ގއ. މާމެންދޫގައި ހޯމް ކަރަންޓީނުގައި ހުރި މީހަކު ކޮވިޑަށް ޕޮޒިޓިވްވެއްޖެއެވެ.

'ރާއްޖެއެމްވީ'އަށް މައުލޫމާތު ދެއްވަމުން ގއ. އަތޮޅު ކައުންސިލްގެ ރައީސް އަހުމަދު ފުއާދު ވިދާޅުވެފައިވަނީ، ބައްޔަށް ޕޮޒިޓިވްވެފައިވަނީ ހޯމް ކަރަންޓީނުގައި ހުރި އުމުރުން 28 އަހަރުގެ ފިރިހެނެއް ކަމަށެވެ.

މި ޒުވާނާ މާމެންދޫއަށް ގޮސްފައިވަނީ މި މަހުގެ 13 ވަނަ ދުވަހުއެވެ. އަދި އޭނާއާއި އެކު 80 މީހުން ދަތުރުކޮށްފައިވާ ކަމަށް ފުއާދު ވިދާޅުވިއެވެ.

އޭނާގެ ފަރާތުން ކޮވިޑް-19ގެ އަލާމާތްތައް ފެނިގެން ސާމްޕަލް ނަގާފައިވަނީ އަންގާރަ ދުވަހުއެވެ. އަދި ނަތީޖާ ލިބިފައިވަނީ ބުރާސްފަތި ދުވަހުއެވެ.

މިކަމާއި ގުޅިގެން ރަށް މޮނީޓަރިންގެ ހާލަތަށް ގެންދިއުމާއި ގުޅޭގޮތުން ހެލްތު ޕްރޮޓެކްޝަން އޭޖެންސީ (އެޗްޕީއޭ) އިން އަދި އަންގާފައި ނުވާކަމަށް ފުއާދު ވިދާޅުވިއެވެ.

މާމެންދޫއިން މީހަކު ކޮވިޑަށް ޕޮޒިޓިވްވެފައިވަނީ މާލެއިން ކޭސްއެއް ފެނުމާއި ގުޅިގެން ރަށްރަށުގައި އަޅާފައިވާ ފިޔަވަޅުތައް ބާތިލުކޮށްފައި ވަނިކޮށެވެ. ރާއްޖެއިން ބޭރު އަންނަ މީހުންނާއި، މާލެއިން ރަށްރަށަށްދާ މީހުން ގޭގައި ކަރަންޓީނުވާ މުއްދަތަކީ 14 ދުވަސް ކަމަށް ކަނޑައަޅައި، ހޯމް ކަރަންޓީނުގެ 14 ދުވަސް ތެރޭގައި ޕީސީއާރު ޓެސްޓުކުރާ ގޮތަށް ޓެކްނިކަލް އެޑްވައިޒަރީ ގްރޫޕް (ޓެގް) އިން ވަނީ ނިންމާފައެވެ.