އެސެޓް ރިކަވަރީ ކޮމިޝަނުން ބަލަމުންދާ މައްސަލަތަކުގައި މައުލޫމާތު ސީދާ ގެއްލުވާލާފައިވާ ކަމަށް ޝައްކު ކުރެވޭ ޙާލަތްތަކެއްވެސް ފާހަގަވެފައިވާކަމަށް ބުނެ، އެސެޓް ރިކަވަރީ ކޮމިޝަނުން ސިވިލް ސަރވިސް ކޮމިޝަނަށް ފާޑުކިޔައިފިއެވެ.
ބުރާސްފަތި ދުވަހު އޮތް ނޫސްވެރިންގެ ބައްދަލުވުމުގައި، ލިއެކިއުންތަކާއި މައުލޫމާތު ނިޒާމުން ގެއްލުވާލާފައިވުމާ ގުޅޭގޮތުން ނޫސްވެރިއަކު ކުރި ސުވާލަކަށް ޖަވާބު ދެއްވަމުން އެސެޓް ރިކަވަރީ ކޮމިޝަންގެ ރައީސް އަހުމަދު އައްސަދު ވިދާޅުވީ، އެފަދަ މައްސަލަތަކެއް ކޮމިޝަނަށް ފާހަގަވެފައިވާ ކަމަށެވެ. އެގޮތުން އެމްއެމްޕީއާރްސީގެ ތަހުޤީޤުވެސް ކުރިއަށްދާ މި ދަނޑިވަޅުގައި، މިނިސްޓްރީ އޮފް ޓޫރިޒަމްއަށް އަލިއަޅުވާލައްވާ އައްސަދު ވިދާޅުވީ، މިނިސްޓްރީގައި ހުންނަ ލިއެކިއުންތައް ބެލެހެއްޓުމަކީ ހަމައެކަނި މިނިސްޓަރުގެ ޒިންމާއެއް ނޫން ކަމަށެވެ. އަދި އެކަމަށްޓަކައި ސިވިލް ސަރވިސް ކޮމިޝަން، އޭގެ ގޮތުގައި އޮޕަރޭޓްކުރަން ޖެހޭކަން އޭނާ ފާހަގަ ކުރެއްވިއެވެ.
މިނިސްޓަރަކަށް ސިޓީއެއް ފޮނުވުމަށްފަހު، އެ ފައިލްތައް ނައްތާލެވިގެން ނުވާނެކަމަށް އޭނާ ވިދާޅުވިއެވެ.
މައުލޫމާތު ގެއްލުވާލާފައިވާކަމަށް އަޅުގަނޑުމެންނަށް ޝައްކު ކުރެވޭ ޙާލަތްތަކެއް އެބަހުރި، ސިވިލް ސަރވިސް ސިވިލް ސަރވިސްގެ ގޮތުގައި އޮޕަރޭޓް ކުރަން އެބަޖެހޭ، ޓޫރިޒަމް މިނިސްޓްރީގައި ހުންނަންޖެހޭ ލިޔެކިއުންތަކެއް ބެލެހެއްޓުމަކީ މިނިސްޓަރުގެ ޒިންމާއެއް އެކަންޏެއް ނޫން، އެއީ އެތަނުގެ ސިވިލް ސަރވިސް ކުރަންޖެހޭ ކަމެއް އެއީ، އެއަށް ޕްރޮސެސްއެއް އެބައޮތް ޕްރޮސިޖަރ އެއް އެބައޮތް، އެކަން ނުވާކަމަށްވަންޏާ ސިވިލް ސަރވިސް ކޮމިޝަނަށްވެސް އެކަން ހުށައަޅުއްވާށޭ، އެހެން ނުވާކަމުގައިވަންޏާ ބާރުތައް ވަކިވާކަމަކަށް ނުވާނޭ، ބާރު ވަކި ކުރުމަކީ ހަމައެކަނި ޕާލިމެންޓާ އެޑްމިނިސްޓްރޭޝަނާ ޖުޑީޝަރީއާއި ވަކި ކުރުމެއް ނޫން، މިނިސްޓަރަކަށް ސިޓީއެއް ލިއުއްވާފައި ފައިލް ކުރައްވާފައި ފައިލްތައް ނައްތައެއް ނުލެވޭނޭ،އެސެޓް ރިކަވަރީ ކޮމިޝަނުގެ ރައީސް އަހުމަދު އައްސަދު
އޭގެ އިތުރުން، އޭސީސީގެ ތަހުޤީޤުގައިވެސް އެފަދަ މައްސަލަތަކެއް ފާހަގަވެފައިވާ ކަމަށް އައްސަދު ވިދާޅުވިއެވެ. އެގޮތުން ސަރުކާރުގެ އިދާރާތަކުން ބައެއް ލިއެކިއުންތައް ނުފެނިގެން އުޅެން ޖެހުނުކަން އޭނާ ފާހަގަ ކުރެއްވިއެވެ.
