ހުޅުމާލޭ ފަޅުގައި އަޅަފާއި އޮތް ސަފާރީއެއްގައި ހުރި ކެންޔާގެ އަންހެނަކަށް ޖިންސީ ގޯނާކުރި ކަމުގެ ތުހުމަތުގައި ހައްޔަރުކުރި ދެ މީހުން ދޫކޮށްލުމާއި ގުޅިގެން ރޭޕާއި ދެކޮޅަށް މާލޭގައި މުޒާާހަރާ ކޮށްފިއެވެ.

ސަތޭކައަށް ވުރެ ގިނަ މީހުން ބައިވެރިވި މުޒަހަރާ ފެށީ ޖެންޑަރ މިނިސްޓްރީގެ ބޭރުގައި ހޯމަ ދުވަހު ހަވީރު ހަތަރެއް ޖެހިހާއިރުއެވެ. މުޒާހަރާގެ ބައިވެރިން ތިބީ އެ މީހުންގެ ޝޫއުރު ފާޅުކުރުމުގެ ގޮތުން އެކި ކަހަލަ ބެނަރތައް ހިފައިގެންނެވެ.

އެ ފަރާތްތަކުން ގޮވާލަމުން ދިޔައީ ރޭޕްކުރި މީހުން ހައްޔަރު ކުރުމަށާއި، މުއައްސަސާތައް ޒިންމާދަރުވުމުގެ އިތުރުން ޕޮލިސް ކޮމިޝަނަރު މުހައްމަދު ހަމީދުގެ އިސްތިއުފާއަށެވެ. ސަރުކާރުން ރޭޕާއި ދެކޮޅަށް ގެންގުޅޭ ''ޒީރޯ ޓޮލަރެންސް'' ތަންފީޒު ކުރާތަން ނުފެންނަ ކަމަށްވެސް މުޒާހަރާގެ ބައިވެރިން ވަނީ އަޑުއުފުލާފައެވެ. އަދި ވީހާ ވެސް އަވަހަށް ރޭޕްގެ މައްސަލަ ބަލައި ދިނުމަށްވެސް އެ މީހުން ވަނީ ގޮވާލާފައެވެ.

އެތަނުގައި ތިބުމަށް ފަހު އެ މީހުން ބޮޑުތަކުރުފާނު މަގާ ދިމާލަށް ހިނގަމުން ދަނިކޮށް ފުލުހުން ހުރަސްއެޅިއެވެ. ފުލުހުންގެ ލައިނު ފޫއަޅުވާލާފައި މުޒާހަރާގެ ބައިވެރިން ކުރިޔަށް ދިޔައެވެ.

އެގޭ ތެރެއިން އެކަކު ފުލުހުންގެ ގައިގައި ކޮޅުފައިން ޖެހި މަންޒަރު ނޫސްވެެރިންނަށް ވަނީ ފެނިފައެވެ. މުޒާހަރަ ނިންމާލާފައިވަނީ ބޮޑުތަކުރުފާނު މަގުގައި ހުންނަ ބޭންކް އޮފް މޯލްޑިވްސްގެ ކައިރީގައެވެ.

މުޒާހަރާގެ ބައިވެރިން އެ ސަރަހައްދުން ދުރަށ ޖެއްސުމުގެ ތެރޭގައި ފުލުހުން ވަނީ އެ މީހުންނާ ދެކޮޅަށް ބާރުގެ ބޭނުންކޮށް ޕެޕަރ ސްޕްރޭ ބޭނުންކޮށްފައެވެ. އަދި އޭގެ ތެރެއިން ބައެއް މީހުން ފުލުހުންނަށް އަނިޔާކޮށްފައިވާ މަންޒަރު ނޫސްވެރިންނަށް ފެނިފައިވާއިރު އޭގެ ތެރެއިން ތިން މީހަކު ފުލުހުންގެ ބެލުމުގެ ދަށަށް ގެންގޮސްފައިވާ ކަމަށް ފުލުހުން ވަނީ ބުނެފައެވެ.

ސަފަރީ ރޭޕް ކޭސްގައި ހިމެނޭ މީހުން ދޫކޮށްލުމާއި ގުޅިގެން ސަރުކާރަށާއި، ފުލުހުންނަށް އާއްމު ފާޑުކިޔުން އިންތިހާ އަށް ވަނީ އިތުރުވެފައެވެ. މިކަމާއި ގުޅިގެން އަދި މިހާތަނަށް ރައީސް އިބްރާހިމް ސޯލިހު އެއްޗެއް ވިދާޅުވެފައެއް ނުވެއެވެ.