ސްރީ ލަންކާއިން ދިވެހި އާއިލާއެއް ހައްޔަރު ކޮށްފިއެވެ.
ރާއްޖެއެމްވީއަށް މައުލޫމާތު ލިބިފައިވާ ގޮތުގައި ހައްޔަރުކޮށްފައިވަނީ ގަވައިދާ ހިލާފަށް ލަންކާގައި ދިރިއުޅެމުންދާ އާއިލާއެކެވެ. ހައްޔަރުކުރި މީހުންގެ ތެރޭގައި ފަސް އަހަރު ވިސާ ނެތި ލަންކާގައި ދިރިއުޅޭ މީހެއް ހިމެނޭއިރު، ދެ އަހަރުގެ ކުޑަ ކުއްޖެއް ވެސް ހިމެނެއެވެ.
ރާއްޖޭގެ ފޮރިން މިނިސްޓްރީގެ ޑިރެކްޓަރ އޮފް ކޮމިއުނިކޭޝަންސް މިއުވާން މުހައްމަދު ވިދާޅުވީ ލަންކާއިން ދިވެހި އާއިލާއެއް ހައްޔަރުކުރި ކަމުގެ މައުލޫމާތު ލިބިފައިވާ ކަމަށާއި، އެކަން ބަލަމުންދާ ކަމަށެވެ.
ރާއްޖެއިން ބޭރުގައި ދިވެހިން އުޅޭއިރު، އެއުޅޭ ގައުމެއްގެ ގާނޫނާއި ގަވާއިދާ އެއްގޮތަށް އަމަލުތައް ބެހެއްޓުމަށް ފޮރިން މިނިސްޓްރީން ވަނީ އިލްތިމާސްކޮށްފަ އެވެ. ލަންކާގައި 2019ވަނަ އަހަރުގެ އީސްޓަރއާ ދިމާކޮށް ދިން ބޮމުގެ ހަމަލާތަކަށްފަހު ލަންކާގެ އަސްކަރިއްޔާއިން ދަނީ، އެ ގައުމުގައި ގަވައިދާ ހިލާފަށް އުޅެމުން އަންނަ ފަރާތްތަށް ދެނެގަނެ ހައްޔަރު ކުރުމުގެ އޮޕަރޭޝަނެއް ހިންގަމުންނެވެ.
