ރާއްޖެއަށް ދަތުރުކުރަން އެދެމުން އަންނަ ފްލައިޓްތަކަށް ޝެޑިއުލް ނެހެދިގެން އުޅެނީ، ބޯޑަރަށް ހަދާ ގޮތެއް ނޭނގިގެން ކަމަށް މޯލްޑިވްސް އެއަރޕޯޓްސް ކޮމްޕެނީ ލިމިޓެޑް (އެމްއޭސީއެލް) ގެ އެކްޓިންގ މެނޭޖިންގ ޑިރެކްޓަރު މޫސާ ސޯލިހު ވިދާޅުވެއްޖެއެވެ.

ރައްޔިތުންގެ މަޖިލިހުގެ އެސްއޯއީ ކޮމިޓީގައި، ބޯޑަރު ހުޅުވާ ދުވަހަކާ ގުޅޭގޮތުން މެމްބަރަކު ކުރި ސުވާލަކަށް ޖަވާބުދެއްވަމުން މޫސާ ސޯލިހު ވިދާޅުވީ، އެންމެ ފުރަތަމަ މައުލޫމާތު ލިބުނީ ޖުލައި މަހުގެ 15ގައި ބޯޑަރު ހުޅުވާލަން ތައްޔާރުވަމުން އަންނަ ވާހަކަ ކަމަށެވެ. ނަމަވެސް، މިހާރު މި ތާރީހު އޮގަސްޓް މަހުގެ 1ވަނަ ދުވަހަށް ޝިފްޓްވާ ތަން ފެންނަ ކަމަށް ވިދާޅުވިއެވެ.

އެއަރލައިންތަކުގެ ރިކުއެސްޓްތައް އަންނަ އިދާރާގެ ހައިސިއްޔަތުން ސިވިލް އޭވިއޭޝަނުން މި ތާރީހަށް މަޑުކުރަމުން އަންނަ ކަމަށް ފާހަގަކުރައްވާ ސޯލިހު ވިދާޅުވީ، ސިވިލް އޭވިއޭޝަނަށްވެސް ޖަވާބެއް ނުދެވިގެން އުޅެނީ ބޯޑަރު ހުޅުވާލާނެ ތާރީހަކަށް "އާނއެކޭ" ނުބުނެގެން ކަަމަށް ވިދާޅުވިއެވެ.

މޫސާ ސޯލިހު އިތުރަށް ވިދާޅުވީ، ޖުލައި 1ގައި ބޯޑަރު ހުޅުވާލަން ނިންމި ކަމުގައިވީ ނަމަވެސް އެމްއޭސީއެލް އޮތީ ތައްޔާރަށް ކަމަށެވެ. އަދި ނިއު ނޯމަލްގައި އެއަރޕޯޓުގައި އަމަލުކުރާނެ ގޮތުގެ ކަރުދާސް ތައްޔާރުކޮށް ނިމިފައިވާއިރު، މިހާރު އޮތީ ރަސްމީކޮށް އެންޑޯޒްކުރުން ކަމަށް އޭނާ ވިދާޅުވިއެވެ.

ކޮމިޓީގައި ވާހަކަ ދެއްކެވި އެ ކުންފުނީގެ އިބްރާހިމް ހުސައިން ވިދާޅުވީ ނިއު ނޯމަލްގައި ފެށިގެންދާއިރު، ދުވާލެއްގެ މައްޗަށް 10 އިންޓަރނޭޝަނަލް ފްލައިޓް ޖައްސާނެ ކަމަށެވެ. ދަތުރުތައް ފަށަން އެދުނު އިންޓަރނޭޝަނަލް އެއަރލައިންތަކުގެ ތެރޭގައި ސްރީލަންކަން، އެމިރޭޓްސް، އިންޑިގޯ އަދި ގަތަރު ހިމެނޭ ކަމަށް އޭނާ ވިދާޅުވިއެވެ. މިއީ ކުރިން ހޭންޑްލް ކުރި ރޭޓަށް ބަލާއިރު، ތިިން ގުނަ ދަށް އަދަދެއް ކަން އޭނާ ފާހަގަކުރެއްވިއެވެ.

