އެންމެ ފަހުގެ މޯބައިލް ފޯނާއި އިލެކްޓްރޯނިކް ވަސީލަތްތަކާއެކު ބަންކާ މޯބައިލް ސެންޓަރ ހުޅުވައިފިއެވެ.

ބުދަ ދުވަހުގެރޭ ބަންކާ މޯބައިލް ސެންޓަރު ހުޅުވައިދެއްވީ މިނިސްޓަރ އޮފް ޔޫތު، ސްޕޯރޓްސް އެންޑް ކޮމިއުނިޓީ އެމްޕަވަރމަންޓް އަހުމަދު މަހުލޫފެވެ. ފިހާރަ ހުޅުވުމަށް ބޭއްވި ރަސްމިއްޔާތުގައި ފިހާރައިގެ ފަރާތުން ވަނީ ކޮމަންވެލްތް އޮފް ލަރނިންގ ގެ އޮންލައިން ކޯސްތަކަކަށް މިނިސްޓްރީން ހޮވިފައިވާ 25 ބައިވެރިއަކަށް ހިލޭ އިންޓަރނެޓް ލިބޭނެ ޕެކޭޖެއް ތައާރަފް ކޮށްދީފައެވެ.

މަޖީދީމަގު ލެކިއުޓް ޖެހިގެން ހުންނަ ބަންކާ މޯބައިލް ސެންޓަރަކީ ބަންކާގެ ދެވަނަ ފިހާރައެވެ. އެގޮތުން ބަންކާގެ ފުރަތަމަ ފިހާރަ ހުންނާނީ މަޖީދީ މަގު ގަލޮޅު ދަނޑާ ދިމާލުގައި ކަމަށް ބަންކާގެ ސީއީއޯ އަމީޒް މުޙައްމަދު ވިދާޅުވިއެވެ.

އަމީޒް ވިދާޅުވީ، އެންމެ ފުރަތަމަ ވިޔަފާރި ފަށައިގެން އައީ އައިބޭ މެދުވެރިކޮށް އޮންލައިންކޮށް ކަމަށާއި، ނަމަވެސް މިހާރު މަޑުމަޑުން ވިޔަފާރި ފުޅާވަމުންދާ ކަމަށެވެ.

ފިހާރައިގައި ފަހުގެ ފޯނުގެ އިތުރުން، ތަފާތު އެކި އިލެކްޓްރޯނިކް ސާމާނުތައްވެސް ލިބެންހުރިއިރު، ފޯނުގެ ތަފާތު އެކްސެސަރީސްވެސް ފިހާރައިން ލިބެން ހުއްޓެވެ.

މި ފިހާރަ ހުޅުވާފައި ހުންނާނީ ހުކުރު ދުވަސް ފިޔަވާ ކޮންމެ ދުވަހެއްގެ ހެނދުނު 09:00ން މެންދުރު 12:00 އަށެވެ. އަދި މެންދުރު 13:30ން ހަވީރު 18:00, ރޭގަނޑު 20:00ން 22:30ށް ފިހާރަ ހުޅުވާފައި ހުންނާނެއެވެ. އޭގެ އިތުރުން، ހުކުރު ދުވަހު މެންދުރު 14:00ން ފެށިގެން ހަވީރު 18:00 ފިހާރަ ހުޅުވާފައި ހުންނައިރު، ރޭގަނޑުވެސް 20:00ން ފެށިގެން 22:30ށް ފިހާރަ ހުޅުވާފައި ހުންނާނެއެވެ.