ސިޔާސީ، އިގުތިސާދީ އަދި އިޖްތިމާއީ ގޮތުން ރައްޔިތުން ބާރުވެރިކުރުވުމުގެ ނަމުގައި ހަރަކާތްތައް ހިންގަމުން އަންނަ "ނަވާނަވައި" މޫވްމެންޓުން ރައްޔިތުންގެ މަޖިލިސް އިދާރާ ސަރަޙައްދުގައި މުޒާހަރާ ކޮށްފިއެވެ.
ހޯމަ ދުވަހު 08:30 ގައި މަޖިލިސް އިދާރާ ގޭގެ ކުރިމަތީގައި ބޭއްވި މި މުޒާހަރާގެ ބައިވެރިން މަޖިލިސް ސަރަޙައްދުން ދުރުކޮށް، ފުލުހުން ވަނީ އެ ސަރަޙައްދުގައި ހަރަކާތްތެރިވެފައެވެ. އެއާއެކު މުޒާހަރާގެ ބައިވެރިން ވަނީ މަޖިލިސް އިދާރާ ކުރިމަތީގައި އޮންނަ ގޯޅި (އިންޑިއަން އެމްބަސީ ކުރިމަތީގައި) ފުލުހުން ކޯރޑަން ކޮށްފައިވާ ހިސާބުގައި މުޒާހަރާ ކުރިއަށް ގެންގޮސްފައެވެ.
ގާތްގަނޑަކަށް 10 ބައިވެރިން މުޒާހަރާގައި ބައިވެރިވެފައިވާއިރު، ކޮވިޑް-19 ގެ ސަބަބުން ވަޒީފާ ގެއްލި، ދިރިއުޅޭ ތަނުން ނުކުންނަން މަޖުބޫރުވެފައިވާ މީހުން ޙައްޤުތައް ކަށަވަރު ކޮށްދިނުމަށް މަޖިލީހުން މަސައްކަތް ނުކުރާ ކަމަށް ބުނެ، މުޒާހަރާގެ ބައިވެރިން ވަނީ އެކަމުގެ ކަންބޮޑުވުން ފާޅުކޮށްފައެވެ.
މުޒާހަރާ ކުރިއަށްގެންދާ ސަބަބާއި ގުޅޭގޮތުން "ރާއްޖެއެމްވީ"އަށް މައުލޫމާތު ދެއްވަމުން ނަވާނައިގެ ސްޕޯކްސްޕަރސަން ފާތިމަތު ސާއިރާ ވިދާޅުވީ، މި މުޒާހަރާއަކީ ކޮވިޑް-19 އާ ގުޅިގެން އިންކަމް ސަޕޯޓް އެލަވެންސް ލިބުނު މީހުންގެ އަދަދު ދަށްވުމުގެ އިތުރުން އެލަވަންސް ލިބުން ލަސްވުމާއި، އެލަވަންގެ ގޮތުގައި ލިބުނު އަދަދު ދަށްވުމާއި، ކޮވިޑް-19 ގެ ހާލަތުގައި ކުލި ނުދެއްކިގެން ގެތަކުން މީހުން ނެރެމުންދާ މައްސަލާގައި މަޖިލީހުން އެއްވެސް ފިޔަވަޅެއް އެޅިފައި ނުވުމާއި، އަންހެނުންނާއި ކުޑަކުދިންނަށް ރައްކަތެރިކަމަށްކުރާ ހޭދަ ދަށްވުމުގެ ސަބަބުން އެކަމަށް އަޑު އުފުލައި، އެ ޙައްޤުތައް ހޯދައިދިނުމަށް ކުރިއަށްގެންދާ ހަރާކާތެއް ކަމަށެވެ.
ވަރަށް ގިނަ މީހުންގެ އެލަވަންސްއެއް ނުލިބޭ، ކޮންޓްރެކްޓް ނެތިވެސް ވަރަށް ގިނަ މީހުން މަސައްކަތް ކުރުވާ، ކޮންޓްރެކްޓެއް ނެތް ބޭންކް އެކައުންޓެއް ނެތް މީހުން އެބަތިބި، ކަނޑާލި ކަމުގެ ލިއުން ނެތް ވަރަށް ގިނަ މީހުން އެބަތިބި، މިކަހަލަ ލިއުންތަކަކީ ބަޔަކު ޙާލުގައި ޖެހިފައި ތިއްބާ އެހީދޭއިރު ހޯދަން ޖެހޭ ލިއުންތަކެއް ނޫން، މަހުޖަނުން ހިންގާ ރިސޯޓުތަކަށް 300ށް ވުރެ ގިނަ މިލިއަން ރުފިޔާގެ ފައިސާގެ ލޯނު ދީފި ރައްޔިތުންގެ ބޭންކުން، އެކަމަކު 40،000ށް ވުރެ ގިނަ މަސައްކަތްތެރިން، އާއިލާތައް ކައިބޮއި ކުލި ދެއްކޭނެ ގޮތެއް ނެތިފައި ތިއްބައި އަދިވެސް 300ށް ވުރެ ގިނަ މީހުންނަށްވެސް އެލަވަންސް ދީފައެއް ނެތް.ނަވާނައިގެ ސްޕޯކްސްޕަރސަން ފާތިމަތު ސާއިރާ
ސާއިރާ އިތުރަށް ވިދާޅުވީ، އެކަންތައްތަކަށް މަޖިލީހުގެ މެމްބަރުން އަޑުއުފުލާފައި ނުވާ ކަމަށާއި، މިހާތަނަށްވެސް އެކަމަށް ހައްލެއް ހޯދުމަށް މަޖިލީހުން މަސައްކަތް ކޮށްފައިނުވާ ކަމަށެވެ.
އޭގެ އިތުރުން، މާލެ ސަރަޙައްދު ތަރައްޤީ ކުރުމަށް ކުރާ ހޭދަ އަތޮޅު ތެރެއަށް ނުކުރުމާއި، އަތޮޅު ތެރޭގައި ކޮވިޑް-19 ގެ ޓެސްޓް ހެދޭނެ އިންތިޒާމުތައް ހަމަޖެއްސުމަށްވެސް މުޒާހަރާގެ ބައިވެރިން ގޮވާލާފައިވެއެވެ.
މަޖިލިސް ނިމޭ ގަޑީގައިވެސް މުޒާހަރާ ކުރުމަށް ނިންމާފައިވާއިރު، ނަވާނަވައިން ވަނީ ވިހާވެސް ގިނަ ބަޔަކު މުޒާހަރާ އަށް ދިޔުމަށް އެދިފައެވެ. އަދި އެންމެންވެސް މާސްކު އަޅައިގެން ތިބުމަށާއި، ގައިދުރުކަން ބެހެއްޓުމަށް ނަވާނަވައިން އިލްތިމާސްކުރެއެވެ. އެގޮތުން ހެނދުނު ގަޑީގައި ކުރިއަށް ގެންދިޔަ މުޒާހަރާގައިވެސް ބައިވެރިން ތިބީ މާސްކް އަޅައި، މަސައްކަތްތެރިންގެ ޙައްޤުތަކަށް ގޮވާލާ ބެނަރ ތަކާއި ބޯޑުތައް ހިފައިގެންނެވެ.
މުޒާހަރާ ކުރިއަށް ގެންދިޔަ ސަރަޙައްދުގައި ގިނަ އަދަދެއްގެ ފުލުހުންވެސް ހަރަކާތްތެރިވިއެވެ.
