މާލޭގައި އަދި ރަށްރަށުގައި ހޯމް ކަރަންޓީން ވެވޭނީ 'ހާލުބެލުން' ޕޯޓަލް މެދުވެރިކޮށް އެކަމަށް އެދުމުން ކަމަށް ހެލްތް ޕްރޮޓެކްޝަން އެޖެންސީ (އެޗްޕީއޭ) އިން ބުނެފިއެވެ.
އެޗްޕީއޭއިން ކޮވިޑް-19ގެ ހާލަތުގައި ރާއްޖެއިން ބޭރުން އަންނަ މީހުންނާއި މާލެއިން ރަށްރަށަށްދާ މީހުން ކަރަންޓީނުވުމުގައި އަމަލު ކުރަންޖެހޭ ގޮތުގެ އުސޫލުގައި ބުނެފައިވަނީ ކޮވިޑް-19ގެ ހާލަތުގައި ރާއްޖެއަށް އަންނަ ދިވެހިންނާއި ވޯރކްޕާމިޓްގައި ރާއްޖެ އަންނަ މީހުން ކޮމިއުނިޓީ ސްޕްރެޑް އޮތްތަނެއްގައި މަޑުކުރާނަމަ ނުވަތަ ކޮމިއުނިޓީ ސްޕްރެޑް ނެތްތަނަކަށް ދާނަމަ މިއުސޫލާ އެއްގޮތަށް ޢަމަލު ކުރުމަކީ މުހިންމު ކަމެއް ކަމަށެވެ. އެގޮތުން މިއުސޫލަކީ ރާއްޖެ އަންނަ ދިވެހިންނާއި ވޯރކްޕާމިޓްގައި ރާއްޖެ އަންނަ މީހުން މާލޭގައި ކަރަންޓީނުވުމާއި މާލެއިން ރަށްރަށަށް ގޮސް ގޭގައި ކަރަންޓީނުވުމުގައި އަމަލު ކުރަންޖެހޭ ގޮތްތައް ބަޔާންކުރާ އުސޫލު ކަމަށް އެޗްޕީއޭއިން ބުނެފައިވެއެވެ.
އެޗްޕީއޭއިން ބުނީ ރާއްޖޭން ބޭރުން އަންނަ މީހުންނާއި މާލެއިން ރަށްރަށަށްދާ މީހުން ގޭގައި ކަރަންޓީން ވުމުގައި 'ހާލުބެލުން' ޕޯޓަލް މެދުވެރިކޮށް އެކަމަށް އެދެން ޖެހޭ ކަމަށެވެ. 14 ދުވަސް ކަރަންޓީން ވާން ޖެހޭ ކަމަށް ވެސް އެޗްޕީއޭއިން ބުނެއެވެ.
އެޗްޕީއޭގެ މިއުސޫލުގައި ރާއްޖެއިން ބޭރުން އަންނަ މީހުންނާއި، މާލެއިން ރަށަށްދާ މީހުން ކަރަންޓީން ވާންޖެހޭ ގޮތާއި، ރަށްރަށުގައި ގޭގައި ކަރަންޓީން ވުމުގައި އަމަލު ކުރަންވީ ގޮތާއި، ކަރަންޓީން ކޮށްފައިވާ ގެއަށް މީހުން ވަނުމާއި ނިކުތުމާއި އަދި ކަރަންޓީން ކުރެވޭތަނުގެ ހުންނަން ޖެހޭ މިންގަނޑުތައް ވަނީ ކަނޑައަޅާފައެވެ.
