ކުޑަ ކުދިން ކުޅުމުގައި ބޭނުންކުރާ ''ކުޅޭ އެއްޗެހި'' ނުވަތަ ''ކުޅޭ ސާމާނު'' އެއްކުއްޖެއް އަނެއް ކުއްޖަކާ ޝެއަރ ނުކުރުމަށް އިލްތިމާސްކޮށްފިއެވެ.

ކޮވިޑް-19އާ ގުޅިގެން މާލެސިޓީގައި އިއުލާން ކޮށްފައިވާ ލޮކްޑައުންއަށް ވަނީ ލުއިތަކެއް ދީފައެވެ. އެގޮތުން ދެވަނަ ފޭސްގައި ހަވީރު 16:00 ން 18:00 ށް ބެލެނިވެރިއާއެކު ބޭރަށް ނުކުމެވެއެވެ. ނަމަވެސް ދާއިމީ ބައްޔަކަށް ބޭސް ކުރާ ކުއްޖެއްނަމަ، އަދި ބަލިހާލަތު ތަން ނުދޭނަމަ ބޭރަށް ނުނެރުމަށް އެންއީއޯސީގެ ޑޮކްޓަރުންގެ ޓީމުން އިލްތިމާސް ކުރެއެވެ.

ބުރާސްފަތި ދުވަހުގެރޭ ނެޝަނަލް އިމަރޖެންސީ އޮޕަރޭޝަން ސެންޓަރ (އެންއީއޯސީ) ގައި ބޭއްވި ނޫސްވެރިންގެ ބައްދަލުވުމުގައި ހެލްތް ޕްރޮޓެކްޝަން އެޖެންސީ (އެޗްޕީއޭ) ގެ އެޕިޑަމޮލޮޖިސްޓް ޑރ. އިބްރާހިމް އަފްޒަލް ވިދާޅުވީ ކުޑަ ކުދިން ގޮވައިގެން ބޭރަށް ނުކުންނައިރު ބެލެނިވެރިން ޚާއްސަ ސަމާލުކަމެއް ދޭންޖެހޭ ކަމަށެވެ.

ޑރ. އަފްޒަލް ވިދާޅުވީ މިހާލަތުގައި ކުޑަކުދިން ގޮވައިގެން ބޭރަށް ނުކުންނައިރު އަމަލުކުރަން ޖެހޭ ގޮތުގެ އިރުޝާދު އެކުދިންނަށް ދޭން ޖެހޭ ކަމަށާއި، ހޭޑް ސެނިޓައިޒަރ ބޭނުން ކުރުމުގެ އާދަ ހިފަހައްޓުވަން ޖެހޭ ކަމަށެވެ. އަދި ވިދާޅުވީ ކުޑަ ކުދިން ކުޅުމަށް ބޭނުން ކުރާ ކުޅޭ ސާމާނު އެއްކުއްޖެއް އަނެއް ކުއްޖަކާ ޝެއަރ ކުރުން ރަނގަޅު ނޫން ކަމަށެވެ. ކުޅޭ އެއްޗެހި އެއްކުއްޖެއް އަނެއް ކުއްޖަކާ ޝެއަރ ކުރުމަކީ ވެސް ބަލި ފެތުރުން މެދުވެރިވާނެ ސަބަބެއް ގޮތުގައި ޑރ. އަފްޒަލް ސިފަކުއްރެއްވިއެވެ.

މިހާރުގެ ރާއްޖޭގެ ހާލަތަށް އަލިއަޅުއްވާލައްވާ ޑރ.އަފްޒަލް ވިދާޅުވީ ޕޮޒިޓިވްވާ ކޭސްތައް މަދުވާ ކަމަށާއި، މިހާރު ފެނިފައިވާ ކޭސްތަކުގެ ތެރޭގައި ގިނާއީ އަލާމަތް ނުފެންނަ ކޭސްތައް ކަމަށެވެ. އަދި ބިދޭސީންނާއި ދިވެހިންނާ އަޅާބަލާއިރު ވަރަށް އެއްވަރެއްގައި ހިފެހެއްޓިފައިވާ ކަމަށް ޑރ. އަފްޒަލް ވިދާޅުވިއެވެ.