ކަރަންޓީނު ފެސިލިޓީއެއްގެ ގޮތުގައި ފަން އައިލެންޑް ރިސޯޓު ބޭނުން ކުރުން ހުއްޓާލައިފިއެވެ.
ބުރާސްފަތި ދުވަހުގެރޭ ނެޝަނަލް އިމަރޖެންސީ އޮޕަރޭޝަން ސެންޓަރ (އެންއީއޯސީ) ގައި ބޭއްވި ނޫސްވެރިންގެ ބައްދަލުވުމުގައި ކޮވިޑް-19 ޓާސްކްފޯހުގެ ތަރުޖަމާނު މަބްރޫކު އަޒީޒް ވިދާޅުވީ ފަން އައިލެންޑް ކަރަންޓީނު ފެސިލިޓީ މިހާރު ކަރަންޓީނު ފެސިލިޓީއެއްގެ ގޮތުގައި ބޭނުން ކުރުން ހުއްޓާލެވިފައިވާ ކަމަށެވެ.
އެގޮތުން މިހާރު ކަރަންޓީނު ކެޕޭސިޓީ ގޮތުގައި ހުރީ 2،531 އެނދު ކަމަށް މަބްރޫކް ވިދާޅުވިއެވެ. އަދި ޓްރާންސިޓް ކަރަންޓީނުގެ ގޮތުގައި 438 މީހުން އެބަތިބިން މަބްރޫކް ފާހަގަކުރެއްވިއެވެ.
އަދި ކޮންޓެކްޓް ޓްރޭސިންގެ ތެރެއިން ފާހަގަކުރެވިގެން ކަރަންޓީނު ކުރެވިފައިވާ 215 މީހަކުވެސް އެބަތިއްބެވި. ދެން މިއަދު ކަރަންޓީނު ފެސިލިޓީތަކުން ސާމްޕަލްތައް ނެގި ނަތީޖާ ނެގެޓިވްވުމާއެކު 191 މީހަކު ވަނީ ދޫކޮށްލެވިފައި. 112 މީހެއްގެ ސާމްޕަލް ނެގިފައިވޭ.ކޮވިޑް-19 ޓާސްކްފޯހުގެ ތަރުޖަމާނު މަބްރޫކު ޢަޒީޒް
ކޮވިޑް-19 މުޅި ރާއްޖެއަށް ފެތުރިއްޖެ ހާލަތެއްގައި އެކަހެރި ކުރަންޖެހޭ މީހުން ބައިތިއްބުމަށްޓަކައި ރާއްޖޭގެ ހުރިހާ އަތޮޅެއްގައި ކަރަންޓީނު ފެސިލިޓީ ގާއިމްކުރިއެވެ. އެގޮތުން، 600 ށްވުރެ ގިނަ ތަންތަން އަތޮޅުތަކުގައި ހަދާފައިވާ ކަމަށް މީގެ ކުރިން ސަރުކާރުން ހާމަކޮށްފައިވެއެވެ.
ރާއްޖޭގެ ކޮވިޑް-19ގެ ހާލަތަށް ބަލާއިރު 2،137 ޕޮޒިޓިވް ކޭސް ވަނީ ރިޕޯޓުކޮށްފައެވެ. އަދި 1،759 މީހަކު ވަނީ ބަލިން ފަސޭހަވެ، ދޫކޮށްލާފައެވެ. ބަލިޖެހޭ މީހުންގެ އަދަދު ދަށްވެ އެކްޓިވް ކޭސްތަކުގެ އަދަދު މިހާރު އުޅެނީ 368 ގައެވެ.
