ހެނދުނުގެ ނާސްތާ އަދި ސްޓޭޝަނަރީ ފޯރުކޮށްދޭންވީ، އެކަމަށް އެންމެ ބޭނުންވާ ދަރިވަރުންނަށް ކަމަށް ދެކިވަޑައިގަންނަވާ ކަމަށް އެޑިއުކޭޝަން މިނިސްޓްރީގެ ސްޓޭޓް މިނިސްޓަރު ޑރ. ޢަބްދުﷲ ރަޝީދު އަހުމަދު ވިދާޅުވެއްޖެއެވެ.
އާދިއްތަ ދުވަހު ބޭއްވި ރައްޔިތުންގެ މަޖިލީހުގެ ގައުމީ ތަރައްގީއާ ތަރިކައާ ބެހޭ ކޮމިޓީގައި ވާހަކަ ދައްކަވަމުން އެޑިއުކޭޝަން މިނިސްޓްރީގެ ސްޓޭޓް މިނިސްޓަރު ވިދާޅުވީ، ހުރިހާ ދަރިވަރުންނަށް ފޮތް ފަންސުރު ފަދަ ކިޔެވުމަށް ބޭނުންވާ ތަކެތި ސަރުކާރުން ފޯރުކޮށް ދޭން ނުޖެހޭ ކަމަށެވެ.
ކުރިޔަށް އޮތް ތަނުގައި އިންކަމް ޓެކްސް ނަގަން ފެށުމުން ކޮންމެ މީހަކަށްވެސް އާމްދަނީގެ ގޮތުން ލިބެން އޮންނަ އެއްޗެއް ފެންނަަން އޮންނާނެކަން ފާހަގަކުރައްވަމުން ޑރ. އަބްދުﷲ ރަޝީދު ވިދާޅުވީ، އޭނާގެ ނަޒަރުގައި ހެނދުނުގެ ނާސްތާ އާއި ފޮތް ފަންސުރު ދޭން ވާނީ ވަކި ވަރެއްގެ އާމްދަނީ ލިބޭ ފަރާތްތަަކަށް ކަމަށެވެ.
އަޅުގަނޑު ދެކޭ ގޮތުގައި ނާސްތާވެސް އަދި ފޮތް ފަންސުރުވެސް ވެސް ފޯރުކޮށްދޭން ޖެހޭނީ އެކަމަށް ބޭނުންވާ މީހުންނަށް.ޑރ. އަބްދުﷲ ރަޝީދު - އެޑިއުކޭޝަން މިނިސްޓްރީގެ ސްޓޭޓް މިނިސްޓަރު
ކިޔަވާ ހުރިހާ ދަރިވަރުންނަށް ނާސްތާ ފޯރުކޮށް ދިނުމަކީ ރައީސް އިބްރާހިމް މުހައްމަދު ސޯލިހުގެ ރިޔާސީ ވައުދުފުޅެކެވެ. ރާއްޖޭގެ ހުރިހާ ސްކޫލުތަކެއްގައި ހެނދުނުގެ ނާސްތާ ދިނުމުގެ ޕްރޮގްރާމް ފަށާފައިވަނީ މިދިޔަ އަހަރުގެ ޖޫން މަހުއެވެ. ނާސްތާ ޕްރޮގްރާމްގެ ފުރަތަމަ އަހަރަށް 123 މިލިއަން ރުފިޔާގެ ބަޖެޓެއް ސަރުކާރުން ވަނީ ކަނޑައަޅާފައެވެ.
