ކޮވިޑް-19އާ ގުޅިގެން މެދުކަނޑާލި ތުރުކީވިލާތުގެ ގައުމީ އެއަރލައިން، ޓަރކިޝް އެއަރލައިންސް އިން އަލުން ރާއްޖެއަށް ޝެޑިއުލް ދަތުރުތައް ފަށައިިފިއެވެ.

ޓަރކިޝްގެ އެއަރލައިންގެ ދަތުރުތައް ހުކުރު ދުވަހު ފަށާފައިވާއިރު، ހަފްތާއަކު އެއްދުވަހު ރާއްޖެއަށް ދަތުރު ބާއްވާ ގޮތަށް ވަނީ ޝެޑިއުލް ކޮށްފައެވެ. ކޮވިޑް-19ގެ ކުރިން ވެސް ޓަރކިޝް އެއަރލައިންސް އިން އައީ ދުވާލަކު އެއް ދަތުރު ވެލާނާ އިންޓަރނޭޝަނަލްއަށް ބާއްވަމުންނެވެ.

ކޮވިޑް-19އާ ގުޅިގެން ރާއްޖޭގެ ބޯޑަރު ބަންދު ކުރީ މާޗު 27 ގައެވެ. ތިން މަހަށް ވުރެ ގިނަ ދުވަހަށް ފަހު، ޖުލައި މަހުގެ 15 ވަނަ ދުވަހު ބޯޑަރު ހުޅުވާލާފައިވާއިރު، ރާއްޖެއަށް ދަތުރުކުރާ އެއަރލައިންތަކަށް ހާއްސަ ޑިސްކައުންޓުތަކެއް ދޭން އެމްއޭސީއެލުން ވަނީ ނިންމާފައެވެ.

އެމްއޭސީއެލުން ބުނީ ވެލާނާ އިންޓަރނޭޝަނަލް އެއަރޕޯޓަށް ދަތުރު ކުރާ ޝެޑިއުލްޑް ފްލައިޓުތަކުން ނަގާ ގްރައުންޑް ހޭންޑްލިން، ލޭންޑިން، ނެވިގޭޝަން އަދި ޕާކިން ޗާޖުން ޑިސްކައުންޓުތަކެއް ދޭނެ ނިންމާފައިވާ ކަމަށެވެ. އެގޮތުން އޮގަސްޓު މަސް ފެށުމުގެ ކުރިން ރާއްޖެ އަންނަން ފަށާ އެއަރލައިންތަކަށް، އަންނަ އޮކްޓޫބަރު 27ގެ ނިޔަލަށް 100 އިންސައްތަ ޑިސްކައުންޓް ދިނުމަށް ވަނީ ނިންމާފައެވެ.