ތިލަފުށިން ފުރައިގެން މާލެ ދަތުރުކުރި ދޯންޏަކުން ގުޅީފަޅު ނެރުމައްޗާއި ދިމާލުން ގޭސްފުޅިތަކެއް ކަނޑަށް ވެއްޓި އޮޔާދާތީ އެ ސަރަހައްދުން ދަތުރުކުރާ ފަރާތްތަކުން ސަމާލުވުމަށް އެމްއެންޑީއެފުން އިލްތިމާސްކޮށްފިއެވެ.

އެމްއެންޑީއެފުން ބުނީ މޫސުމް ގޯސްވެ ކަނޑުގަދަވުމުގެ ސަބަބުން ހޯމަ ދުވަހުގެ ހަވީރު 3:00 ހާއިރު މޯލްޑިވްސް ގޭސް ކުންފުނީގެ "ގޭސްމާ" ނަމަކަށް ކިޔާ ދޯންޏަކުން ކަނޑަށް ވެއްޓިފައި ވަނީ ފެހި ކުލައިގެ 10 ކިލޯގެ 6 ގޭސްފުޅިކަމަށެވެ. އެހެންކަމުން މި ސަރަހައްދުން ދަތުރުކުރާ ފަރާތްތަކުން ޚާއްޞަ ސަމާލުކަމެއް ދިނުމަށް އެމްއެންޑީއެފުން ވަނީ އިލްތިމާކޮށްފައެވެ.

އަދި ރޭގަނޑު ދަތުރުކުރައްވާ ފަރާތްތަކުން މިކަމަށް އިތުރަށް ސަމާލުކަން ދިނުމަށް އެމްއެންޑިއެފުން ވަނީ އެދިފައެވެ. ރާއްޖޭގެ އެކި ހިސާބުތަކަށް މޫސުންގޯސްވެ ހާދިސާތައް ހިނގަމުން އަންނަ ކަމަށް އެމްއެންޑިއެފުން ވަނީ ރިޕޯޓްކޮށްފައެވެ. އަދި ދަތުރުފަތުރު ކުރުމުގައި ސަމާލުވުމަށް ވެސް އެމްއެންޑީއެފުން ވަނީ އެދިފައެވެ.

މީގެ އިތުރުން މާލެއިން ފުރައިގެން ދޮނަކުޅިއަށް ދަތުރުކުރަމުން ދިޔަ "ފަތޮޅު" ކިޔާ ބޯޓު އަޑިއަށް ގޮސް ކަނޑުވި މީހުން އެމްއެންޑީއެފުން ވަނީ ހޯމަ ދުވަހު ސަލާމަތްކޮށްފައެވެ. އެމްއެންޑީއެފުން ބުނީ އެބޯޓު އަޑިއަށް ގޮސްގެން ރިޕޯޓްކޮށްފައިވަނީ 12:29 ހާއިރު ކަމަށެވެ. އަދި އެބޯޓުގައި އެވަގުތު 5 މީހުން ތިބި ކަމަށާއި، އެއީ 4 ދިވެހިންނާއި ބިދޭސީއެއް ކަމަށްވެސް އެމްއެންޑީއެފުން ބުނެއެވެ.

ބޯޓު އަޑިއަށް ގޮސްފައި ވަނީ ކާށިދޫގެ އުތުރުން 9 މޭލު ބޭރުން އިންޖީނު ހުއްޓިގެން ބޯޓު އަރިއަޅާލައިގެން ކަމަށެވެ. އަދި ކަނޑުވި މީހުން ފެނުނު ނަމަވެސް ބޯޓު އަޑިއަށް ދިޔަކަމަށް ބުނާ ސަރަހައްދުން ބޯޓުގެ އެއްވެސް ނިޝާނެއް އަދި ފެނިފައި ނުވާކަމަށް އެމްއެންޑީއެފުން ބުނެއެވެ.