ރާއްޖޭގެ ފަތުރުވެރިކަން އަލުން ހުޅުވާލާއިރު، ރާއްޖެއަށް ޒިޔާރަތްކުރާ ކޮންމެ ފަތުރުވެރިއަކު އަތުން، އެ ފަތުރުވެރިޔާ ރާއްޖޭގައި ހޭދުކުރާ ކޮންމެ ރެއަކަށް، ކޮވިޑް ޓެސްޓްގެ ގޮތުގައި 8 ޑޮލަރު ނެގުމަށް އިގްތިޞާދީ ކޮމެޓީން ހުށަހަޅައިފި އެވެ.

ޓޫރިޒަމް މިނިސްޓްރީން ތައްޔާރުކޮށްފައިވާ، "މޯލްޑިވްސް ސޭފް ޓޫރިޒަމް ގައިޑްލައިން (އެމްއެސްޓީޖީ)"ގެ ފުރަތަމަ ދެލިކޮޕީ ރައްޔިތުންގެ މަޖިލީހުގެ އިގްތިޞާދީ ކޮމެޓީން ދިރާސާކޮށް ނިންމި ގޮތުގެ ރިޕޯޓްގައި ބުނެފައިވާ ގޮތުގައި، އެގައިޑްލައިން ފައިނަލްވެގެންދާއިރު ދިވެހިރާއްޖެއަށް ޒިޔާރަތްކުރާ ކޮންމެ ފަތުރުވެރިއެއްގެ އަތުން ބޮލަކަށް ކޮންމެ ބެޑް ނައިޓްއަކަށް ޓޫރިޒަމް ކޮވިޑް ޓެކްސްގެ ގޮތުގައި، ކަމާގުޅޭ ޤާނޫނުގެ ދަށުން، 8 އެމެރިކާ ޑޮލަރު ނެގުމަށް ސަރުކާރަށް ހުށަހެޅުމަށް ވަނީ ކޮމެޓީން ފާސްކޮށްފަ އެވެ.

މީގެއިތުރުން ވެސް އެގައިޑްލައިނާ ގުޅޭގޮތުން ކޮމެޓީ ރިޕޯޓްގައި ބުނެފައިވަނީ، ޓޫރުޒަމް މިނިސްޓްރީން އެކުލަވާލި "މޯލްޑިވްސް ސޭފް ޓޫރިޒަމް ގައިޑްލައިން" (އެމްއެސްޓީޖީ)ގެ ފުރަތަމަ ދެލިކޮޕީގެ ބަދަލުގައި މިހާރު މަޝްވަރާ ކުރެވެމުންދަނީ ތިންވަނަ ދެލިކޮޕީއާމެދު ކަމަށް ޓޫރިޒަމް މިނިސްޓްރީބް މައުލޫމާތު ދީފައިވާ ކަމަށެވެ. އެގޮތުން، ކޮމެޓީން ފާސްކޮށްފައިވަނީ، އަލުން ފަތުރުވެރިކަން ހުޅުވާލުމަށް އެކުލަވާލާއި ގައިޑްލައިންގައި އިގްތިޞާދީ ކޮމެޓީން ނިންމާފައިވާ ނިންމުންތަކަށް ވެސް ރިއާޔަތް ކުރުމަށްފަހު، އެގައިޑްލައިން އެކުލަވާލުމަށް ސަރުކާރަށް ލަފާ ދިނުމަށެވެ.

އަލުން ފަތުރުވެރިކަން ހުޅުވާލާއިރު، ކޮންމެ ފަތުރުވެރިޔަކު އަތުން، އެ ފަތުރުވެރިޔާ ރާއްޖޭގައި ހޭދަކުރާ ކޮންމެ ރެއަކަށް 8 ޑޮލަރު ނެގުމުގެ އިތުރުން، އިގްތިޞާދީ ކޮމެޓީއަށް ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު އާއި މާފަންނު މެދު ދާއިރާގެ މެމްބަރު ހަސަން ޒަރީރު އަދި ހިންނަވަރު ދާއިރާގެ މެމްބަރު ޖީހާން މަހުމޫދު ހިއްސާ ކުރައްވާފައިވާ ހިޔާލުތައް ޓޫރިޒަމް މިނިސްޓްރީއަށް ހިއްސާކުރުމަށްވެސް އިގްތިޞާދީ ކޮމެޓީން ވަނީ ފާސްކޮށްފަ އެވެ.

އެމްއެސްޓީޖީ އާއެކު ޓޫރިޒަމް މިނިސްޓަރ އަލީ ވަހީދު މަޖިލީހުގެ ރައީސްއަށް ފޮނުއްވި ސިޓީގައި ވިދާޅުވެފައި ވެފައިވަނީ، އެމްއެސްޓީޖީ އެކުލަވާލުމުގައި ދުނިޔޭގެ އެހެނިހެން ގައުމުތަކުގައި މިކަމުގައި ގެންގުޅޭ މިންގަނޑުތަކަށާއި ޑަބްލިޔުއެޗްއޯގެ ގައިޑްލައިންތަކާއި ޔޫއެން-ޑަބްލިޔުޓީއޯގެ ލަފަޔާއި އިރުޝާދު، އަދި މިނޫނަސް އާންމު ސަލާމަތާއި ރައްކާތެރިކަން ކަށަވަރު ކުރުމަށް ބޭނުންވާ މިންގަނޑުތަކަށް ބަލާފައިވާނެ ކަމަށެވެ.

