ރާއްޖެއިން ކޮވިޑް-19 އަށް ޕޮޒިޓިވްވި އެންމެ އުމުރުން ދުވަސްވީ މީހާ ރަނގަޅުވެ، ގެއަށް ބަދަލު ކޮށްފިއެވެ.

ކޮވިޑް-19ގައި ހައިރިސްކް ކެޓަގަރީގައި އުމުރުން ދުވަސްވީ މީހުން ހިމެނޭތީ އެފަދަ މީހުންނަށް ޚާއްސަ ސަމާލުކަމެއްދީގެން ފަރުވާ ދިނުމުގެ ކަންކަން ކުރިއަށް ގެންދެއެވެ. އެގޮތުން މިހާތަނަށް ކޮވިޑް-19 އަށް ރާއްޖެއިން ޕޮޒިޓިވްވި އެންމެ ދުވަސްވީ މީހަކަށް މިބަލި ޖެހިފައި ވަނީ 92 އަހަރުގެ ދެ މީހަކަށެވެ.

މީގެ ތެރެއިން އެކަކަކީ ސަރުދާރު ދޮންމަނިކު ނުވަތަ ސަރުދާރު ދޮންބެއެވެ. އޭނާ ބަޔަށް ޕޮޒިޓިވްވީ މެއި މަހުގެ 29 ވަނަ ދުވަހެވެ. އަދި ޓްރީޓޮޕް ހޮސްޕިޓަލުުގެ އައިސީޔޫގައި ފަރުވާ ހޯދުމަށްފަހު، ބަލިން ރަނގަޅުވެ ގެއަށް ބަދަލުކޮށްފައިވަނީ ބުދަ ދުވަހުގެ ވަގުތެއްގައެވެ.

ސަރުދާރު ދޮންމަނިކުގެ ދަރިފުޅު އަަހުމަދު ޝުއައިބް މިހާރު ނޫހަށް ދީފައިވާ އިންޓަވިއުއެއްގައި ބުނެފައިވަނީ ބައްޕަ ކޮވިޑް-19އަށް ޕޮޒިޓިވްވިކަން އެނގުނީ އެހެން ބަޔަކަށް ޑޮކްޓަށް ދެއްކުމުން ކަމަށެވެ. އަދި ކޮވިޑް-19އަށް ޓެސްޓު ކުރީ ޑޮކްޓަރުގެ ލަފާގެ ދަށުން ކަމަށް އޭނާ ބުނެފައިވެއެވެ.

ޝުއައިބު ބުނީ ކޮވިޑް-19 އަށް ބައްޕަ ޕޮޒިޓިވި ނަމަވެސް ހާލު މާބޮޑު ނުވާ ކަމަށާއި، ހޮސްޕިޓަލުން ވަރަށް ރަނގަޅަށް ހުރިހާ އިންތިޒާމްތަކެއް ހަމަޖައްސާދީފައިވާ ކަމަށެވެ.

އާންމު ހިދުމަތުގެ އިނާމް ހާސިލްކޮށްފައިވާ ސަރުދާރު ދޮންބެއަކީ ރާއްޖޭގައި ޗާޕުކުރި އެންމެ ފުރަތަމަ ކަރުދާސް ރުފިޔާގެ ޑިޒައިންތަކުގެ ކުރެހުންތެރިޔާއެވެ. 1940 ގައި ކުރެހުމުގެ ތެރޭގައި މަސައްކަތް ކުރުމުގެ އިތުރުން އަތްތެރި މަސައްކަތްތައް ވެސް ސަރުކާރުގެ ދޮންބެ ކުރިއެވެ.