ކޯލިޝަން ރޫޅިގެން ދިޔުމަށް ރައީސުލްޖުމްހޫރިއްޔާ އިބްރާހީމް ސޯލިހު އެއްވެސް ފުރުސަތެއް ނުދެއްވާ ކަމަށް ހޯމް މިނިސްޓަރު ޝެއިހް އިމްރާން އަބްދުﷲ ވިދާޅުވެއްޖެއެވެ.

ދިވެހިރާއްޖޭގެ މިނިވަންކަމަށް 55 އަހަރު ފުރުނު 56 ވަނަ މިނިވަން ދުވަހާއި ގުޅިގެން ރާއްޖެޓީވީގައި ކުރިއަށް ގެންދިޔަ ޚާއްސަ ލައިވް ކަވަރޭޖްގައި ޕްރޮގްރާމުގައި އާދިއްތަ ދުވަހު ވާހަކަ ދައްކަވަމުން މިނިސްޓަރު އިމްރާން ވިދާޅުވީ ކޯލިޝަންގައި ތިއްބެވި ބައެއް ބޭފުޅުން ހިޔާލު ތަފާތުވެ، ކަންކަމުގައި ތަފާތު ވިސްނުންތައް ގެންގުޅުއްވާ ކަމަށެވެ. އެހެންނަމަވެސް ކޯލިޝަން ރޫޅާލުމަށްފަހު ދިޔުމުގެ ވިސްނުމެއް އެއްވެސް ބޭފުޅަކު ގެންގުޅުއްވާ ތަން ފެނިވަޑައިނުގަންނަވާ ކަމަށެވެ.

ކޯލިޝަންގެ ވެރިޔަކަށް ހުންނަވާ ބޭފުޅަކު ވެސް ކޯލިޝަނަށް އިހްތިރާމުކޮށް އެ އެއްބަސްވެވުނު ގޮތަށް ކުރިއަށްދާން ޖެހޭނެ ކަަމަށާއި ހަމަ އެފަދައިން ކޯލިޝަންގެ ބައިވެރިން ވެސް އެއްބަސްވެވުނު ގޮތަށް ކުރިއަށްދާން ޖެހޭނެ ކަމަށް އިމްރާން ވިދާޅުވިއެވެ. އެގޮތަށް އަމަލު ކުރުމުން ވެރިކަމުގެ ނިޒާމު ނުރޫޅި، އެ ނިޒާމު ނުގެއްލި ސުލްހަވެރިކަމާއެކު ކުރިއަށްދާނެކަން މިނިސްޓަރު ފާހަގަކުރެއްވިއެވެ.

5 އަހަރުގެ ދައުރެއް ނިިންމާ ރައްޔިތުންނަށް ވައުދުވީ ކަންތައްތައް ދެމެހެއްޓުމަށްޓަކައި މަސައްކަތް ކުރުމަކީ ކޯލިޝަންގައި ހިމެނޭ އެންމެންގެ މައްޗަށް ލާޒިމުވާކަމެއް އިމްރާން ވިދާޅުވިއެެވެ.

މިނިސްޓަރު އިމްރާން މިހެން ވިދާޅުވެފައިވާއިރު ރައީސް ސޯލިހް ވެސް ވަނީ ކޯލިޝަން ދެމި އޮންނާނެ ކަމަށް ވިދާޅުވެފައެވެ.

އެގޮތުން މިދިޔަ ޖޫން މަހު ރައީސް އޮފީހުގައި އޮތް ނޫސްވެރިންގެ ބައްދަލުވުމުގައި ސަރުކާރު ކޯލިޝަންގެ މުސްތަގުބަލާ ގުޅޭގޮތުން ނޫސްވެރިޔަކު ކުރި ސުވާލަކަށް ޖަވާބު ދެއްވަމުން ރައީސް ސޯލިހް ވިދާޅުވީ، ރައްޔިތުން މި ސަރުކާރު އިންތިހާބު ކުރީ ކޯލިޝަން ސަރުކާރެއްގެ ގޮތުގައި ކަމަށާއި އެހެންކަމުން ކޯލިޝަން ދެމި އޮންނާނެ ކަމަށެވެ.

މޯލްޑިވިއަން ޑިމޮކްރޮޓިކް ޕާޓީ (އެމްޑީޕީ) އަދި މޯލްޑިވްސް ރީފޯރމް މޫވްމެންޓް (އެމްއާރުއެމް) ރައީސް މައުމޫން ޢަބްދުލް ޤައްޔޫމް ވަނީ ކޯލިޝަންގައި ދެމި ތިއްބަވާނެ ކަަމަށް މީގެ ކުރިން ވިދާޅުވެފައެވެ.

މި ސަރުކާރު އަލުން އިންތިޚާބު ވިޔަސް ދެން ވެސް އެމްއާރްއެމް އޮންނާނީ ސަރުކާރާއެކު ކަމަށް މައުމޫން ވަނީ ވިދާޅުވެފައެވެ. އަދި ރައީސް މައުމޫން ވިދާޅުވީ ރައީސްއާ އޮންނަ ގުޅުން ވަރަށް ރަނގަޅު ކަމަށާއި ރައީސް ސޯލިހަކީ އެމަނިކުފާނު ވަރަށް އިޙްތިރާމު ކުރައްވާ ބޭފުޅެއް ކަމަށެވެ.

މީގެ އިތުރުން އެމްޑީޕީގެ ޕާލިމެންޓްރީ ގްރޫޕުުގެ ލީޑަރު އަލީ އާޒިމް ރާއްޖެ.އެމްވީ އަށް ދިން ހާއްސަ އިންޓަވިއުއެއްގައި ވިދާޅުވީ ކޯލިޝަނެއްގައި މަސައްކަތް ކުރަމުން ޖެހުމުން ދަތިތަކާއި ދިމާވާ ކަމަށާއި، އެކަމަކު ކޯލިޝަން ރޫޅާލުމުގެ ވިސްނުން އެމްޑީޕީން ނުގެންގުޅޭ ކަމަށެވެ.

ސަރުކާރު ކޯލިޝަންގައި ހިމެނެނީ ވެރިކަން ހިންގާ މައި ޕާޓީ އެމްޑީޕީގެ އިތުރުން އެމްއާރުއެމް އާއި ޖުމްހޫރީ ޕާޓީ އަދި އަދާލަތު ޕާޓީއެވެ. މި ޕާޓީތަކުގެ ތެރެއިން ސަރުކާރުގައި އެމްޑީޕީގެ ހިއްސާ އަކީ 40 ޕަސެންޓެވެ. ޖުމްހޫރީ ޕާޓީ 25 ޕަސެންޓް، އަދާލަތު ޕާޓީ 15 ޕަސެންޓް އަދި ކުރީގެ ރައީސް މައުމޫންގެ އެމްއާރުއެމަށް ކޯލިޝަން ސަރުކާރުން ދޭން އެއްބަސްވެފައިވަނީ 20 ޕަސަންޓެވެ.