ކޮވިޑް-19ގެ އިންޑިޕެންޑެންޓް ކޭސްތައް އިތުރުވަމުން ދިއުމަކީ އައިސީޔޫގައި ފަރުވާ ދޭން ޖެހޭ މީހުންގެ އަދަދު އިތުރުވެދާނެ ކަމެއް ކަމަށް އިންދިރާ ގާނދީ މެމޯރިއަލް ހޮސްޕިޓަލް (އައިޖީއެމްއެޗް) ގެ އެތެރެހަށީގެ ޚާއްސަ ޑރ. މުސާ މުރާދު ވިދާޅުވެއްޖެއެވެ.
ބުރާސްފަތި ދުވަހުގެ ރޭ ހެލްތު އިމަރޖެންސީ އޮޕަރޭޝަން ސެންޓަރ (އެޗްއީއޯސީ) ބޭއްވި ނޫސްވެރިންގެ ބައްދަލުވުމުގައި ޑރ. މުރާދު ވިދާޅުވީ ދެވުނު ލުއިތަކާ ގުޅިގެން މިހާރު އިންޑިޕެންޑެެންޓް ކޭސްތައް ފެންނަ މިންވަރު އިތުރުވާ ކަމަށާއި، މިއީ ކަންބޮޑުވާން ޖެހޭ ކަމެއް ކަމަށެވެ.
ހައިރިސްކް ކެޓަގަރީއެއްގައި މީހުންނަށް ނުރައްކާ ބޮޑުކަން ފާހަގަކުރައްވައި ޑރ. މުރާދު ވިދާޅުވީ އެފަދަ ގުރޫޕްގައި ބަލި މީހުން ކޮވިޑް-19ށް ހުށަހެޅޭނަމަ އައިސީޔޫގައި ފަރުވާ ދޭން ޖެހޭ މީހުންގެ އަދަދު އިތުރުވާނެ ކަމަށެވެ.
އެހެންކަމުން ރައްކާތެރިކަމުގެ ފިޔަވަޅު އަޅައި ބަލި ކޮންޓްރޯލް ކުރުމަށްޓަކައި ނުވަތަ މަދު ކުރުމަށް ހުރިހާ އެންމެން ވެސް ޚާއްސަ ސަމާލުކަމެއް ދިނުމަށް ޑރ. މުރާދު އިލްތިމާސް ކުރެއްވިއެވެ.
އައިޖީއެމްއެޗްގެ ޚިދުމަތްތަކަށް އަލިއަޅުއްވާލައްވާ ޑރ. މުރާދު ވިދާޅުވީ އައިޖީއެމްއެޗުން ޚިދުމަތް ދެމުންދާ ގޮތަށް ބަދަލު ގެނެސްފައިވާ ކަމަށާއި، މިހާރު ހޮސްޕިޓަލްގެ ރޫޓިންގެ މަސައްކަތްތައް ކުރެވޭ ކަމަށެވެ. ކްރިޓިކަލްކެއަރ ފަރުވާ ދޭން ޖެހޭ މީހުންނަށް ވެސް ފަރުވާ ދެމުންދާކަން ޑރ. މުރާދު ފާހަގަކުރެއްވިއެވެ.
ޑރ. މުރާދު ވިދާޅުވީ އައިޖީއެމްއެޗްގެ އުސޫލުތަކާއި ޚިދުމަތްތައް ހަރުދަނާ ކުރުމުގެ މަސައްކަތްތައް ކުރަމުންދާއިރު، އަތޮޅުތެރޭގެ ހާލަތު ވެސް ސިއްހީ މަރުކަޒުތަކާއި، އަތޮޅު ހޮސްޕިޓަލްތަކާއި ގުޅިގެން ކުރަމުންދާ ކަމަށެވެ. އަދި ރަށަކުން ކޮވިޑް-19 ގެ ކޭސްއެއް ފެނި އިތުރު ފަރުވާއަށް މާލެ ގެނަންޖެހިއްޖެ ހާލަތަކަށް ވެސް އައިޖީއެމްއެޗް ތައްުޔާރުވެފައިވާ ކަމަށް ޑރ. މުރާދު ވިދާޅުވިއެވެ.