އެހެންވީމާ މިކަހަލަ ކަންތައްތަކެއް ހުރިކަން އަޅުގަނޑަށް ފާހަގަ ކުރެވޭ، އަޅުގަނޑުމެން އެކަންޏެއް ނޫން، އޭސީސީގެ ތަހުޤީޤު ތެރެއިންވެސް ބައެއް ޑޮކިއުމަންޓްސް ގެނެސްފައިހުރީ އަމިއްލަ ފަރާތްތަކުން، ސަރުކާރުގެ އިދާރާތަކުން އެކަންކަން ނުފެނިގެން، އަދި އިއްޔެ އަޅުގަނޑުމެން އެޗްޑީސީއަށް ދިޔައިން މީހެއްގެ ލޯނެއް އަޅުގަނޑުމެންނަށް އެބަފެނޭ ބޭންކުން އެޗްޑީސީގެ ލޯނެއް އޮތްކަން، އެޗްޑީސީގެ ރެކޯޑްސްއަކުން ނުފެނޭ،އެސެޓް ރިކަވަރީ ކޮމިޝަނުގެ ރައީސް އަހުމަދު އައްސަދު
ސިވިލް ސަރވިސް ކޮމިޝަނަށް މީގެ ކުރިންވެސް ބޮޑެތި ފާޑުކިއުންތައް އަމާޒުވެފައިވެއެވެ. އެގޮތުން އެކޮމިޝަން ފެއިލްވެފައިވާ ކަމަށް ވިދާޅުވެ، އެކޮމިޝަނުގެ މެންބަރުން ވަކިކުރުމަށް މަޖިލީހުގެ މެމްބަރުންވެސް ގޮވާލާފައިވެއެވެ.
ސީއެސްސީއަށް ބޮޑެތި ފާޑުކިއުންތަކެއް އަމާޒުވެފައިވާއިރު، ސީއެއްސީގެ އޭރުގެ ރައީސް ޝަމީމަކީ، ނިމިދިޔަ ރިޔާސީ އިންތިޚާބުގެ ކެމްޕެއިންގައި ކުރީގެ ރައީސް ޢަބްދުﷲ ޔާމީނުގެ ކެމްޕެއިންގައި ޙަރަކާތްތެރިވި ކަމުގެ ތުހުމަތު ކުރެވޭ ބޭފުޅެކެވެ. އެގޮތުން އެސެޓް ރިކަވަރީ ކޮމިޝަނުންވެސް އެމްއެމްޕީއާރްސީއާ ގުޅުންހުރި މައްސަލަތައް ބަލަމުންދާއިރު، ކުރީގެ ރައީސް އަބްދުﷲ ޔާމީނުގެ މައްޗަށް މަނީ ލޯންޑަރިންގެ ދައުވާ ސާބިތުވެ، އެމަނިކުފާނު ދަނީ ޖަލު ޙުކުމެއްވެސް ތަންފީޒު ކުރައްވަމުންނެވެ.
