ކްރިމިނަލް ކޯޓުން ކުރި ހުކުމާ އެއްގޮތަށް ކުރީގެ ރައީސް އަބްދުﷲ ޔާމީންގެ ދައުލަތަށް ދައްކަވަންޖެހޭ 5 މިލިއަން ޑޮލަރު ދައްކަވާފައިނުވާތީ، އެ ފައިސާ ހޯދުމުގެ މަސައްކަތް އެޓަރނީ ޖެނެރަލްގެ (ދައުލަތުގެ ބަންޑާރަ ނައިބު) އޮފީހުން ކުރަން ފަށައިފިއެވެ.

އެޓަރނީ ޖެނެރަލްގެ އޮފީހުން ބުނީ، ކްރިމިނަލް ކޯޓުންކޮށްފައިވާ ހުކުމާ އެއްގޮތަށް ރައީސް ޔާމީން ފައިސާ ދައްކަވާފައި ނުވާތީ، އެމައްސަލަ ސިވިލް ކޯޓަށް ހުށަހެޅުމުގެ މަސައްކަތް ކުރަމުންދާ ކަމަށެވެ. އަދި މި މައްސަލައިގެ ލިޔެކިޔުންތައް ތައްޔާރު ކުރުމަށްފަހު، ސިވިލް ކޯޓަށް ހުށަހަޅުއްވާނެ ކަމަށް ވެސް އެޓަރނީ ޖެނެރަލްގެ އޮފީހުން ބުނެއެވެ.

އެމްއެމްޕީއާރުސީގެ ހިޔާނާތުގެ ފައިސާގެ ތެރެއިން 1،000،000 ޑޮލަރު، މަނީ ލޯންޑަރ ކުރުމުގެ ކުށް ސާބިތުވެ، ފަސް އަހަރަށް ޖަލަށްލުމާއެކު، 5 މިލިއަން ޑޮލަރު، 6 މަސް ދުވަހުގެ ތެރޭގައި މޯލްޑިވްސް އިންލެންޑް ރެވެނިއު އޮތޯރިޓީ (މީރާ) އަށް ދެއްކުމަށް ކްރިނަލް ކޯޓުން ހުކުމް ކޮށްފައިވަނީ މިދިޔަ އަހަރުގެ ނޮވެމްބަރު މަހުގެ 28 ވަނަ ދުވަހުއެވެ.

ރައީސް ޔާމީންގެ ފަރާތުން ވަނީ ކްރިމިނަލް ކޯޓުން އެމަނިކުފާނުގެ މައްޗަށް ކޮށްފައިވާ ހުކުމް ހައިކޯޓުގައި އިސްތިއުނާފް ކުރައްވާފައެވެ. ހައިކޯޓުގައި އޮތް މައްސަލަ އޮތީ، ފަހު އަޑުއެހުމާ ހަމައިގަ އެވެ. ބުދަ ދުވަހު (އިއްޔެ) ވަނީ ހައިކޯޓުގައި އެ މައްސަލައިގެ އަޑުއެހުމެއް ބާއްވާފައެވެ.

ބުދަ ދުވަހުގެ އަޑުއެހުމުގައި ރައީސް ޔާމީން ވަނީ، 5 މިލިއަން ޑޮލަރު އަދީބު އަތުގައި ހުންނާނެ ކަމަށާއި، އެ ފައިސާ ބަލާ ދިޔައީ، އަދީބާއި ޝައިނީ ކަމަށް ވިދާޅުވިއެވެ. ނަމަވެސް އެ 5 މިލިއަން ޑޮލަރު ލިބިލެއްވި ގޮތެއް ރައީސް ޔާމީން ވިދާޅެއް ނުވެއެވެ.

ނަމަވެސް، ރައީސް ޔާމީންގެ ވެރިކަމުގައި، ސްޕެޝަލް އިކޮނޮމިކް ޒޯން (އެސްއީޒެޑް) ގާނޫނެއް ފާސްކޮށް، ސައުދީ އަރަބިއްޔާގެ ޝާހީ އާއިލާއަށް ފ. އަތޮޅު ވިއްކާލަން ނިންމި، ނިންމުގެ އެޑްވާންސް ފައިސާ ކަމަށް ބުނާ 15 މިލިއަން ޑޮލަރު ދިންކަމާއި، އެ ފައިސާ ބަލާ ވަޑައިގެންނެވީ، އަދީބާއި ޝައިނީ ކަމަށް އޭރު އެވާހަކަތައް ދެކެވިފައިވެއެވެ. މިކަމެއް ހިންގާފައިވަނީ ރައީސް ޔާމީންގެ ވެރިކަމުގައެވެ.

ގއ. ވޮޑަމުލާގެ އިކުއިޒިޝަން ކޯސްޓްގެ ގޮތުގައި ދައުލަތަށް ލިބެންޖެހޭ 1،000،000 ޑޮލަރު ރައީސް ޔާމީންގެ އެކައުންޓަށް ޖަމާކޮށްފައިވާއިރު، އެމްއެމްޕީއާރުސީގެ އިތުރު މައްސަލަތަކެއްގެ ތަހުގީގުތައް ކުރިއަށްދާއިރު، ދާދިފަހުން ވަނީ އެމްއެމްޕީއާރުސީގެ ހިޔާނާތުގައި ހިމެނޭ، ރ. ފުއްގިރި ރިސޯޓެއް ތަރައްގީ ކުރުމަށް ކުއްޔަށް ދިން މައްސަލައެއްގައި މަނީ ލޯންޑަރ ކުރުމުގެ ދައުވާއަކާއި ކޮރަޕްޝަންގެ ދައުވާއެއް ކްރިމިނަލް ކޯޓަށް ހުށަހަޅާފައެވެ. މި މައްސަލާގައި ދައުލަތުން ރައީސް ޔަމީންގެ މައްޗަށް ހޯދުމަށް މަސައްކަތް ކުރާ، ޖުމްލަ ފައިސާގެ އަދަދަކީ 591 މިލިއަން ރުފިޔާއެވެ.