ޝަރީއަތް ނިމެންދެން ބަންދުގައި ބެހެއްޓުމަކީ އެއްވެސް ގޮތަކަށް ތާއިދުކުރާ ކަމެއް ނޫންކަމަށް ޕްރޮސިކިއުޓަރ ޖެނެރަލް (ޕީޖީ) ހުސައިން ޝަމީމް ވިދާޅުވެއްޖެއެވެ.
ރާއްޖެޓީވީގެ ފަލަސުރުހީ ޕްރޮގްރާމްގައި ވާހަކަ ދައްކަވަމުން ޕީޖީ ވިދާޅުވީ، ޖިނާއި އިޖްރާއަތުގެ ގާނޫނުގައި ވާގޮތުން، ބަންދުގައި މީހަކު ބަހައްޓައިފިކަމުގައި ވާނަމަ އެމީހެއްގެ މައްސަލަ 30 ދުވަހުގެ ތެރޭގައި ޕީޖީ އޮފީހަށް ފޮނުވަންޖެހޭ ކަމަށާއި ބަންދުކުރާ ތާރީހުން ފެށިގެން 30 ދުވަހުގެ ތެރޭގައި ޕީޖީ އޮފީހުން ދައުވާ ކުރުމާއި މެދު ގޮތެއް ނިންމަން ޖެހޭކަމަށެވެ. 30 ދުވަހަށް ވުރެ ދިގުމުއްދަތަކަށް ބަންދުގައި ބަހައްޓާނަމަ ޖެހޭނީ އެ މީހަކު ޝަރީއަތް ނިމެންދެން ބަންދުގައި ބަހައްޓަންކަމަށް ފާހަގަކުރައްވަމުން ޕީޖީ ވިދާޅުވީ ޝަރީއަތް ނިމެންދެން ބަންދުގައި ބެހެއްޓުމަކީ އެއްވެސް ގޮތަކަށް ތާއީދު ކުރާ ކަމެއް ނޫންކަމަށެވެ.
30 ދުވަހަށް ވުރެ ދިގުމުއްދަތަކަށް ކުށް ކުރާ މީހާ ބަންދުގައި ބަހައްޓަންޏާ މިޖެހެނީ އޭނަގެ ޝަރީއަތް ނިމެންދެން ބަންދުގައި ބަހައްޓަން. ޝަރީއަތް ނިމެންދެން ބަންދުގައި ބެހެއްޓުމަކީ އަޅުގަނޑު އެގޮތަކަށްވެސް ތާއިދު ކުރާ ކަމެއް ނޫން. އެއްވެސް އިރެއްގައި، މި މަގާމަށް އައުމުގެ ކުރިންވެސް، އަދި މިހާރުވެސް ތާއީދު ކުރާ ކަމެއް ނޫން.ޕްރޮސިކިއުޓަރ ޖެނެރަލް ހުސައިން ޝަމީމް
ޕީޖީ އިތުރަށް ވިދާޅުވީ ޖިނާއީ އިޖްރާއަތުގެ ގާނޫނު އޮތް ގޮތުން އަވަހަށް ޝަރީއަތް ނިންމަން ޖެހޭކަމަށާއި ޝަރީއަތް ނިންމުމަށްފަހު ވީހާވެސް އަވަހަކަށް އެމީހެއްގެ މައްޗަށް ހުކުމެއް ކުރަންޖެހޭކަމަށެވެ. ބަންދުގައި 269 މީހުނަށް ވުރެ ގިނައިން މިހާރުވެސް ތިބިކަން ފާހަގަކުރައްވައި ޕީޖީ ވިދާޅުވީ، ވަރަށް ގިނަ ދުވަސްތަކެއް ވަންދެން ބަންދުގައި މީހުން ތިބެންޖެހޭކަމަށެވެ. އެގޮތުން، އެވެރެޖްކޮށް މައްސަލައެއް ނިމެން 500 ދުވަސް ނަގާކަން ޕީޖީ ފާހަގަކުރެއްވިއެވެ.
ޕީޖީ ވިދާޅުވީ މިހާރުވެސް ޝަރީއަތް ނިމެންދެން ބަންދުގައި ތިބި މީހުންގެ ތެރޭގައި މައްސަލަ ވަކި ގޮތަކަށް ނުނިމި 5 އަހަރަށް ވުރެ ގިނަ ދުވަސްވެފައިވާ މީހުން އެބަތިބި ކަމަށެވެ. ޕީޖީ ވިދާޅުވީ މި ގޮތަށް ބަންދުގައި ތިބި މީހުންގެ ތެރޭގައި އެމީހެއްގެ މައްޗަަށް ކުށް ސާބިތުވެއްޖެނަމަ ލިބޭ އަދަބަށް ވުރެ، ނުވަތަ ހުކުމް ކުރާ ދުވަސްތަކަށް ވުރެ ގިނަ ދުވަސް ބަންދުގައި ބައެއް މީހުން ހޭދަކުރަންޖެހޭކަމަށެވެ.
ޖުމްލަ އެވްރެޖްއަށް ބަލާއިރު 500 ވަރަކަށް ދުވަސް އެބަ ނަގާ މައްސަލައެއް ނިމެން. އެބަތިބި 5 އަހަރަށް ވުރެ ގިނަ ދުވަސް 4 އަހަރަށް ވުރެ ގިނަ ދުވަސް ވަންދެން ބަންދުގައި ތިބި މީހުން. އަޅުގަނޑުމެން މި ކުރި މަސައްކަތަކީ މި މިގޮތަށް ބަންދުގައި ތިބި މީހުންގެ ތެރެއިން އެމީހެއްގެ މައްޗަށް ކުށް ސާބިތުވެއްޖެއްޔާ ލިބޭ އަދަބަށް ވުރެ ގިނަ ދުވަހު ބަންދުގައި ތިބެން އެބަޖެހޭ. މިސާލަކަށް ކުށް ސާބިތުވިޔަސް 3 އަހަރުގެ އަދަބެއް އަންނަ މައްސަލައެއްގައި ޝަރީއަތް ނިމެންދެން ބަންދުގައި ދެ އަހަރާއި ބައި 3 އަހަރާއި ބައި ވަންދެން ހުރީމާ ކަމަކު ނުދޭ/ޕްރޮސިކިއުޓަރ ޖެނެރަލް ހުސައިން ޝަމީމް
އެގޮތް ކަމުނުދާކަން ފާހަގަކޮށް ޕީޖީ ވިދާޅުވީ، އެގޮތަށް ތިބި މީހުން ބަލައި މިހާރު ޝަރުތު ތަކާއި އެކު ދޫކޮށްފައިވާނެކަމަށެވެ. އަދި މިހާރު ބަންދުގައި ތިބޭނީ އެއްގޮތަކަށްވެސް ދޫކޮށްލެވެން ނެތް މީހުން ކަމަށް ޕީޖީ ވިދާޅުވިއެވެ. ޕީޖީ ވިދާޅުވީ މަގާމާއި ހަވާލުވުމަށްފަހު ތަކުރާރުކޮށް އެކި މުއައްސާސާއަށް، ޝަރީއަތުގައި ތިބި މީހުންގެ މައްސަލަތައް ބެލުން އަވަސްކޮށްދިނުމަށް އެދިފައިވާނެކަމަށެވެ. ޖިނާއީ އިޖްރާއަތުގެ ގާނޫނުގައި ބުނާގޮތުން 70 ދުވަހުގެ ތެރޭގައި ޝަރީއަތް އާންމުކޮށް ނިމެންޖެހޭކަމަށާއި އެކަންތައް އެހެން ނުވާކަމަށެވެ.
