޑު މުބާރާތެއްގައި ގައުމީ ޓީމު ތަމްސީލުކޮށްފިނަމަ، އެހެން ގައުމެއްގެ ގައުމީ ޓީމަށް ނުކުޅެވޭނެއެވެ. އޮސްކާ ވަނީ 2014 ވަނަ އަހަރު ބްރެޒިލްގެ ގައުމީ ފުޓްބޯޅަ ޓީމާއެކު ފީފާ ވޯލްޑް ކަޕްގައި ކުޅެފައެވެ.
ޗައިނީސް ސުޕަ ލީގުގެ ޝަންހާއީ އެސްއައިޕީޖީއަށް ކުޅެމުން އަންނަ އޮސްކާ ބުނީ ފީފާގެ ގަވާއިދުގެ ތެރެއިން ޗައިނާގެ ގައުމީ ޓީމަށް ކުޅެން ފުރުސަތު ލިބިއްޖެނަމަ އޭނާ އެ ފުރުސަތުގެ ބޭނުން ހިފާނެ ކަމަށާއި، ސަބަބަކީ ބްރެޒިލްގެ ސްކޮޑް މިހާރު އޮތް ގޮތުންނަމަ އަލުން ބްރެޒިލްގެ ޓީމުން ޖާގަ ހޯދުން އެއީ އުނދަގޫ ކަމަކަށް ވުމުން ކަމަށެވެ.
އޮސްކާ އިތުރަށް ބުނީ ޗައިނާގެ ގައުމީ ޓީމަށް މޮޅު މިޑްފިލްޑަރަކު ބޭނުންވާ ކަމަށާއި، ޗައިނާގެ ގައުމީ ފުތްބޯޅަ ޓީމުގެ މެދުތެރޢގައި އޭނާގެ ބޭނުން ވަރަށް ރަނގަޅަށް ހިފޭނެ ކަމަށެވެ.
ޗެލްސީ ދޫކޮށް އޮސްކާ ޗައިނާގެ ޝަންހާއީ އެސްއައިޕީޖީއަށް ބަދަލުވީ 2017 ވަނަ އަހަރުގައެވެ. ބްރެޒިލްގެ ގައުމީ ޓީމަށް 48 މެޗު ކުޅެދިން އޮސްކާ އެންމެ ފަހުން ބްރެޒިލްގެ ޓީމާއެކު ފެނިގެންދިޔައީ 2015 ވަނަ އަހަރުގައެވެ. އޭގެ ފަހުން ބްރެޒިލްގެ ގައުމީ ޓީމުން އޭނާއަށް ފުރުސަތެއް ނުލިބެއެވެ.