އެ ގައިޑްލައިންގައިވާ ގޮތުން ކޮންމެ ފަތުރުވެރިއެއްގެ އަތުން 100 ޑޮލަރުގެ ވިސާ ފީއެއް ނަގަން ވަނީ ހިމަނާފަ އެވެ. މީގެ އިތުރުން ވިސާ ދޭނީ މަދުވެގެން ރާއްޖޭގައި 14 ދުވަސް ހޭދަ ކުރާ ފަތުރުވެރިންނަށް ކަމަށާއި، އެމީހަކު ހުންނަން ޖެހޭނީ އެންމެ ތަނެއްގައި ކަން ވާންޖެހޭނެ ކަމަށް ބުނެފައި ވެއެވެ.

މި ގައިޑްލައިންގައި ޗާޓަރު ފުލައިޓްތަކާއި ޕްރައިވެޓް ޖެޓް އަދި ފަތުރުވެރިކަމުގެ ޚިިދުމަތްދޭ ބޭރުގެ ކަނޑު އުޅަނދު ފަހަރަށް ވެސް ވަކި ކަންތައްތަކެއް ވަނީ ހިމަނާފަ އެވެ. އެގޮތުން ޗާޓަރު ފުލައިޓް އަދި ޕްރައިވެޓް ޖެޓްތަކުން ލޭންޑިންގ ފީއެއްގެ ގޮތުގައި 50،000 ޑޮލަރު ނަގަން ހިމަނާފައި ވެއެވެ.

އޭގެ އިތުރުން، ރާއްޖޭގެ ކަނޑުގެ ސަރަހައްދަށް ވަންނަ ފަތުރުވެރިކަމުގެ ހިދުމަތްދޭ ކަނޑު އުޅަނދުތަކުން 10،000 ޑޮލަރުގެ ފީއެއް ނެގުމާއި، ސަރުކާރުން ވަކި އެއްޗެއް އަންގަންދެން ކުރޫސް ލައިނާތައް އައުން މަނާވާނެ ކަމަށް ބުނެފައި ވެއެވެ. މީގެ އިތުރުން ފަތުވެރިން އުޅަނދަށް އެރުވުމައި ބޭލުމުގެ ކަންކަން ހަމަޖެހިފައި އޮންނަން ޖެހޭނީ ސޭފް ޓުއަރިޒަމް އަށް ހާއްސަވާ އެއަރޕޯޓެއްގައި ކަމަށް ވަނީ ބުނެފަ އެވެ. ނަމަވެސް، މިގައިޑްލައިނުގެ ފުރަތަމަ ދެލިކޮޕީއަށް ބޮޑެތި ބަދަލުތަކެއް އަންނާނެ ކަމަށް މިހާރު މިވަނީ ބެލެވިފަ އެވެ. އެއީ ފަތުރުވެރިކަމުގެ ދާއިރާގައި ހަރަކާތްތެރިވާ ފަރާތްތަކާއި، އަދި މަޖިލީހުގެ މެމްބަރުންގެ ވެސް މައިގަނޑު ވިސްނުންހުރީ، ރާއްޖޭއަށް ޒިޔާރަތްކުރާ ފަތުރުވެރިންގެ އަތުން ބޮޑެތި އަދަދުތަކުން ފީތައް ނެގުމުގެ ބަދަލުގައި، ފަތުރުވެރިން ރާއްޖެއަށް ކުރުން ޝައުގުވެރި ކުރުވާނެ ގޮތްތަކަށް ކަންކަން ބައްޓަން ކުރުމަށެވެ.

ޓޫރިޒަމް މިނިސްޓްރީން މިހާރު ދަނީ، އެމްއެސްޓީޖީގެ ތިން ވަނަ ދެލިކޮޕީ އެކުލަވާލުމުގެ މަސައްކަތް ކުރަމުން ނެވެ.

އަލުން ފަތުރުވެރިކަން ހުޅުވާލާއިރު، ކޮވިޑް-19 ރޯގާއިން ރައްކާތެރިވުމަށް ދުނިޔޭގެ ސިއްހަތު ޖަމިއްޔާ އާއި ހެލްތް ޕްރޮޓެކްޝަން އެޖެންސީ (އެޗްޕީއޭ)ގެ ގައިޑްލައިންތަކާ އެއްގޮތަށް ރައްކާތެރިކަމުގެ ފިޔަވަޅުތައް އެޅުމަށް ހާއްސަ ސަމާލުކަމެއް ދޭނެއެވެ.

ރާއްޖޭއަށް ލިބޭ އާމްދަނީ 80 ޕަސެންޓް ހިއްސާކުރަނީ ފަތުރުވެރިކަމުގެ ސިނާއަތުން ނެވެ.

ރާއްޖޭގެ ބޯޑަރު ބަންދުކޮށް، ފަތުރުވެރިން އައުން މަނާކޮށްފައިވަނީ، މިއަަހަރުގެ މާރޗް 27 ވަނަ ދުވަހު އެވެ.

ފަތުރުވެރިކަން ހުއްޓިފައިވާތީ ރާއްޖޭގެ އާބާދީގެ ގިނަ ބަޔަކަށް ލިބެމުންދިޔަ އާމްދަނީއަށް ނޭދެވޭ އަސަރުކޮށްފައި ވެއެވެ. އަދި ގިނަ ބައެއްގެ ވަޒީފާ ގެއްލި، މުސާރައަށްވެސް ނޭދެވޭ އަސަރުތަކެއް ކޮށްފައި ވެއެވެ.