މި އަހަރުގެ ފަހުކޮޅު ކޮވިޑް-19އަށް ޚާއްސަ ވެކްސިން އުފެއްދޭނެ ކަމަށް ވައިޓް ހައުސްގެ އިމިއުނޮލޮޖިސްޓް ޑރ. އެންތަނީ ފައުސީ ވިދާޅުވެއްޖެއެވެ.

ޑރ. ފައުސީ ހަވާލާދީ ބޭރުގައި މީޑިއާތަކުގައި ރިޕޯޓު ކޮށްފައިވާ ގޮތުގައި ކޮވިޑް-19އާ ވެކްސިން އުފެއްދުމުގެ މަސައްކަތްތައް ކުރިއަށްދާ ކަމަށާއި، ޗެލެޖްތަކާ ކުރިމަތިވި ނަމަވެސް މިއަހަރުގެ ފަހުކޮޅު ނުވަތަ 2021 ވަނަ އަހަރުގެ ކުރީ ކޮޅު ކޮވިޑް-19 ށް ޚާއްސަ ވެކްސިނެއް ލިބޭނެ ކަމަށެވެ.

ކޮވިޑް-19 ހަލުވިމިނެއްގައި ފެތުރެމުންދާތީ ޑރ. ފައުސީ ވިދާޅުވީ ކުރިއަށް އޮތް ހަފްތާތަކަކީ މި ބަލި ވަރަށް ބޮޑަށް ފެތުރޭ ސަރަހައްދުތަކުން ބަލި ކޮންޓްރޯލް ކުރުމަށްޓަކައި މުހިންމު ފިޔަވަޅުތަކެއް އެޅުމަށް މުހިންމު ހަފްތާއެއް ކަމަށެވެ.

މީގެ އިތުރުން ޑރ. ފައުސީ ވިދާޅުވީ ކޮވިޑް-19ށް ޓެސްޓު ކުރުން މަދުކުރުމަށް އެއްވެސް މީހަކު އެއްވެސް އިރެއްގައި އޮފިޝަލުންނަށް އަންގާފައި ނުވާ ކަމަށެވެ. ކޮވިޑް-19 ޓެސްޓު ކުރުން މަދުކުރުމަށް އެމެރިކާގެ ރައީސް ޑޮނަލްޑް ޓްރަމްޕް ދައްކަވާފައިވާ ވާހަކަތަކަށް އަލިއަޅުއްވާލައްވާ ޑރ. ފައުސީ ވިދާޅުވީ ކޮވިޑް-19ށް ޓެސްޓު ކުރުމަށް މަދު ކުރުމަށް ޓްރަމްޕް ވާހަކަފުޅު ދައްކަވާފައިވަނީ މަޖަލަކަށް ކަމަށެވެ. އަދި ވިދާޅުވީ ޓެސްޓު ކުރާ މިންވަރު ކުޑަކޮށްފައިނުވާ ކަމަށެވެ.

ކޮވިޑް-19ގެ ޕޮޒިޓިވްވާ ކޭސްތައް އެންމެ ގިނައިން ރިޕޯޓު ކުރާ ގައުމަކީ އެމެރިކާއެވެ. އަދި މިހާތަނަށް މިބަލީގައި އެންމެ ގިނަ ބަޔަކު މަރުވީ ވެސް އެމެރިކާއިންނެވެ.

އެމެރިކާގެ ނެޝަނަލް އިންސްޓިޓިއުޓް އޮފް ހެލްތު އަދި ފްރެޑް ހަޓްޗިންސަން ކެންސަރ ރިސަރޗް ސެންޓަރުގެ ބަލިތަކުގެ ތަޖުރިބާކާރުން ބުނެފައި ވަނީ ޖެނުއަރީ މަހާ ހަމައަށް ވެކްސިންއެއް ތައްޔާރު ކުރުމަކީ އުނދަގޫ ޗެލެންޖެއް ކަމަށާއި، ނަމަވެސް އެއީ ކުރެވިދާނެ ކަމެއް ކަމަށެވެ.

ވެކްސިންއެއް އުފައްދަން ކުރަމުންދާ މަސައްކަތުގެ ދަށުން ގިނަ ރިސަރޗް ސެންޓަރުތަކުން ވަނީ ވެކްސިންގެ ކްލިނިކަލް ޓްރަޔަލް ފަށާފައެވެ. ނަމަވެސް ސީދާ ކޮވިޑް-19ށް އަސަރުކުރާނެ ވެކްސިންއެއް އުފައްދާ ލިބޭ ވަރުވާނީ ކޮން ދުވަހަކުކަމެއް އަދިވެސް ޔަޤީނެއް ނުވެއެވެ.