16 އަހަރުގެ ކުއްޖަކު ރޭޕް ކުރިކަމަށް ތުހުމަތު ކުރެވޭ މީހާގެ މައްޗަށް ހަތަރު ދައުވާއެއް ކުރުމަށް ކްރިމިނަލް ކޯޓަށް ހުށަހަޅައިފިއެވެ.
އެ ކުއްޖާއަށް ޖިންސީ ގޯނާކޮށްފައިވާކަމަށް ތުހުމަތުކުރެވޭ މައްސަލާގައި ދައުވާކުރުމަށް ހުށަހަޅާފައިވަނީ ބ. ތުޅާދޫ، ހިޔާވަހި، އުނައިސް އަޙްމަދުގެ މައްޗަށެވެ.
އޭނާގެ މައްޗަށް ތުހުމަތު ކުރެވެނީ ޝަޚްސު އޮޅުވާލައިގެން ޢުމުރުން 16 އަހަރުގެ ކުޑަ އަންހެން ކުއްޖަކާ ރައްޓެހިވެ، އެކުއްޖާގެ ބައްޕަގެ އަތުން މަކަރާ ހީލަތުން ފައިސާ ހޯދައި، އެކުއްޖާ ޑޮކްޓަރަށް ދެއްކުމަށްކަމަށް ބުނެ 27 މޭ 2020 ދުވަހުގެ ވަގުތެއްގައި އެކުއްޖާ މާލެ ގެނެސް ޖިންސީ ގުޅުން ހިންގުމަށް ހިތްވަރުދީ، އެކުއްޖާއަށް ޖިންސީ ގޯނާކުރިކަމުގެ މައްސަލައިގައެވެ.
ޕްރޮސެކިއުޓަރ ޖެނެރަލް (ޕީޖީ) އޮފީހުން ކޮށްފައިވާ ޓުވީޓެއްގައި ވަނީ ޝަޚްޞު އޮޅުވާލައިގެން 16 އަހަރުގެ ކުޑަ އަންހެން ކުއްޖަކަށް، ޖިންސީ ގޯނާކޮށްފައިވާކަމަށް ތުހުމަތުކުރެވޭ މައްސަލާގައި، ކުޑަކުއްޖެއްގެ ހަށިގަނޑުގައި ޖިންސީ ނިޔަތެއް އޮވެގެން ޤަޞްދުގައި އަތްލުމުގެ ކުށުގެ ދަޢުވާއާއި އިތުރު 3 ދަޢުވާ ކޯޓަށް ހުށަހަޅާފައިވާ ކަމަށެވެ.
އުނައިސް އަޙްމަދުގެ މައްޗަށް ކުރުމަށް ހުށަހަޅާފައިވަނީ ކުޑަކުދިންނަށް ޖިންސީ ގޯނާކުރާ މީހުންނާ މެދު ޚާއްޞަ އުސޫލުތަކަކަށް ޢަމަލުކުރުމުގެ ޤާނޫނުގެ 3 ވަނަ މާއްދާގެ ދަށުން ކުޑަކުއްޖެއްގެ ހަށިގަނޑުގައި ޖިންސީ ނިޔަތެއް އޮވެގެން ޤަޞްދުގައި އަތްލުމުގެ ކުށުގެ ދަޢުވާއާއި، ޤާނޫނުލްޢުޤޫބާތުގެ 312 ވަނަ މާއްދާގެ ދަށުން ޝަޚް ޞައޮޅުވާލުމުގެ ކުށުގެ ދަޢުވާއެވެ. އަދި ޤާނޫނުލްޢުޤޫބާތުގެ 212 ވަނަ މާއްދާގެ ދަށުން މަކަރާއި ޙީލަތްހެދުމުގެ ކުށުގެދަޢުވާގެ އިތުރުން ކުޑަކުދިންގެ ޙައްޤުތައް ރައްކާތެރިކުރުމުގެ ޤާނޫނުގެ 127 ވަނަ މާއްދާގެ ދަށުން ކުޑަކުއްޖެއް އެކްސްޕްލޮއިޓް ކުރުމުގެ ކުށުގެ ދަޢުވާއެވެ.
އުމުރުން 16 އަހަރުގެ ކުޑަ އަންހެން ކުއްޖަށް ބިރުދައްކައިގެން، އެކުއްޖާއާއި އާއިލާ ބްލެކްމެއިލްކޮށް، އެކުއްޖާ ރޭޕްކުރި މައްސަލައިގެ ތުހުމަތުކުރެވޭ އުނެއިސް އަހްމަދު ހައްޔަރުކުރީ މިދިޔަ މޭ މަހުގެ 28 ވަނަ ދުވަހެވެ.
ޖެހިގެން އައި ދުވަހު އޭނާގެ ބަންދާމެދު ގޮތެއް ނިންމުމަށް ހާޒިރުކުރުމުން، ކްރިމިނަލް ކޯޓުން އޭނާގެ ބަންދަށް 15 ދުވަސް ޖެހިއިރު ޖޫން މަހުގެ 12 ވަނަ ދުވަހު ޝަރީއަތް ނިމެންދެން އޭނާ ބަންދުކޮށްދިނުމަށް ފުލުހުންގެ ފަރާތުން ކުރިމިނަލް ކޯޓުގައި އެދުމުން، ކޯޓުން އޭނާގެ ބަންދަށް 10 ދުވަހުގެ މުއްދަތެއް ޖަހާފައިވެއެވެ. އަނެއްކާވެސް ބަންދުގެ މުއްދަތު އިތުރުކުރުމަށް ޖޫން 22 ވަނަ ދުވަހު ކްރިމިނަލް ކޯޓަށް ހާޒިރުކުރުމުން، ބަންދުގައި ބެހެއްޓޭނެ އެންމެ ދިގު މުއްދަތަކީ 15 ދުވަސް ކަމަށް ބުނެ އޭނާ ބަންދުން ދޫކުރުމަށް ހަމަ އެދުވަހު ކޯޓުން ވަނީ އަމުރުކޮށްފައެވެ.
ކުޑަކުދިންނަށް ޖިންސީ ގޯނާ ކުރުމުގެ އެތައް މައްސަލަތަކެއް މީގެ ކުރިން ވެސް ފުލުހުން ތަޙުޤީޤު ކުރަމުން ދިޔަ ނަމަވެސް، މި މައްސަލަތައް ޙައްލުކުރުމަށް އެކަށީގެންވާ ރަނގަޅު މަސައްކަތްތަކެއް ދައުލަތުގެ އެއްވެސް އިދާރާއަކަށް ކުރެވިފައެއް ނުވާކަމަށްބުނެ، ބައެއް ފަރާތްތަކުން ދައުލަތުގެ ކަމާބެހޭ އިދާރާތަކަށް ދަނީ ފާޑުކިޔަމުންނެވެ. ޚާއްްޞަކޮށް، ފުލުހުންގެ މުއައްސަސާއަށާއި ޖެންޑަރ މިނިސްޓްރީއަށް މީގެ ކުރިން ވެސް ބޮޑެތި ފާޑުކިޔުންތަކެއް ވަނީ ޢަމާޒު ވެފައެވެ.
