ޖެންޑަރ މިނިސްޓަރ އައިޝަތު މުހައްމަދު ދީދީ އަށް އެމަނިކުފާނުގެ ފުރިހަމަ އިތުބާރު އެބައޮތް ކަމަށް ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު ވިދާޅުވެއްޖެއެވެ.
ރައީސް ނަޝީދު މިހެން ވިދާޅުވީ ހޯމަ ދުވަހު ބޭއްވި ނޫސްވެރިންގެ ބައްދަލުވުމުގައި ނޫސްވެރިއަކު ދެންނެވި ސުވާލަކަށް ޖަވާބު ދެއްވަމުންނެވެ.
ރައީސް ނަޝީދު ވިދާޅުވީ ދާދިފަހުން ފެންމަތިވި 11 އަހަރުގެ ކުއްޖަކު ރޭޕްކުރި ހާދިސާއާއި ގުޅިގެން ސަރުކާރުގެ ކަމާއިބެހޭ ފަރާތްތަކުން ކުރަން ޖެހޭ މަސައްކަތްތައް ކުރައްވާކަމަށް ގަބޫލުކުރައްވާ ކަމަށާއި، މިފަދަ މައްސަލަތަކުގައި މިހާރުގެ ޖެންޑަރ މިނިސްޓަރަށް އިތުބާރު އެބައޮތް ކަމަށެވެ. އަދި މި މައްސަލަތައް އެކަމަނާ ބައްލަވަމުން ގެންދަވާކަމަށްވެސް ރައީސް ނަޝީދު ފާހަގަކުރެއްވިއެވެ.
ހަމައެއާއެކު ކުޑަކުދިންގެ ހައްގުތަކާ ގުޅޭ މަސައްކަތްތައް ދާގޮތް އައްސަވަނީ މިނިސްޓަރު އަރިހުން ނޫން ކަމަށާއި، އެހެން ފަރާތްތަކުންވެސް މައުލޫމާތު ހޯއްދަވާކަމަށް ރައީސް ނަޝީދު ނޫސްވެރިންގެ ބައްދަލުވުމުގައި ވިދާޅުވިއެވެ.
ކުރިން މިފަދަ މައްސަލަތަކުގެ ތެރެއަށް ރައްޔިތުންގެ މަޖިލީހުން ވަދެފައިވަނީ ސަރުކާރުން ކުރަން ޖެހޭ މަސައްކަތްތައް ސަރުކާރުން ނުކުރީމާކަމަށް ރައީސް ނަޝީދު ވިދާޅުވިއެވެ. މީގެ ކުރިން ކުޑަކުދިންގެ ހައްގުތަކާ ގުޅޭ ގޮތުން ސަރުކާރުން ކުރަމުން ދިޔަ މަސައްކަތްތަކާ މެދު ސުވާލު އުފެދި، އަދި މިނިސްޓަރާ މެދު ސުވާލު އުފެދޭ ހިސާބަށް ދިޔަކަމަށާއި، އެހެން ނަމަވެސް މިހާރު އެހެން ވަޒީރެއް ލިބިފައިވާކަމަށް ރައީސް ނަޝީދު ފާހަގަކުރެއްވިއެވެ.
ޖެންޑަރ މިނިސްޓަރުކަމަށް އައިޝަތު މުހައްމަދު ދީދީ އައްޔަންކުރައްވާފައިވަނީ އިތުބާރު ނެތްކަމުގެ މައްސަލަ ފެންމަތިކުރުމުން އޭރުގެ މިނިސްޓަރ ޝިދާތާ ޝަރީފް މަގާމުން އިސްތިއުފާ ދެއްވުމުންނެވެ. އޭގެ ކުރިން އައިޝަތު މުހައްމަދު ދީދީ ހުންނެވީ އިންޑިއާއަށް ކަނޑައަޅާފައި ހުންނަވާ ދިވެހިރާއްޖޭގެ ސަފީރުގެ މަގާމުގައި ދިއްލީގައެވެ.
