ކޯވިޑް-19އާ ގުޅިގެން މީޑިއާތަކަށް ކުރިމަތިވާ ގޮންޖެހުންތައް ހައްލުކޮށްދޭން ދައުލަތުގެ ކަމާގުޅޭ އިދާރާތަކުގައި މޯލްޑިވްސް މީޑިއާ ކައުންސިލުން އެދިއްޖެއެވެ.
އާދިއްތަ ދުވަހުގެ ރޭ އެމްއެމްސީން ނެރެފައިވާ ބަޔާނެއްގައި ވަނީ، ކޯވިޑް-19 ރޯގާގެ ސަބަބުން މީޑިއާތަކަށް ކުރިމަތިވެފައިވާ ގޮންޖެހުންތައް ބެލުމަށް އެ ކައުންސިލުގެ ފަރާތުން ކުރެވުނު ސާވޭއިން ހޯދުނު ހޯދުންތަކުގެ މައްޗަށް ބިނާކޮށް މި ހާލަތުގައި މީޑިއާތަކަށް ދިމާވެފައިވާ ގޮންޖެހުންތަކާއި ހުރަސްތައް ނައްތާލަ ދިނުމަށް، ފިޔަވަޅު އަޅައި ދިނުމަށް، ދައުލަތުގެ 13 އިދާރާއެއްގައި ކައުންސިލުގެ ފަރާތުން ރަސްމީކޮށް އެދިފައިވާނެ ކަމަށެވެ.
ސިޓީއާ އެކު ސާވޭ، އެމްއެމްސީގެ ސަރވޭ ރިޕޯޓްވެސް އެ އިދާރާތަކާ ވަނީ ހިއްސާކޮށްފައިވާ ކަމަށެވެ. އެމްއެމްސީގެ ފަރާތުން ވަނީ މި ސަރވޭ ރިޕޯޓް ރައީސުލްޖުމްހޫރިއްޔާގެ އޮފީހާއި މިނިސްޓްރީ އޮފް ހޯމްއެފެއާޒްއާ ހިމެނެއެވެ.
އެމްއެމްސީން ސިޓީ ފޮނުވި އިދާރަތަކާއި ހައްލުކޮށްދޭން އެދުނު ކަންތައްތައް
- ސާވޭގައި ބައިވެރިވި މީޑިއާތަކުގެ އާމްދަނީ 80-60 އިންސައްތަ ދަށްވެފައިވާ ކަމަށް ފާހަގަކޮށްފައި ވާތީ، ރިލީފް ލޯނުގެ ފައިސާ ދޫކުރުން އަވަސް ކޮށްދިނުމަށާއި އިންކަމް ސަޕޯޓް އެލަވަންސް ސްކީމުން ނޫސްވެރިންނަށް ވެސް ފުރުޞަތު ދިނުމަށް އެދި މިނިސްޓްރީ އޮފް އިކޮނޮމިކް ޑިވަލޮޕްމަންޓާއި، އެސްއެމްއީ ޑިވަލޮޕްމަންޓް ފައިނޭންސް ކޯޕަރޭޝަން (އެސްޑީއެފްސީ) ގައި އެދުން.
- އޮންލައިން ނޫސްތައް ހިންގުމަށް އިންޓަނެޓަކީ އަސާސީ ޚިދުމަތަކަށް ވާތީ، މީޑިއާތަކަށް ހާއްސަ އިންޓަނެޓް ޕެކޭޖްތަކެއް ތަޢާރަފްކޮށްދީ އިންޓަނެޓްގެ އަގު މީޑިއާތަކަށް ހެޔޮކޮށް ދިނުމަށް އެދި، ރާއްޖޭގެ ތިން ޓެލެކޮމް ކުންފުނި ކަމަށްވާ، ދިރާގައި، އުރީދޫ، އާރުއޯއެލް އަދި މިނިސްޓްރީ އޮފް ސައިންސް އެންޑް ޓެކްނޮލޮޖީގައި ދެންނެވުން.
- ސަރުކާރު ހިއްސާވާ ކުންފުނިތަކުން މީޑިއާތަކަށް އިޝްތިހާރު ދިނުމުގައި ހަމަހަމަ އުސޫލުތަކާއި މެރިޓަށް ނުބަލާ ކަމަށް ގިނަ މީޑިއާތަކުން ސާވޭއަށް މައުލޫމާތު ދީފައި ވާތީ، ދައުލަތުގެ ކުންފުނިތަކުގެ ކަންކަން ބަލަހައްޓާ ޕްރައިވެޓައިޒޭޝަން އެންޑް ކޯޕަރަޓައިޒޭޝަން (ޕީސީބީ) ގެ ސަމާލުކަމަށް އެކަން ގެނައުން.
- ކޯވިޑް-19 އާ ގުޅޭ ބައެއް މައުލޫމާތުތައް ހޯދުމާއި އެހެނިހެން ވެސް މައުލޫމާތުތައް މީޑިއާތަކުން ހޯދުމަށް ދައުލަތުގެ ބައެއް އިދާރާތަކުން ބޮޑެތި ދަތިތަކާއި ހުރަސްތައް ކުރިމަތިވާ ކަމާއި ބައެއް ތަންތަނުން އެއްގޮތަކަށް ވެސް މައުލޫމާތު ނުދޭ ކަމަށް މީޑިއާތަކުން ފާހަގަ ކުރާތީ އެކަން ވަނީ އިންފޮމޭޝަން ކޮމިޝަނަރުގެ ސަމާލުކަމަށް ގެނައުން.
- ކޮމިޔުނިޓީ ނޫސްތަކަށް މައުލޫމާތު ފޯރުކޮށް ދިނުމުގައި ސިޓީ ކައުންސިލްތަކުން ބޮޑެތި ފިއްތުންތަކެއް ކުރިމަތި ކުރާ ކަމަށް، އެފަދަ ނޫސްތަކުން ފާހަގަ ކުރާތީ އެކަން އިސްލާހުކޮށް ދިނުމަށް، ލޯކަލް ގަވަރމަންޓް އޮތޯރިޓީ އާއި އައްޑޫ ސިޓީ ކައުންސިލް އަދި ކުޅުދުއްފުށީ ކައުންސިލްގައި ދެންނެވުން.
އެމްއެމްސީގެ ފަރާތުން އެ އިދާރާތަކަށް ފޮނުވި ސިޓީގައި، އެދިފައިވާ ކަންކަން ހައްލުކޮށް ދިނުމަށް އިދާރާތަކުން އަޅާނެ ފިޔަވަޅުތައް ކައުންސިލަށް އަންގައިދިނުމަށް އެދިފައިވާނެ ކަމަށެވެ. އެ ކަންކަން އިސްލާހުވަމުން އަންނަ މިންވަރު ކައުންސިލުން ބަލަމުން އަންނާނެ ކަމަށްވެސް އެމްއެމްސީގެ ބަޔާނުގައި ވެއެވެ.
މި ހާލަތުގައިވެސް މައުލޫމާތު ފޯރުކޮށްދިނުމުގައި ހަރަކާތްތެރިވާ ނޫސްވެރިންނަށް ހިތްވަރުދެމުން، އެމްއެމްސީން ވަނީ ނޫސްވެރިންގެ ހައްގުތައް ދިފާއުކުރުމުގައި އެ ކައުންސިލުން މަސައްކަތް ކުރަމުންގެންދާނެ ކަމުގެ ޔަގީންކަން އަރުވާފައެވެ.
