މިނިވަން މީޑިއާއަކީ ހެޔޮވެރިކަމުގެ ރުކުނެއް ކަމަށާއި ނޫސްވެރިކަމުގެ މިނިވަންކަން އޭގެ އެންމެ ފުޅާ ދާއިރާއެއްގައި ހޯދައިދިނުމަށް މީޑިއާ ކައުންސިލްގެ ކުރީގެ ރައީސުން އިޤުރާރުވެ ފަށާފައިވާ މަސައްކަތައް ގުޅިފައިވާ ޕާޓީތަކުގައި ހިމެނޭ އަދާލަތު ޕާޓީން މަރުޙަބާ ކިޔައިފިއެވެ.

އަދާލަތު ޕާޓީން ބުނީ މިނިވަން މީޑިއާއަކީ ހެޔޮވެރިކަމުގެ މުހިއްމު ރުކުނެއް ކަމަށާއި  ނޫސްވެރިކަމުގެ ދިފާޢުގައި މޯލްޑިވްސް މީޑިއާ ކައުންސިލްގެ ކުރީގެ 4 ރައީސުން ފެއްޓެވި މަސައްކަތައް އަދާލަތު ޕާޓީން މަރުޙަބާ ކިޔާ ކަމަށެވެ.

އަދި ހެޔޮވެރިކަން ދަމަހައްޓައި ރައްޔިތުންގެ މަތީ މަސްލަހަތު ހިފެހެއްޓުމަށްޓަކައި ސިވިލް ސޮސައިޓީން ވަރަށް މުހިއްމު ހަރުދަނާ ދައުރެއް އަދާކުރަން ޖެހޭ ކަމަށްވެސް އަދާލަތު ޕާޓީން ވަނީ ބުނެފައެވެ.

މީޑިއާ ކައުންސިލްގެ ކުރީގެ ރައީސުން ހޯމަ ދުވަހު ސޮއިކުރި އިޤުރާރުގައި ބުނެފައިވަނީ، ދިވެހިރާއްޖޭގެ ޤާނޫނު އަސާސީގައި ބަޔާންކޮށްފައިވާ ނޫސްވެރިކަމާއި، ޚިޔާލުފާޅުކުރުމާއި، މަޢުލޫމާތު ހޯދައި ލިބިގަތުމުގެ މިނިވަންކަން އޭގެ އެންމެ ފުޅަދާއިރާއެއްގައި ހޯދައިދިނުމަށް ޤާނޫނީ ހަމަތަކުގެ މަތިން މަސައްކަތް ކުރުމަށް އެއްބަސްވާ ކަމަށެވެ.

މި އިޤުރާރުގައި މީޑިއާ ކައުންސިލްގެ ރައީސްކަން ކުރައްވާފައިވާ ހަތަރު ބެފުޅަކު ސޮއިކުރައްވާފައިވާއިރު، މީޑިއާ ކައުންސިލްގެ ރައީސްކަން ކުރައްވާފައިވާ، އަދި ދައުލަތުގެ މީޑިއާގެ މިހާރުގެ މެނޭޖިން ޑިރެކްޓަރ އިބްރާހިމް ހަލީލް ސޮއިކުރައްވާފައެއް ނުވެއެވެ.

އިޤުރާރުގައި ސޮއިކުރައްވާފައިވަނީ މީޑިއާ ކައުންސިލްގެ ކުރީގެ ރައީސް މުހައްމަދު ނަޒީފާއި، ހުޝާމް މުޙައްމަދާއި އަބްދުﷲ މުއާޒު ޔޫސުފް އަދި މުހައްމަދު އާސިފް (މޮންދު) އެވެ.

ނޫސްވެރިކަމުގެ މިނިވަންކަން އޭގެ އެންމެ ފުޅާ ދާއިރާއެއްގައި ކަށަވަރުކުރުމަށް މީޑިއާ ކައުންސިލްގެ ކުރީގެ ރައީސުން އިޤުރާރުވެފައި މިވަނީ، މޯލްޑިވްސް ބްރޯޑްކާސްޓިން ކޮމިޝަނުން އަމިއްލައަށް އިސްނަގައިގެން ބެލި މައްސަލައަކާ ގުޅިގެން ރާއްޖެޓީވީ އެއް މިލިއަން ރުފިޔާއިން ޖޫރިމަނާކޮށްފައިވަނިކޮށެވެ، ރައީސުލްޖުމްހޫރިއްޔާގެ އަބުރަށް ހުތުރުވާފަދަ ކޮންޓެންޓެއް ބްރޯޑްކާސްޓްކުރިކަމަށް ބުނެ، ރާއްޖެޓީވީ ޖޫރިމަނާކުރުމާއެކު، އެއީ ނޫސްވެރިކަން މަރާލުމަށް ބްރޯޑްކާސްޓިން ކޮމިޝަންގައި ތިއްބަވާ ބޭފުޅުން ކުރައްވާ ކަމެއްގެ ގޮތުގައި މީޑިއާގެ ދާއިރާގެ ގިނަ ދުވަހު މަސައްކަތްކުރައްވާފައިވާ ބޭފުޅުން ގެންދަވަނީ ވިދާޅުވަމުންނެވެ.