ރާއްޖޭގެ ފަތުރުވެރިކަމުގެ ހައި ސީޒަން (ޑިސެމްބަރު-މާރޗު) އަންނަންވާއިރަށް މި އަދަދުތައް އިތުރުވެގެން ދާނެ ކަމަށް މޫސާ ސޯލިހު ވިދާޅުވިއެވެ. އެގޮތުން އެ ދުވަސްވަރު ރާއްޖެއަށް ދަތުރުތައް ފެށުމަށް ޝައުގުވެރިކަން ހުރި އެއަރލައިންތަކުން، ސްލޮޓްތައް ބުކް ކުރަމުންދާ ކަމަށް ވިދާޅުވިއެވެ.

ރާއްޖެ އަންނާނެ ފަސިންޖަރުންގެ އަދަދާއި ގުޅޭގޮތުން ވާހަކަދައްކަވަމުން، މޫސާ ސޯލިހު ވިދާޅުވީ އެމްއޭސީއެލްއިން އޮތީ އަންނަ މީހުންގެ އަދަދުތައް އިތުރުވާނެ މިންވަރަށް ހިދުމަތް ދިނުމަށް ތައްޔާރަށް ކަމަށެވެ. އަދި ގައިދުރުކަމާއި، އެޗްޕީއޭ އަދި ބައިނަލްއަގްވާމީ ޖަމިއްޔާތަކުގެ ގައިޑްލައިންތަކާ އެއްގޮތަށް، ފުލް ފްލައިޓަކަށް 20 މިނިޓުގެ ތެރޭގައި ހިދުމަތް ދެވޭނެ ކަމަށް ވިދާޅުވިއެވެ.

އެމްއޭސީއެލްގެ ކެޕޭސިޓީ އަންދާޒާ ކޮށްފައިވަނީ، ފާއިތުވި ދުވަސްތަކުގެ ތެރޭގައި އެއަރޕޯޓުން ދަތުރުކޮށްފައިވާ ފަރާތްތަކަށް ހިދުމަތް ދިނުމަށް ފަހު އެއްކުރި މައުލޫމާތުގެ މައްޗަށް ބިނާކޮށެވެ. އެ ކުންފުނިން ބުނީ ފާއިތުވި 45 ދުވަހުގެ ތެރޭގައި އެއަރޕޯޓުން ފުރާފައިވަނީ 7000 ފަސިންޖަރުން ކަމަށާއި، 1000ށް ވުރެ ގިނަ މީހުން ރާއްޖެއަށް އައި ކަމަށެވެ.

ރާއްޖޭގެ ބޯޑަރު ހުޅުވާލާނެ ރަސްމީ ތާރީހެއް މިހާތަނަށް އިއުލާން ކޮށްފައި ނުވީ ނަމަވެސް، އަންނަ ޖުލައި މަހުގެ ތެރޭގައި ރާއްޖެ އަންނަން ބޭނުންވާ ފަތުރުވެރިންނަަން މަރުހަބާ ކިޔުމަށް ޓޫރިޒަމް މިނިސްޓްރީން އަންނަނީ ތައްޔާރީތައް ވަމުންނެވެ.

ބޯޑަރު ހުޅުވާލުމުގެ ކުރިން ތައްޔާރުކުރަން ޖެހޭ، ސޭފް ޓޫރިޒަމް ގައިޑްލައިންގެ ފައިނަލް ދެލިކޮޕީ ޓޫރިޒަމް މިނިސްޓްރީން ވަނީ ރައީސް އިބްރާހިމް މުހައްމަދު ސޯލިހާ ހިއްސާކޮށްފައެވެ. މި ލިޔުން ހިއްސާކުރި، "ނެޝަނަލް ޓާސްކްފޯރސް އޮން ރެސިލިއަންސް ބިލްޑިންގް އެންޑް އިކޮނޮމިކް ރިކަވަރީ"ގެ ފުރަތަމަ ބައްދަލުވުމުގައި، ދެން އޮންނަ ޓާސްކްފޯސް ބައްދަލުވުމެއްގައި ގައިޑްލައިނާ މެދު ގޮތެއް ނިންމާނެ ކަމަށް ރައީސް އޮފީހުން ވަނީ މައުލޫމާތު ދީފައެވެ.