މިނިސްޓްރީ އޮފް ޓޫރިޒަމުން އެކުލަވާލާފައިވާ މޯލްޑިވްސް ސޭފް ޓޫރިޒަމް ގައިޑްލައިންއާ ގުޅޭގޮތުން ރައްޔިތުންގެ މަޖިލީހުގެ ލަފާ ރައީސް އިބްރާހިމް މުހައްމަދު ސޯލިހަށް އަރުވައިފިއެވެ.
ރައީސް ސޯލިހުއާ ލަފާ ހިއްސާކުރެއްވީ، ރައްޔިތުންގެ މަޖިލިހުގެ ރައީސް މުހައްމަދު ނަޝީދުއެވެ. ބުދަ ދުވަހުގެ ޖަލްސާގައި ރައްޔިތުންގެ މަޖިލިހުން ވަނީ، ރާއްޖެ އަންނަ ފަތުރުވެރިންގެ އަތުން މިހާރު ނަގަމުންދާ ޓެކްސްތަކާއި ފީތައް ފިޔަވައި، އިތުރު ފީތަކެއް ނުނެގުމަށާއި، ކަރަންޓީނު ނުވެ ފަތުރުވެރިންނަށް ރާއްޖެއަށް ޒިޔާރަތްކުރެވޭނެ އިންތިޒާމްތައް ހަމަޖެއްސުމަށް ސަރުކާރަށް ލަފާދިނުމަށް ފާސްކޮށްފައެވެ.
އޭގެ އިތުރުން، ރައްޔިތުންގެ މަޖިލީހުގެ ރައީސް، މުހައްމަދު ނަޝީދު އާއި މާފަންނު މެދު ދާއިރާގެ މެމްބަރު އިބްރާހިމް ރަޝީދުއާއި، މަތިވެރި ދާއިރާގެ މެމްބަރު ހަސަން ޒަރީރު އަދި ހިންނަވަރު ދާއިރާގެ މެމްބަރު ޖީހާން މަހުމޫދު ހިއްސާ ކުރައްވާފައިވާ ހިޔާލުތައް، މި މައްސަލަ ބެލި އިގްތިސާދީ ކޮމިޓީގެ ރިޕޯޓާއެކު އެއްކަރުދާސްކުރުމަށްފަހު، އެ ހިޔާލުތައް ޓޫރިޒަމް މިނިސްޓްރީއާ ހިއްސާކުރުމަށް މަޖިލިހުން ވަނީ ފާސްކޮށްފައެވެ.
މަޖިލިހުގެ އިގްތިސާދީ ކޮމިޓީން އެކުލަވާލާފައިވާ ރިޕޯޓުގައި ބުނެފައިވަނީ، މަޖިލިހުގެ ނިންމުންތަކަށް ރިއާޔަތް ކުރުމަށް ފަހު ޓޫރިޒަމް މިނިސްޓްރީގެ ސޭފް ޓޫރިޒަމް ގައިޑްލައިންގެ ތިންވަން ދެލިކޮޕީ އެކުލަވާލުމަށެވެ. ގިނަ ފީތަކެއް ނެގުމަށް ހިމަނާފައިވަނީ، ޓޫރިޒަމް މިނިސްޓްރީން އެކުލަވާލި ފުރަތަމަ ދެލިކޮޕީގައެވެ. ނަމަވެސް، އަންނަ ޖުލައި މަހު ބޯޑަރުތައް ހުޅުވާލާއިރު، ފަތުރުވެރިންގެ އަތުން އިތުރު ފީތަކެއް ނަގަން ބޭނުންނުވާ ކަމަށް ޓޫރިޒަމް މިނިސްޓަރ އަލީ ވަހީދު ވަނީ ވިދާޅުވެފައެވެ.
ޓޫރިޒަމް މިނިސްޓްރީން އެކުލަވާލާފައިވާ އައު ގައިޑްލައިން، ބުދަ ދުވަހު ބޭއްވި "ނެޝަނަލް ޓާސްކްފޯރސް އޮން ރެސިލިއަންސް ބިލްޑިންގް އެންޑް އިކޮނޮމިކް ރިކަވަރީ"ގެ ފުރަތަމަ ބައްދަލުވުމުގައި، މިނިސްޓަރ އަލީ ވަހީދު ވަނީ ރައީސް ސޯލިހުއާ ހިއްސާކުރައްވާފައެވެ. ދެން ބާއްވާ ޓާސްކްފޯހުގެ ބައްދަލުވުމުގައި، މި ގައިޑްލައިނާ މެދު ގޮތެއް ނިންމުމަށް ވަނީ ހަމަޖެހިފައެވެ.
