ކޮވިޑް-19 ފެތުރުން ކޮންޓްރޯލް ކުރުމަށް މާލެ ސަރަޙައްދުގައި މިސްކިތްތަކުގައި ޖަމާޢަތުގައި ނަމާދުކުރުން މެދުކަނޑާލާފައިވާއިރު، ޖުލައި 01 އަކުން ފެށިގެން އަލުން ޖަމާއަތުގައި ނަމާދު ކުރެވޭނެ ކަމަށް ރައީސުލްޖުމްހޫރިއްޔާ އިބްރާހީމް މުހައްމަދު ސޯލިހް ވިދާޅުވެއްޖެއެވެ.

އެމަނިކުފާނު މިހެން ވިދާޅުވީ އަންގާރަ ދުވަހު ކުރެއްވި ޓުވީޓެއްގައެވެ. ރައީސް ވިދާޅުވީ ނިއު ނޯމަލްގައި ދޭ ލުއިތަކުގެ ދަށުން މާލެ ސިޓީގެ މިސްކިތްތަކުގައި ޖަމާއަތުގައި މާދަމާ އިން ފެށިގެން ނަމާދު ކުރެވޭނެ ކަމަށެވެ.

ކޮވިޑް-19 އާ ގުޅިގެން މާލެ ސިޓީގެ މިސްކިތްތަކުގައި ނަމާދުކުރުން މުޅިން ބަންދުކޮށްފައިވަނީ އޭޕްރީލް މަހުގެ 15 ވަނަ ދުވަހުން ފެށިގެންނެވެ. އޭގެ ފަހުން މި މަހުގެ 14 ވަނަ ދުވަހު ވަނީ ޖަމާޢަތުގައި ނަމާދު ކުރުން މަނާކޮށް، ވަކިވަކިން ނަމާދު ކުރެވޭ ގޮތަށް މާލެ ސަރަހައްދުގެ މިސްކިތްތައް ވަނީ ހުޅުވާލާފައެވެ.

އެ ހުއްދަ ދެމުން އިސްލާމިކް މިނިސްޓްރީން ނެރެފައިވާ ބަޔާނުގައި ބުނެފައިވަނީ މިނިސްޓްރީން ސަމާލުކަން ދިނުމަށް އަންގާފައިވާ ކަންކަމަށް ސަމާލުކަން ދިނުމާއެކު މާލެ ސަރަހައްދުގެ މިސްކިތްތަކުގައި ވަކިވަކިން ނަމާދު ކުރުން އެންމެ ރަނގަޅު ކަމުގައެވެ. އަދި މިގޮތަށް މިސްކިތްތައް ހުޅުވާލިކަމުގައި ވީނަމަވެސް، އިމާމާ މިސްކިތުގައި ޖަމާޢަތް ހަދައިގެން ނަމާދުކުރާ ގޮތަށް ހަމަޖެހިފައިނުވާތީ، އިމާމުން ބަންގީގެ ފަހުގައި "ޞައްލޫ ފީ ބުޔޫތިކުމް" މިފަދައިން 2 ފަހަރު ގޮވުމަށް ވަނީ އަންގާފައެވެ.