އުސްފަސްގަނޑު ސަރަހައްދުގައި އުޅުއްވަނިކޮށް އެމަނިކުފާނާއި އެމަނިކުފާނުގެ އަނބިކަނބަލުންނަށް އިބްރާހިމް ޖައުފަރު (ޖޯރޭ) ދިމާކުރި ކަމަށް ތުހުމަތު ކުރައްވާ މައްސަލަ އަނބުރާ ނަގަން ނިންމަވާފައިވާ ކަމަށް ކުރީގެ ރައީސް ޑރ. މުހައްމަދު ވަހީދު ހަސަން މަނިކު ވިދާޅުވެއްޖެއެވެ.
ރައީސް ވަހީދު ކުރެއްވި ޓްވީޓެއްގައި ވިދާޅުވީ ނަފުސާނީ ގޮތުންނާއި ޖިސްމާނީ ގޮތުން ޖައުފަރަށް އެތައް މައްސަލައެއް ދިމާވެފައިވާ ކަމަށް އެނގިވަޑައިގަތުމުން، ޖައުފަރާ ދެކޮޅަށް ހުށަހެޅިފައިވާ މައްސަލަ ކުރިއަށް ނުގެންދިއުމަށް ކަމާ ބެހޭ އިދާރާތަކަށް އެދިިވަޑައިގަންނަވާ ކަމަށެވެ. އަދި އެ ގޮތަށް ރަސްމީކޮށް އަންގަވާނެ ކަމަށްވެސް ވިދާޅުވިއެވެ.
ރައީސް ވަހީދު ވިދާޅުވީ ޖައުފަރަށް އެފަދަ މައްސަލަތައް ދިމާވެފައިވާ ކަމަށް ބެލެެވެނީ ސިޔާސީ މަންފާ ހޯދުމަށް އެފަދަ ގޮތެއްގައި ބޭނުން ކޮށްފައިވާތީ، ސިޔާސީ ގޮތުން އެތައް އަނިޔާއެއް ލިބިފައިވާތީ ކަމަށް ގަބޫލުކުރެވޭ ކަމަށެވެ.
މީގެ އިތުރުން ޖައުފަރާއި ރައީސް ވަހީދަށާއި އެމަނިކުފާނުގެ އާއިލާއަށް ލިބިފައިވާ ފުރައްސާރަތަކާ ގުޅިގެން، ރާއްޖޭގެ ގާނޫނުތައް މުގުރާލާ އެމަނިކުފާނަށް އާންމުން ފުރައްސާރަ ކުރުމަށް އެމްޑީޕީގެ މަޖިލިސް މެންބަރުން ހިތްވަރު ދީފައިވާތީ އެކަން ކުށްވެރި ކުރައްވާ ކަމަށްވެސް ރައީސް ވަހީދު ވިދާޅުވިއެވެ.
އާދިއްތަ ދުވަހު އުސްފަސްގަނޑު ސަރަހައްދުން ޖައުފަރު ޑރ. ވަހީދަށް ހަމަލާދިން ކަމަށް ވިދާޅުވެ ފުރަތަމަ ޑރ. ވަހީދު ވަނީ ޓްވީޓުކުރައްވާފައެވެ. ނަމަވެސް ފަހުން ވިދާޅުވެފައިވަނީ ޖައުފަރު ވަނީ ޑރ. ވަހީދަށާއި އަނބިކަނބަލުންނަށް އަމާޒުކޮށް ހަޑިހުތުރުބަހުން މުޚާތަބުކޮށްފައި ކަމަށެވެ. އަދި މިމައްސަލަ ފުލުހުން ބަލަމުންދާ ކަމަށް ވަނީ ހާމަކޮށްފައެވެ.
މިކަމާއި ގުޅިގެން ހޯމަ ދުވަހު އޮތް ރައްޔިތުންގެ މަޖިލީހުގެ ޖަލްސާއަށް އުނގޫފާރު ދާއިރާގެ އެމްޑީޕީ މެމްބަރު މުހައްމަދު ވަހީދު ވަނީ މިމައްސަލާގައި ޑރ. ވަހީދު އިތުރުފުޅު ހައްދަވާ ޖައުފަރަށް ނުހައްގުން އަނިޔާތަކެއް ދޭން އުޅޭ ކަމަށް ވިދާޅުވެ ކުއްލި މައްސަލައެއް ހުށަހަޅުއްވާފައެވެ. މިމައްސަލައަށް ބަހުސްކުރައްވަމުން އެމްޑީޕީ މެމްބަރުން ވަނީ ރައީސް ވަހީދުގެ އިނާޔަތްތައް ކަނޑާލުމަށާއި އެމަނިކުފާނު ހައްޔަރު ކުރުމަށް ގޮވާލައްވާފައެވެ.
ރައީސް ވަހީދު ވިދާޅުވެފައިވަނީ އެ މައްސަލަ ފުލުހަށް ރިޕޯޓުކުރީ އެމަނިކުފާނުގެ އަރިހުގައި އެ ވަގުތު ތިބި ސެކިއުރިޓީން ކަމަށެވެ. ޑރ. މުހައްމަދު ވަހީދު ހަސަން މަނިކަކީ ކުރީގެ ރައީސް އަދި މިހާރު ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދުގެ ނައިބު ރައީސެވެ. 2012 ވަނަ އަހަރުގެ ފެބްރުއަރީ މަހުގެ ހަތްވަނަ ދުވަހު ރައީސް ނަޝީދު އިސްތިއުފާދެއްވުމުން ދެން ރައީސް ކަމާއި ހަވާލުވެވަޑައިގެންނެވީ ޑރ. ވަހީދެވެ.
އެއާއެކު ޑރ. ވަހީދު ވެގެންގޮސްފައިވަނީ އެމްޑީޕީ މެމްބަރުންގެ އެންމެ ބޮޑު ނުރުހުމެއް އަމާޒުވެފައިވާ އެއް ބޭފުޅަކަށެވެ. އެމްޑީޕީން ވަނީ ދިގުދެމިގެންދިޔަ މުޒާހަރާތަކެއްވެސް 2012 ވަނަ އަހަރު ޑރ. ވަހީދުގެ ސަރުކާރާ ދެކޮޅަށް ކުރިޔަށް ގެންގޮސްފައެވެ. މިމުޒާހަރާތަކުގައި އެމްޑީޕީގެ އެތައް ސަޕޯޓަރުންތަކަކަށް އަނިޔާވެފައިވާއިރު، އެމްޑީޕީން ބުނަމުން އަންނަނީ ރައީސް ނަޝީދުގެ ވެރިކަން ނިމުމަކަށް އައިސްފައިވަނީ ޑރ. ވަހީދު އަޑީގައި ހުންނަވައިގެން ގެނައި ބަޣާވާތަކުން ކަމަށެވެ.
