އަންނަ އާދީއްތަ ދުވަހު ހިފާ އެނިޔުލަރ އެކްލިޕްސް (އަނގޮޓިކޭތަ) ރާއްޖެއަށް ފެންނާނީ، ފަޅި ކޭތައެއްގެ ގޮތުގައި ކަމަށް ކުރީގެ ރައީސް މައުމޫން އަބްދުލް ގައްޔޫމް ވިދާޅުވެއްޖެއެވެ.

ފަލަކީ އިލްމުވެރިންނާ ހަވާލާދީ ރައީސް މައުމޫން ނެރުއްވި ބަޔާނެއްގައި ވިދާޅުވީ، ރާއްޖެއަށް މި ކޭތަ ހިފަން ފަށާނީ، ހެނދުނު 9:31 ގައި ކަމަށެވެ. އެންމެ ބޮޑަށް ހިފާފައި ހުންނާނީ، 10:51 ގައި ކަމަށާއި ކޭތަ މުޅިން ވީއްލާނީ، މެންދުރު 12:14 ގައި ކަމަށް ރައީސް މައުމޫން ވިދާޅުވި އެވެ.

އިރުކޭތަ ތިން ގޮތަކަށް ހުރެއެވެ. އެއް ގޮތަކީ، ޓޯޓްލް އެކްލިޕްސްއެވެ. ފުރިހަމަ ކޭތައެވެ. އެ ކޭތަ ހިފާފައި ހުންނައިރު އިރުގެ އެއްވެސް ތަންކޮޅެއް ފެންނާކަށެއް ނުހުންނާނެއެވެ. ފެންނާނީ، ވަށައިގެން ގަދަ އައްޔެއް ހުރި ކަޅު ބޯޅައެއްގެ ސިފައިގައެވެ. ދެވަނަ ގޮތަކީ، އިރުގެ ފަޅި ކޭތައެވެ. ޕާޝަލް އެކްލިޕްސް އެވެ. މި ކޭތަ ހިފާފައި ހުންނައިރު، އިރުގެ އެއްބައި ފެންނަން ހުންނާނެއެވެ. އަނެއް ބައި ހުންނާނީ ފޮރުވިފައެވެ.

ތިންވަނަ ގޮތަކީ، އެނިޔުލަރ އެކްލިޕްސް އެވެ. ނުވަތަ [އަނގޮޓި] ކޭތައެވެ. މި ކޭތަ ފެންނައިރު ހީވާނީ ބޮޑު ކަޅު ބޯޅައެއްގެ ވަށައިގެން ވަރަށް ހަނި އަލި ބޮޅެއް ހުންނަ ހެންނެވެ. އަނގޮޓިއެއްގެ ސިފައިގައެވެ. މީގެ ކުރިން މިފަދަ އަނގޮޓި ކޭތައެއް ރާއްޖެއަށް 2010 ވަނަ އަހަރުގެ ޖަނަވަރީ މަހުގެ 15 ދުވަހު ފެނުނު ކަމަށް ކުރީގެ ރައީސް މައުމޫން ވިދާޅުވި އެވެ.

އަންނަ އާދީއްތަ ދުވަހު ހިފާ އިރުކޭތަ، އަނގޮޓިއެއްގެ ގޮތުގައި އެފްރިކާއާއި އޭޝިޔާގެ ވަރަށް ގިނަ ސަރަޙައްދުތަކަށް ފެންނާނެއެވެ. އޭގެތެރޭގައި ސެންޓްރަލް އެފްރިކަން ރިޕަބްލިކް، ކޮންގޯ، އިތިއޯޕިޔާ، ޕާކިސްތާނުގެ ދެކުނު ސަރަޙައްދު، އިންޑިޔާގެ އެންމެ އުތުރު ސަރަޙައްދާއި ޗައިނާ ހިމެނެއެވެ.

ފަޅި ކޭތައެއްގެ ގޮތުގައި މި ކޭތަ ފެންނާނެ ގައުމުތަކުގެ ތެރޭގައި، ދިވެހިރާއްޖެ އާއި، އުތުރު އަދި އިރުމަތީ އެފްރިކާގެ ގައުމުތަކާއި، ޔޫރަޕްގެ އިރު ދެކުނު ސަރަޙައްދާއި، އޭޝިޔާގެ ގިނަ ޤައުމުތަކާއި، އޮސްޓްރޭލިޔާގެ އުތުރު ސަރަޙައްދު ހިމެނެއެވެ.

އިރާއި ހަނދުގެ ކޭތަތަކަށް ބަލާއިރު، އަހަރަކު ޖުމްލަ ދެ ކޭތައާއި ޖުމްލަ ހަތް ކޭތައާއި ދެމެދުގެ އަދަދަކަށް ކޭތަ ހިފާނެއެވެ. ޖުމްލަ ދެ ކޭތަ ހިފާ އަހަރެއް ނަމަ، އެވާނީ އިރުގެ ދެ ކޭތަ ކަމަށެވެ. ޖުމްލަ ހަތް ކޭތަ ހިފާ އަހަރެއް ނަމަ، ހިފާނީ އިރުގެ ފަސް ކޭތަ އާއި ހަނދުގެ ދެ ކޭތައެވެ. ނުވަތަ އިރުގެ ހަތަރު ކޭތަ އާއި ހަނދުގެ ތިން ކޭތައެވެ.