ނައިބް ރައީސް ފައިސަލް ނަސީމް މާފަންނު މާވެޔޮ މިސްކިތަށް ޒިޔާރަތްކުރައްވައިފިއެވެ.
ހުކުރު ދުވަހު އިސްލާމިކް މިނިސްޓްރީން ކޮށްފައިވާ ޓުވީޓެއްގައި ބުނެފައިވަނީ ނައިބު ރައީސް އެ މިސްކިތަށް ޒިޔާރާތް ކުރައްވާ، އެ މިސްކިތް ބައްލަވާލައްވާފައިވާ ކަމަށެވެ.
ރާއްޖެޓީވީގެ ފަލަސުރުހީ ޕްރޮގްރާމްގައި ވާހަކަދައްކަވަމުން އިސްލާމިކް މިނިސްޓަރު ޑރ. އަހްމަދު ޒާހިރު އަލީ ވިދާޅުވެފައިވަނީ މާވެޔޮ މަގުގައި ހުންނަ ބަހާއުއްދީން މިސްކިތް ނުވަތަ މާވެޔޮ މިސްކިތް އެއްކޮށް ނިމި, ހުޅުވަން ތައްޔާރުވެފައިވާ ކަމަށެވެ. އަދި މިސްކިތުގެ ހުރިހާ މަސައްކަތެއް ނިމިފައިވާ ކަމުގެ މައުލޫމާތު ލިބިފައިވާ ކަމަށާއި، ހުޅުވާނެ ތަރީހަކާ މެދު މަޝްވަރާ ކުރެވެމުންދާ ކަމަށެވެ.
އެ މިސްކިތް އަލުން އިމާރާތްކޮށް ނިންމާފައި ވަނީ މިސްކިތް ތަޅާލިތާ ގާތްގަނޑަކަށް ހަތަރު އަހަރުވާން ކައިރިވެފައިވަނި ކޮށެވެ. މާވެޔޮ މިސްކިތް އަލުން އިމާރާތްކޮށްފައިވަނީ 2000 މީހުންނަށްވުރެ ގިނަ މީހުންގެ ޖާގަ ހިމެނޭ ގޮތަށް ހަ ބުރިއަށެވެ.
