އެމްއެމްޕީއާރްސީގެ ހިޔާނާތުގެ މައްސަލައިގައި ހިމެނޭ "ކުދި ކްލަސްޓަރ" ތަކުގެ ތެރޭގައި ކުރީގެ ނައިބްރައީސް އަހުމަދު އަދީބާ ގުޅުންހުރި ފުލުހުންތަކެއް ހިމެނޭކަމަށް ޕްރޮސެކިއުޓަރ ޖެނެރަލް ހުސައިން ޝަމީމް ވިދާޅުވެއްޖެއެވެ.
ބުރާސްފަތި ދުވަހުގެ ރޭ ރާއްޖެޓީވީގެ "ފަލަސުރުޙީ" ޕްރޮގްރާމްގައި ވާހަކަ ދައްކަވަމުން ޕީޖީ ޝަމީމް ވިދާޅުވީ، އެމްއެމްޕީއާރްސީ ޙިޔާނާތުގައި ރާވާ އިސްކޮށް އުޅުއްވި ކަމަށް މިހާތަނަށް ފާހަގަވެފައިވަނީ ހައެއްކަ ފަރާތެއް ކަމަށެވެ. އަދި އެއީ މި ޙިޔާނާތުގައި ހިމެނޭ "ބޮޑެތި ކްލަސްޓަރ" ތަކުގެ ގޮތުގައި ޝަމީމް ވަނީ ސިފަ ކުރައްވާފައެވެ. އެގޮތުން ކުރީގެ ރައީސް އަބްދުﷲ ޔާމީނާއި، ކުރީގެ ނައިބްރައީސް އަހުމަދު އަދީބުގެ އިތުރުން، އެމްއެމްޕީއާރްސީގެ ކުރީގެ މެނޭޖިންގ ޑިރެކްޓަރ އަބްދުﷲ ޒިޔަތުގެ މައްޗަށް ދައުވާ އުފުލައި ޝަރީއަތް ކުރިއަށްދާކަން ޝަމީމް ފާހަގަކުރެއްވިއެވެ.
އެއާ ގުޅިގެން ޤާނޫނު ތަންފީޒުކުރާ އިދާރާތަކުގެ ގިނަ ފަރާތްތަކެއްގެ މައްސަލަތަކެއްވެސް ބަލަމުންދާ ކަމަށް ޝަމީމް ވިދާޅުވިއެވެ. އެގޮތުން ކުރީގެ ފުލުހުންގެ އިދާރާގައި މަސައްކަތް ކުރެއްވި ގިނަ ފަރާތްތަކެއްވެސް ހިމެނޭ ކަމަށާއި، ސިިފައިންގެ އޮފިސަރުންތަކެއްގެ އިތުރުން، ފަނޑިޔާރުންތަކެއްގެ މައްސަލަތަކެއްވެސް ތަހުޤީޤު ކުރެވެމުންދާކަން ޝަމީމް ފާހަގަ ކުރެއްވިއެވެ.
އަޅުގަނޑުމެންނަށް ޤަބޫލު ކުރެވޭ ޙަޤީޤަތަކީ އެމްއެމްޕީއާރްސީގެ މައްސަލައިގައި މި ހާދިސާ ހިނގާ މި ދިޔައީ ހަޤީޤަތުގައި ހަމައެކަނި މި ދެންނެވި 3 ބޭފުޅުންގެ ހުށިޔާރުކަމުންނެއް ނޫން، އެކަމުގައި އޭރު ދައުލަތް ހިންގުމުގައި ތިއްބެވި ވަރަށް ގިނަ ބޭފުޅުންނާއި، އަދި ދައުލަތުގެ އެކި މުއައްސަސާތަކުގައި ތިއްބެވި ބޭފުޅުން ހިމެނޭ، ދެން އިހުމާލެއް ކަމެއް ޤަސްތުގައި ކަމެއް ނުކުރެއްވީކަމެއް ، ކޮންމެސް ބައިވެރިވުމެއް (އެއީ ކަމެއް ކޮށްގެން ވިޔަސް ނުކޮށްގެން ވިޔަސް) އެބައޮތް، އެ ބައިވެރިވުން އޮވެގެން މިހިސާބަށް ކަންކަން މި ދިޔައީޕްރޮސެކިއުޓަރ ޖެނެރަލް ހުސައިން ޝަމީމް
ޕީޖީ ޝަމީމް ވިދާޅުވީ، މި މައްސަލައިގައި އެންޓި ކޮރަޕްޝަން ކޮމިޝަނުގެ އޭރުގެ މެމްބަރުންގެ އިހުމާލެއް ނުވަތަ ފަރުވާކުޑަ ކުރުމެއް ފާޅުގައި ފެންނަން އޮތް ކަމަށެވެ. އަދި އެކަމުގެ ތަހުޤީޤުތައްވެސް ކުރިއަށްދާކަން ފާހަގަ ކުރައްވައި ޝަމީމް ވިދާޅުވީ، އޭސީސީގެ އޭރުގެ މެމްބަރުންނާއި، ކުރީގެ ނައިބްރައީސް އަހުމަދު އަދީބާ ގާތް ގުޅުމެއް އޮތް ފުލުހުންގެ އިތުރުން، 3 ފަނޑިޔާރެއްގެ މައްސަލަ މިހާރުވެސް ބަލަމުންދާ ކަމަށެވެ.
އެ މައްސަލަތައް ވަރަށް އަވަހަށް ނިންމާލުމަށް މަސައްކަތް ކުރަމުންދާ ކަމަށް ޝަމީމް ވިދާޅުވިއެވެ.
އޭގެ އިތުރުން، އޭރުގެ ސިޔާސީ ވެރިންގެ މައްސަލަތަކެއްވެސް ބަލަމުންދާކަން ފާހަގަ ކުރައްވައި ޝަމީމް ވިދާޅުވީ، އޭރު ދައުލަތުގެ މުހިއްމު މަޤާމުތަކުގައި ތިއްބަވައި، އެއްވެސް ފިޔަވަޅެއް ނާޅުއްވައި ތިއްބެވި ފަރާތްތަކާއި، ކުރީގެ މަޖިލިސް މެމްބަރުންނާއި، ސިޔާސީ މަޤާމުތަކުގައި ތިއްބެވި ފަރާތްތައްވެސް ފާހަގަވެފައިވާ ކަމަށެވެ. އަދި ކިތަންމެ ގިނަ ދުވަސްތަކެއް ވެގެން ދިޔަ ނަމަވެސް، ތުހުމަތު ކުރެވޭ މީހުންގެ މައްސަލަތައް "ކޮޅެއްގައި ޖެހެންދެން" މައްސަލަތައް ކުރިއަށް ގެންދަވާނެ ކަމުގެ ޔަޤީންކަން ޕީޖީ ޝަމީމް ވަނީ ދެއްވާފައެވެ.
މި މައްސަލައިގައި ތުހުމަތު ކުރެވޭ އެކި ފެންވަރުގެ 260 އެއްހާ މީހުން ހިމެނޭއިރު، ތަހުޤީޤު ނިމި، އެކަށީގެންވާ ހެއްކާއި ޤަރީނާ ލިބެމުންދާ ވަރަކަށް މައްސަލަތަކުގައި ދައުވާ ކުރައްވަމުން ގެންދަވާނެކަން ޕީޖީ ވަނީ މީގެ ކުރިންވެސް ފާހަގަ ކުރައްވާފައެވެ.
