ރާއްޖެއިން އިތުރު 14 މީހުން ކޮވިޑް-19އަށް ޕޮޒިޓިވްވެއްޖެއެވެ.

ހުކުރު ދުވަހު ހެލްތް ޕްރޮޓެކްޝަން އޭޖެންސީ (އެޗްޕީއޭއިން) ކުރި ޓްވީޓެއްގައި ބުނީ، ހުކުރު ދުވަހުގެ ހަވީރު 6:00 ގެ ނިޔަލަށް އިތުރު 14 މީހަކު ކޮވިޑް-19 އަށް ޕޮޒިޓިވްވެފައިވާ ކަމަށާއި، އޭގެ ތެރެއިން 10 މީހުންނަކީ ދިވެހިން ކަމަށެވެ. އެއާއެކު ރާއްޖެއިން ޕޮޒިޓިވްވި މީހުންގެ ޖުމުލަ އަދަދު ވަނީ 2913ށް އަރާފައެވެ.

އޭގެ އިތުރުން، ބަންގްލަދޭޝްއަށް ނިސްބަތްވާ 3 މީހަކާއި، އިންޑިއާއަށް ނިސްބަތްވާ މީހެއްވެސް އޭގެ ތެރޭގައި ހިމެނެއެވެ.

ހުކުރު ދުވަހު އިތުރު މީހަކު ބަލިން ރަނގަޅުވެފައިވާއިރު، މިހާތަނަށް ރާއްޖެއިން ބަލި ޖެހިގެން ރަނގަޅު ކުރެވުނު މީހުންގެ އަދަދު ވަނީ 2340ށް އަރާފައެވެ. އަދި މިވަގުތުގެ އެކްޓިވް ކޭސްތަކުގެ އަދަދަކީ 543 އެވެ.

މިވަގުތުވެސް ރާއްޖެއިން 459 މީހަކު އައިސޮލޭޝަން ފެސިލިޓީތަކުގައި ފަރުވާ ދެމުންދާއިރު، 32 މީހަކަށް ކަރަންޓީން ފެސިލިޓީތަކުގައި ފަރުވާ ދެމުންދެއެވެ.

ރާއްޖެއިން ކޮވިޑް-19 ގެ ކޭސްއެއް އެންމެ ފުރަތަމަ ފެނުނުތާ މިއަދަށް 132 ދުވަސް ވެފައިވާއިރު، ކުރިއާ އަޅާ ބަލާއިރު، މިހާރު ފެންނަ ކޭސްތަކުގައި ގިނައީ ދިވެހިންނެވެ.